Inna lmalak i Yusuf: "A Yusef, a mmis n Dawud, war tteggwed ad ɣarek tiři Maryem d tamɣart nnek, minzi min tuřu dayes, aqqa netta zi Arruḥ Iqeddsen”.Uca ad tařu aḥenjir, ad t tsemmid Yeccu, minzi netta ad issenjem aydud (=cceɛb) nnes zi ddnub nsen.” (Matta 1:20-21)

Yuḥanna Amseɣḍaṣ inna x Yeccu Lmasiḥ: "Necc ad kenniw ssɣeḍṣeɣ deg waman i ttubet. Maca wenni i d ɣa yasen awarni ayi, netta ijhed xafi, necc war sdiheǧeɣ ad as ksiɣ sandaliyat nnes, aqqa netta ad kenniw isseɣḍeṣ s Arruḥ Iqeddsen d tmessi." (Matta 3:11)

Xmi Natanayil iẓra Yeccu Lmasiḥ twařa tamezwarut, inna: "“A ‘Rabbi’ (=Sidi, Amseřmad), cek d Mmis n Arebbi, cek d ajeǧid n Israyil.” Yeccu yarr-d, inna as “Ma tumned s min d ac nniɣ ‘Aqqa ẓriɣ cek swadday i wartu’? Ad tẓared min iǧan ktar zi man aya.” Inna as “S tidett, s tidett, ad awem iniɣ, zi ssa d tsawent ad tẓarem ajenna innurzem u lmalakat n Arebbi ttařyent hekkwant x Mmis n bnadem." (Yuḥanna 1:49-51)

Min inna yemmas Maryam: “Min d awem i ɣa yini, ggem t.” (Yuḥanna 2:5)

Inna Yeccu Lmasiḥ: "Ammu ixs Arebbi ddunnit ař mani d iwca ayenni n Mmis ḥima kuř ijjen wenni zzayes i ɣa yamnen, war ittmetti ca maca ad ɣares tiři tudart n řebda. Minzi Arebbi war d issekk ca Mmis ɣar ddunnit ḥima ad iḥaseb ddunnit, maca issekk it-id ḥima ad zzayes issenjem ddunnit. Wenni zzayes i ɣa yamnen war ittetwaḥaseb ca, maca wenni war ittimnen ca aqqa itwaḥasab zi řexxu minzi netta war yumin ca deg yisem n uyenni n Mmis n Arebbi." (Yuḥanna 3:16-18)

Lmasiḥ inna I wudayen nni tuɣa ixsen ad t nɣen rami tuɣa ittřaɣa baba I Arebbi, issemqudda ixef nnes ak Arebbi: “S tidett, s tidett, ad awem iniɣ, Tamemmit war izemmar ad igg uřa d ict n tmesřact s yixef nnes, mɣir mařa iẓra Tababat ittegg it. Min mma ittegg netta uřa d Tamemmit ittegg amenni.Tababat ittexs Tamemmit uca isscen as marra min ittegg uca ad as isscen řexdayem timeqqranin x tina ḥima ad tdehcem. Am mammec d issnekkar Tbabat imettinen uca itticc tudart, amenni uřa d Tamemmit itticc tudart i wenni ixs. Tababat war ittḥasab uřa d ijj, maca iwca lḥisab marra i Tmemmit,ḥima ad weqqaren marra Tamemmit am ttweqqaren Tababat. Wenni war ittweqqaren Tamemmit , war ittweqqar ca Tababat wenni it-id issekken." (Yuḥanna 5:19-23)

Inna Yeccu i tenɛac n imeḥḍaren: “Ad ngaɛɛed ɣar Urcalim uca ad itwaqfeř i Mmis n bnadem marra min yuran zeg imkacafen. Minzi netta ad itwasellem i řegnus, ad t sseḥqaren, ad zzayes ssbehtřen, ad t tekkwaren uca ad xas ssusfen,ad t hettken s urekkuḍ, ad t nɣen uca deg wass wiss třata ad d ikkar.” (Luqa 18:31-33)

Yeccu iqqar: "Necc d ameksa d aṣebḥan. Ssneɣ uǧi inu uca uǧi inu issen ayi, am mammec i d ayi issen Tbabat , ammu i ssneɣ necc Tababat . Necc wciɣ tudart inu i wuǧi inu... S man aya ittexs ayi Tbabat , minzi necc wciɣ tudart inu ḥima ad tt-id ksiɣ ɛawed. Uřa d ijj war zzayi tt iksi, maca necc wciɣ tt s yixef inu. Ɣari ṣṣulṭa ḥima ad tt wceɣ u ɣari tizemmar ad tt-id ksiɣ ɛawed. Tawṣeyyet-a ṭṭfeɣ tt zi Baba.” (Yuḥanna 10:14,15,17,18)

Min tennid CEK? Wi innan aqqa belli netta ittamen di Lmasiḥ, itxeṣṣ as ad yamen deg wawařen n Lmasiḥ. Mařa war tettimned uřa daysen, ixs ad yini war ggur ad tnejmed zi lmuɛṣeyyet nnec u war ggur ad teṭṭfed asameḥ maḥend ad kides teqqimed u ad t teḍfared, war ggur ad ɣarek tiři tudart n řebda.