Aṭṭas i nzemmar ad nini x ixef-a, maca deg umezwaru Linjil isseřmad aneɣ aqqa uřa d ijjen ma izemmar ad yamen zi tebridt n Arruḥ n Arebbi u ad ɣares tiři tudart taruḥanect - tanita d řxaḍar n Arebbi - meɛlik netta war d ixřiq zi jdid mani issars atiqqi nnes di Yeccu Lmasiḥ maḥend ad immet ak-d řmewt nnes i ddenb u maḥend ad itwasnekkar akides ɛawed qibač Arebbi am ij n bnadem d jdid s tnukra nnes d ufarreɣ n tmexsa (=tayri) n Arebbi s Arruḥ Iqedsen deg wuř n inni ittiqqan (=deg wuř n řmumen).

Di tudart nneɣ ittbanen netwaxřeq-d d amezwar, illa s man aya aqqa nezdeɣ neǧa u ad nezdeɣ di ddunnit. Ɛawed kifkif zi jjihet n arruḥ. Neḥdaj ad nexřeq zi jdid di tudart taruḥanect maḥend ad nezmar ad nezdeɣ qibač Arebbi amecnaw Adam d Ḥawa zedɣen qibač Arebbi, qbeř ma ad ggen ddenb.

Ejj aneɣ řexxu ad nẓar mammec teǧa tudart umasiḥi di řweqt řami d ixřeq zi jdid. Ggur ad tfekkared illa ittxeṣṣ as ad igg aṭṭas n tmesřayin tisebḥanin u ad yiři d ijj n bnadem nnebřa xeṭṭu qibač Arebbi?! Ma zeɛma ammu i txarrṣed?

Iwa xẓar, amur amezwaru aqqa war iǧi ammu i iqqar Linjil. Linjil ɛawed inna ammu i yinni ittamnen di Lmasiḥ:  

"Mařa neqqar ‘neccin war xaneɣ bu ddnub’, aqqa nessxarriq x yixef nneɣ uca tidett war dayneɣ teǧi. Maca mařa nenɛem s ddnub nneɣ, aqqa Arebbi d aṣdiq d amseggad ḥima ad aneɣ iɣfar ddnub nneɣ uca ad aneɣ issizdeg zi marra min war iseggden. Mařa neqqar ‘neccin war dayneɣ bu ddnub’, nettarra t d bu-ixarriqen uca awař nnes war dayneɣ iǧi."    (1 Yuḥanna 1:8-10)

Ejj aneɣ řexxu ad nẓar min ittegg usegmi, min iḥdaj uḥenjir itwaxeřqen qaɛ ɣar umezwar? Iḥdaj aɣi d macca d umsawaḍ ak d babas d yemmas d iḥenjiren nneḍni!    

Zi jjihet taruḥanect aqqa d icten.

Man aya yuran di Linjil ...

Yeccu yarr-d (řami t iɣwa Cciṭan):

“Yarr-d xas inna “Aqqa tura ‘Bnadem war iddar s weɣrum waha, maca zi kuř awař i d ittekken zeg uqemmum n Arebbi.’” (Matta 4:4)

Amazan (=rrasul) Bulus aqqa yura i řmuminin di tendint n Kulussi:

"Maca mařa tetwassnekkarem-d ak-d Lmasiḥ, xenni arzum min iǧan sennej, mani iqqim Lmasiḥ x ufusi n Arebbi. Ɛeqřem min iǧan sennej, war iǧi min iǧan di tmurt, minzi kenniw aqqa temmutem uca tudart nwem tennuffar ak-d Lmasiḥ di Arebbi. Xmi i d ɣa iḍhar Lmasiḥ, wenni iǧan d tudart nneɣ, řexdenni uřa d kenniw ad kides-d teḍharem deg uɛuǧi. "   (Ikulussiyyen. 3:1-4)

Aḍbib Luqa wenni yuran 'Linjil s ufus n Luqa' d 'Řexdayem n Imazanen' (=rrusul) inna x řmuminin imezwura di Urcalim ammu:

"Nitni qqimen ṣbaren di tɣuri n imazanen d tmunt d tarezzit n weɣrum u di tẓaǧitin." (Řexdayem 2:42)

Tabrat i Iɛibraniyyen teɛřem řmuminin s wawařen-a:

"Uca ad neḥḍa ijjen wenneḍni ḥima ad negg uř deg wayawya ɣar tayri u ɣar řexdayem tiṣebḥanin, war nejji ca tamesmunt nneɣ am mammec nnumen ca zzayneɣ, maca ad nessemḥeḍ ijjen wenneḍni, mahu ɛad xmi i ɣa tẓarem aqqa ass nni yiweḍ-d."   (Iɛbraniyyen 10:24,25)

Ddar ak-d Wawař d Arruḥ n Arebbi !

Di ticri n řebda d utiqqi ak-d Yeccu Lmasiḥ ggur ad teffeɣ řɣiǧet taruḥanect. S usḥessi d tɣuri n wawařen di Linjil d utiqqi dayes d tẓaǧit i netta, Amsenjem nnec d Sidi nnec, ad dayek tetwagg tzemmar s jjehd n Wawařen d jjehd n Arruḥ iqedsen i iǧan deg umexřuq n jdid amtiqqi maḥend ad iṭṭaɛ i wawařen nnes u řɣiǧet ad tt nɣar deg wawařen-a swadday zi Linjil:

"S uyenni nɣem iɣezdisen (n arrimet) nwem inni x tmurt: tuqeḥbit, řexmej, acahi, nnecwat tiɛeffanin, ṭṭmeɛ d wenni d aɛbad i laṣnam. X ssibbet n uya ad d yas lɣaḍab n Arebbi x ayt n řmuɛṣiyyet. Uřa d kenniw tuɣa teggurem ammu zic, umi tuɣa kenniw teddarem (ɛad) di tmesřayin nni. Maca řexxu ɛawed kenniw tessarsem man aya marra x uɣezdis: axeyyeq d tefqaḥt d tuɛeffna, aceqqef d wawařen ixemjen zeg uqemmum nwem. War sxarriqem ca x wayawya umi tessarsem ɣar uɣezdis bnadem aqdim ak-d řexdayem nnes u tyarrḍem s wenni d jdid , wenni ittbeddařen ɣar tmusna tmun ɛlaḥsab ṣṣifet n wenni it-id ixeřqen.

Dayes war iǧi Ayunani niɣ Uday uřa d axtan niɣ nnebřa axtan uřa d abarrani niɣ Askit, uřa d ismeɣ niɣ ḥurr, maca Lmasiḥ d kuřci di marra.

Xenni, am kenniw ixḍar Arebbi d imqeddasen d imɛizzen, arḍem s teḥnunect di daxeř uřa s řeḍrafet d uwaḍeɛ d temhint d ttasiɛ n řxaḍar, uca mařa ca n yijjen ɣares acetci x wenneḍni, qebřem u samḥem i wayawya. Am mammec d awem iɣfar Lmasiḥ, ggem kenniw amenni ɛawed. Sennej i marra timesřayin-a, arḍem tayri tenni d txadent n řekmařet." (Ikulussiyyen: 3:5-13)

Arebbi d tifawt uca ittxeṣṣ i umasiḥi ad yuyur di tfawt!

"D wa d abarreḥ i zzayes nesřa uca ad awem-d nbarreḥ: Arebbi d tifawt, netta war dayes bu jjurret n taǧest. Mařa neqqar ‘neccin ɣarneɣ amuni akides’ uca neggur di taǧest, aqqa nessxarriq, war nettegg ca tidett. Maca mařa nuyur di tfawt, am netta di tfawt, ɣarneɣ amuni ak-d wayawya, uca idammen n Yeccu Lmasiḥ Mmis ad aneɣ ssizdegen zi qaɛ ddnub."   (1 Yuḥanna 1:5-7)

"Minzi awař n Arebbi iddar, ijhed, iqḍeɛ ktar zi kuř ssif s tnayen n wudmawen, ittakkwaḍ ař abeṭṭu n řeɛmar d arruḥ d řemfaṣeř d waduf, ifarrez ixarriṣen d tnawi n wuř. War din uřa d ijj n umeddar war d as ibin, maca marra timesřayin aqqa-tent twaɛarryent, twarezment ɣar tiṭṭawin n wenni umi ik-d ɣa negg řeḥsab."   (Iɛibraniyyen 4: 12,13)

Aṭṭas iggur ad nini x tmesřayini n kuř ass i ntteddar. Mammec i d aneɣ ittxeṣṣa ad ɣarsent nexẓar s tfawt n wawařen iqedsen n Arebbi, amecnaw: marra markat n lɛalaqat, řemřac, iḥenjiren, řwacun, řxedmet, macca, akud (=řweqt), arruḍ, tinɛacin/iqarriḍen, amɛamel nneɣ ak-d řmexzen, mammec nettemɛamal mařa ɣarneɣ jjehd ak-d iwdan nneḍni, mammec d aneɣ itxeṣṣa ad nuyur ak-d ixef nneɣ, mammec nessawař, amɛamel nneɣ d ak-d iwdan i war ittimnen di Lmasiḥ niɣ timesřayin nneḍni!

Mařa ɣarek ca n useqsi, ɛafak nnebřa abray msawaḍ-d akidneɣ s e-mail i ɣa tafed swadday!

Ggwar ad negg tizemmar ad xak-d narr s usdaheǧ deɣya!