Aṭṭas n iwdan ittɣir asen belli udayen ɣarsen adlis nsen u imasiḥeyyen ɣarsen ijjen nneḍni!

Iwa aqqa man aya war iǧi ca d tidett!

Inneḍni qqaren aqqa udayen ɣarsen tnayen idlisen umi qqaren Ttawrat d Zzabur (awař-a ixs ad yini `iṣebbiḥen` niɣ 'mazamir') u aqqa imasiḥeyyen ɣarsen ijj n wedlis wiss třata idur iɛdu idlisen tnayen imezwura u qqaren as Linjil (awař-a ixs ad yini `řexbar asebḥan` U ɛawed iwdan-a ggur ad inin aqqa Arebbi issufeɣ-d ɛad adlis wiss arebɛa.

Iwa war iǧi d min iǧan! Arebbi iwca aneɣ ɣir IJJ n wedlis min di iǧa aṭṭas n ismuniten n idlisen, maca marra idsen war twaḥarrfen u war twabeddřen, aqqa-ten jmiɛ d Awař n Arebbi d ijjen!

Ittxeṣṣa ad tessned amezwaru belli udayen bḍan idlisen n Řɛahd Aqdim ('Tinax') x třata n ismuniten umi qqaren 'Thorah' (xemsa idlisen imezwura n Musa, aqqa-ten d Ttawrat), Ketuvim (cwayt n idlisen u jarasen Awařen Iweznen n Sulayman d Iṣebbiḥen n Dawud d wedlis n Ayyub) d Nevi'im (inabeyyen imeqqranen d imeẓyanen inni kuř ijjen i yuɣa isem nnes deg wedlis). Tina i tt tuɣa d tira iqeddsen n Wudayen 400 isseggwusa ɛřaḥař qbeř třarit n Yeccu Lmasiḥ zi Arruḥ Iqeddsen zi Mariya taɛzarect.

Aṭṭas n wudayen umnen dayes u marra imazanen n Yeccu tuɣa-ten d udayen i dayes yumnen. U nican deg uyuren (=cchur) imezwura awarni řami immeksi Yeccu Lmasiḥ ɣar ujenna (=jjennet), ɣir di Urcalim waha, udfen di liman dayes amecnaw ařaf n iwdan umen belli netta d Lmasiḥ itwawaɛden.

Udayen řmuminin tuɣa-ten twabezzɛen awarni ca n řweqt di řesbab n tqeṭṭaɛt n webrid d weḍṭahed i tuɣa d ittasen amezwaru zi jjihet n wudayen imeqqranen n ddin n řweqt nni. Ijjen zzaysen, Bulus, tuɣa-t d ameqqran n liḍṭihad n wudayen imasiḥiyyen, maca yus- d ɣar liman di Lmasiḥ awarni řami d iḍhar Lmasiḥ ɣares s ij n tfawt tameqqrant deg webrid nnes ɣar Dimacq wenni yumuren Bulus maḥend ad ittbarreḥ řexbar aṣebḥan n Yeccu Lmasiḥ i marra iwdan d marra iyduden.

Aryaz-a Bulus d tenɛac n imazanen tuɣa-ten marra d udayen uca nitni marra umnen di Lmasiḥ amecnaw Lmasiḥ itwawaɛden i řgens n wudayen u nitni marra xedmen ak wayawya maḥend ad sseɛdun řexbar belli Yeccu Lmasiḥ netta tuɣa-t d Amessaḥ (=Lmasiḥ), wenni itwadehnen zi Arebbi maḥend ad issenjem iwdan nnes. Iwdan nnes d inni yumnen di Yeccu Lmasiḥ zi marra tiqebbař d zi marra řegnus d zi marra timura

Ca n imazanen d Bulus d aneḍfar axeddam n Bulus Luqa aḍbib (balak tuɣa-t d Ayunani), aqqa uran zyada n idlisen twaxeřqen-d zi Arruḥ Iqeddsen n Arebbi maḥend ad twarenyen ɣar třata nni n ismuniten n idlisen n Wudayen inni tuɣa-ten qbeř u tuɣa ittkewwnen Tira Iqeddsen ar ass nni.

Zyada n idlisen daysen arebɛa n linjilat n Yeccu Lmasiḥ, adlis 'řexdayem (cɣuřat) n imazanen (=rrusul)' u ktar qedda n tebratin itwaweḥḥan itwarin s ufus n imazanen i lkanayis (=timesmunin) n wussan nni u i ca n ineḍfaren ixeddamen, u ɣar uneggar nsen marra adlis 'Asargeb' s ufus n umazan Yuḥanna ɣar uneggar n řqarn umezwaru awarni i třařit n Lmasiḥ (min di issiweř Yuḥanna x ij n uweḥhi ameqqran u x tmesřayin n ttuqat n ddunnit). Idlisen-a xenni d asmuni n arebɛa n idlisen inni ittkewwnen jmiɛ tira iqeddsen n wudayen, qqaren as Linjil niɣ Řɛahd n Jdid.

Ƴar ubelleɛ n wedlis-a ɣar uneggaru n Řectab Iqeddsen ntaf awařen-a:

"Necc cehhdeɣ i marra inni ittesřan awařen n Arebbi zeg wedlis-a, mařa din ḥed wenni xasen i ɣa yarnin (x wawařen-a), Arebbi ad xas iɣḍeř jjrayeḥ tinni itwarin deg wedlis-a. Mařa ca n ijjen ad ikkes zeg wawařen n Arebbi zeg wedlis-a, ad as ikkes Arebbi tasɣart nnes zi tcejjart n tudart u zi tendint iqeddsen u zi min itwari deg wedlis-a.

Wenni icehhden x man aya, iqqar “Wah, necc ad d aseɣ deɣya!”

“Amin! As-d, a Sidi Yeccu!” .

Nniɛmet n Sidi Yeccu Lmasiḥ ad tiři ak-d marra imqeddasen. Amin!". (Asargeb 22:18-21)

Ina d awařen ineggura n Řectab Iqeddsen ( 'BIBLE'). Řectab Iqeddsen wanita ibda s třata n ismuniten n idlisen zeg Wudayen: 'Thorah', 'Ketuvim' and 'Nevi'im', qqaren asen s třata 'Řɛahd Aqdim'. Xenni awarni man aya ɣar uneggaru n Řectab Iqeddsen aqqa din ijj n usmuni n idlisen zeg wudayen qqaren as Linjil, řexbar aṣebḥan n Yeccu Lmasiḥ, d man aya d 'Řɛahd n Jdid'.

S uyenni din ɣir IJJ n ŘECTAB n AREBBI i yuran s wendeh n Arruḥ Iqeddsen n Arebbi s ufus n waṭṭas n iwdan inni tuɣa marra d udayen (balak Luqa waha i war iǧin d uday) u ŘECTAB n AREBBI wanita itwabḍan (maca war itwyarz) di Řɛahd Aqdim d Řɛahd n Jdid.