ASEQSI 3

Ma beddřen imasiḥiyyen Adlis Iqedsen am mammec qqaren ca n iwdan?

War xas nessiwiř, mařa teqqared man aya, aqqa tqajaḥed ammu Arebbi simant nnes, maci imasiḥeyyen d wudayen.

Iqqar Arebbi deg wawař nnes ammu:

« X man aya i d ayi inna SIDI: "Teẓri tt mliḥ, aqqa necc ḥeṭṭiɣ x wawař inu maḥend ad t tteggeɣ” »

(Irmiya 1:12)

Arebbi war iteṭṭes ca am mammec ixs cciṭan ad ijj iwdan ad fekkaren. Arebbi inḍar tiṭṭawin nnes x ddunnect u iḥeṭṭa x wawař nnes řami netta issen řeɛdu, cciṭan, war ixs maḥend iwdan s wawař n Arebbi ad twasseccen.

Awař n Arebbi d tidett (Yuḥanna 17:17), aqqa d arruḥ u d tudart (Yuḥanna 6:36). S uyenni war ixs cciṭan iwdan ad xas arzun. Netta yiweḍ ad isseqneɛ abarru n iwdan maḥend war qqaren linjil s tɛenkrift niɣ issidef asen deg uzeǧif aqqa netta itwazewwar. U iwdan tɛawaden ixarriqen nnes nnebřa ma ad xarṣen.

Inna Yeccu Lmasiḥ:

« Minzi s tidett ad awem iniɣ, ař i ɣa ifna ujenna d tmurt, war ifenni uřa d ijj n řḥarf niɣ d taneqqiṭ zi ttawrat ař i ɣa imsar kuřci. »

(Matta 5:18).

Ma teɣrid linjil? Min xas tessned? Ma iɛeddeř imeḥḍaren n umazan zeɛma ad ssfarɣen awařen u ad sseɛdun ca n wawařen nneḍni deg wemcan nsen? Ma zeɛma ggwar ad afen awařen n umazan war iɣřin x tudart nsen? Isseɛdu asen awařen nican n tidett maḥend ad ten ḥḍan.

Inna Lmasiḥ s yixef nnnes:

“Ajenna d tmurt ad ɛdun maca awařen inu war ɛeddun ɛemmarṣ.”

(Matta 24:35)

Řami tuɣa Lmasiḥ iddar di tmurt, netta tuɣa-t iggur mani mma. Aṭṭas n iɛurrac n iwdan usin-d maḥend ad xzaren min ittegg u maḥend ad sřin min iqqar. Ma zeɛma ggwur ad ttun awařen d řeɛmayeř nnes? Ma zeɛma ggwur ad qebřen awařen n Lmasiḥ maɛlik farɣen? U řami ittwawari řexbar asebḥan, itwasseɛdu ɣar mara tiɣemmura n ddunnit. Ad nini aqqa ca n iwdan arezzun ad ssfarɣen niɣ ad zewwaren řexbař asebḥan, mammec ggin zemmaren ad beddřen tira-ya marra mani mma uca ad t beddřen nican d ijjen di ddunnit marra? Tuɣa war zemmaren ad tt ggen. Řexbař asebḥan war izewwar ca. Arebbi iḥḍa awařen nnes. Linjil, a amedukkeř, war d aneɣ issiggwij ca zi Arebbi, maca Linjil iban-d aneɣ mammec itxeṣṣ ad ɣares-d nqarreb u mammec nzemmar ad nessen belli netta řebda akidneɣ i ɣa yiři maḥend ad aneɣ ibarek di Lmasiḥ.

A cek, wenni iqqaren, war tejji řeɛdu ad cek issḥarrem x wawař n Arebbi u x wenni i d ac/am ittexsen d wenni iwcin tudart nnes xak/xam.

Nnebřa awař n tidett n Arebbi, war teggured ad tzemmared ad tessned Arebbi n tidett u abrid i ittawyen ɣares.