ASEQSI 5

Min iqqar Wedlis Iqedsen x mammec d ixřeq Arebbi ddunnit d bnadem?

Amezwaru 1

Taxeřqit n ajenna d tmurt

Deg umezwaru ixřeq-d Arebbi ajenna d tmurt. Tuɣa tammurt tarebbej u texřa u x wudem n řaǧaɣ ṭṭřam u Arruḥ n Arebbi tuɣa ittraḥ ittas-d x wudem n waman. Uca inna Arebbi “Ad d-tas tfawt” uca tus-d tfawt!” Iẓra Arebbi belli tifawt teṣbeḥ uca ibḍa Arebbi jar tfawt d ṭṭřam. Iřaɣa Arebbi tifawt ‘aziř ’ u ‘ṭṭřam’ iřaɣa as ‘ǧiřet’. Uca tedweř d tameddit u idweř d ṣṣbeḥ: d ass amezwaru.

Uca inna Arebbi “Ad tiři ict n řqubbet di řwesṭ n waman, ad tebḍa aman x waman!”
Arebbi igga řqubbet uca ibḍa aman i iǧan swadday i řqubbet x waman i iǧan sennej i řqubbet. Uca ammu i temsar. Iřaɣa Arebbi i řqubbet ‘ajenna’. Uca tedweř d tameddit u idweř d ṣṣbeḥ: d ass wiss tnayen.

Uca inna Arebbi “Ad munen waman i iǧan swadday i ujenna ɣar ijj n wemcan maḥend ad iban řbar!” Uca ammu i temsar. Iřaɣa Arebbi i řbar ‘tamurt’ uca amuni n waman iřaɣa asen ‘řebḥur’ (=ilawen). Uca iẓra Arebbi (belli) man aya iṣbeḥ. Uca inna Arebbi “Ad tesseɣmi tmurt aɣemmuy aziza: afsu (aziza) i izarrɛen zzariɛet d tcejjura s řɣiǧet i d itticcen řɣiǧet amecnaw marka nnes s zzariɛet nnes dayes x wudem n tmurt!” Uca ammu i temsar. Tesseɣmi-d tmurt aɣemmuy aziza: afsu (aziza) i izarrɛen zzariɛet amecnaw marka nnes d tcejjura i d itticcen řɣiǧet amecnaw marka nnes s zzariɛet nnes dayes. Uca iẓra Arebbi belli man aya iṣbeḥ. Uca tedweř d tameddit u idweř d ṣṣbeḥ: d ass wiss třata.

Uca inna Arebbi “Ad (din) iřint tfawin di řqubbet n ujenna ḥima ad bḍant jar ass d ǧiřet, ad iřint d řimarat d řweqt itwaggen d wussan d iseggwusa uca ad din iřint tfawin di řqubbet n ujenna ḥima ad wcent tifawt x tmurt!” Uca ammu i temsar. Uca igga Arebbi tnayen n tfawin mɣarent, tifawt tameqqrant ḥima ad teḥkem x wass u tifawt tameẓyant hima ad teḥkem x ǧiřet, uřa d itran. Issars itent Arebbi di řqubbet n ujenna ḥima ad wcent tifawt x tmurt u ḥima ad ḥekment x wass d ǧiřet u ḥima ad bḍant jar tfawt d ṭṭřam. Uca iẓra Arebbi belli man aya iṣbeḥ.
Uca tedweř d tameddit u idweř d ṣṣbeḥ: d ass wiss arebɛa.

Uca inna Arebbi “Ad ssfuffyen aman s wesfay n marra min dayes n buḥbeř iddaren uca ad din ḍwan ijḍaḍ sennej i tmurt ɣar mani teǧa řqubbet n ujenna!”
Ixřeq-d Arebbi řewḥuc imeqqranen u marra buḥbeř iddaren ittenḥezzan i xas issfuffyen aman amecnaw marka nnes uca marra ijḍaḍ s wefriwen amecnaw marka nsen. Uca iẓra Arebbi belli man aya iṣbeḥ. Ibark iten Arebbi, inna “Jjem-d řɣiǧet, twaktarem, ɛemmarem aman n řebḥur u ad twaktaren ijḍaḍ di tmurt.” Uca tedweř d tameddit u idweř d ṣṣbeḥ: d ass wiss xemsa.

Uca inna Arebbi “Ad d tarr tmurt marra min ɣares buḥbeř iddaren amecnaw marka nnes: řmař d lḥayawanat inni ittbuɛen d řewḥuc amecnaw marka nsen!” Uca ammu i temsar. Uca igga Arebbi řewḥuc n tmurt amecnaw marka nsen u řmar s arebɛa n iḍaren amecnaw marka nsen u marra lḥayawanat inni ittbuɛen x tmurt amecnaw marka nsen. Uca iẓra Arebbi belli man aya iṣbeḥ.

Uca inna Arebbi “Ejj aneɣ ad negg ‘Adam’ di ṣṣifet nneɣ uca ad ɣarsen yiři jjehd x iseřman n řebḥar u x ijḍaḍ n ujenna u x řmar s arebɛa n iḍaren u x marra tamurt u x marra lḥayawanat inni ittbuɛen x tmurt!”
Uca ixřeq-d Arebbi ‘Adam’ di ṣṣifet nnes. Ixřeq-d it di ṣṣiffet n Arebbi, ixřeq iten-d awtem d tawtemt. Ibark iten Arebbi uca inna asen Arebbi “Jjem-d řɣiǧet, twaktarem, ɛemmarem tamurt uca arrem tt-id sadu ufus nwem, ḥekmem x iseřman n řebḥar u x ijḍaḍ n ujenna u x marra lḥayawanat inni ittbuɛen x tmurt!” Uca inna Arebbi “Xẓarem, ad awem wceɣ marra afsu (aziza) i izarrɛen zzariɛet x wudem n tmurt u marra ticejjura s řɣiǧet ɣar tcejjart i izarrɛen zzariɛet, ad awem tiři d macca u i marra řewḥuc n tmurt u i marra ijḍaḍ n ujenna u i marra min ittbuɛen x tmurt i di iǧa buḥbeř iddaren, ad asen yiři marra afsu aziza d macca i nitni.” Uca ammu i temsar. Uca iẓra Arebbi marra min igga, u xẓar, tuɣa iṣbeḥ aṭṭas. Uca tedweř d tameddit u idweř d ṣṣbeḥ: d ass wiss setta.

Amezwaru 2

Ammu itwakemmřen ujenna d tmurt d qaɛ min daysen iǧan. Deg wass wiss sebɛa ikemmeř Arebbi řxedmet nnes i igga uca yareyyeḥ deg wass wiss sebɛa zi marra řxedmet nnes i yegga. Ibark Arebbi ass wiss sebɛa uca issqeddes it, minzi dayes i yareyyeḥ zi marra řxedmet d-ixřeq Arebbi.

D yina d inni d-itwařwen zeg ujenna d tmurt řami d twaxeřqent deg wass i igga SIDI Arebbi tamurt d ujenna. Uřa d ijj n uxeccab war tuɣi ɛad di tmurt niɣ d ijj n ufsu n iyyar war d iɣmi ɛad, minzi SIDI Arebbi war ijji anẓar ad iwwet ɛad x tmurt, war tuɣi din ɛad Adam, (bnadem), ḥima ad ixdem tammurt. Maca tgaɛɛed-d ict n tayut zi tmurt, tessu marra udem n tmurt. Xenni ikewwen-d SIDI Arebbi ‘Adam’ zi tɛejjact n ucař uca iṣuḍ řeɛwin n tudart di tinzart nnes. Ammu i idweř Adam d ij n buḥbeř iddaren.

Xenni iẓẓu SIDI Arebbi ij n jjennet jjihet n ccarq di Ɛadan uca issars din bnadem i yarcem (=ikewwen). Uca isseɣmi-d SIDI Arebbi zi tmurt kuř tacejjart, tecna i řxeẓrat u tmiẓit i macca, u isseɣmi-d tacejjart n tudart di řwesṭ n jjennet d tacejjart n tussna n řxar d řɣar.

U iffeɣ-d zi Ɛiden ij n yeɣzar ḥima ad issesuw jjennet, u senni ittemsebḍa x arebɛa n iqemmumen. Isem n yeɣzar amezwaru d Ficun i tuɣa innḍen marra tamurt n Ḥawila mani iǧa wureɣ. Aqqa ureɣ n tmurt nni iṣbeḥ. Aqqa din ɛawed řebxur n ssudan d weẓru n ‘ɛuniks’. Isem n yeɣzar wiss tnayen d Jihun i tuɣa d-innḍen i marra tammurt n Kuc. Uca isem n yeɣzar wiss třata d Ḥidiqqel (=Tigris) i issufuɣen ɣar ccarq n Accur. U iɣzar wiss arebɛa d Furat.

Xenni iksi SIDI Arebbi Adam uca issars it di jjennet n Ɛiden, hima ad tt ixdem u ad tt iḥḍa. SIDI Arebbi iweṣṣa bnadem, inna “Zi marra ticejjura n jjennet ad tecced macca, maca zi tcejjart n tussna n řxar d řɣar war ttetted ca zzayes, minzi mařa teccid zzayes řmewt i ɣa temted.”

Inna SIDI Arebbi “War iɛeddeř ad yiři Adam weḥdes. Ad as ggeɣ wi t i ɣa iɛawnen wi t i ɣa iřiqqen qibač nnes.” Uca igga SIDI Arebbi zeg ucař marra lḥayawanat n tmurt u marra ijḍaḍ n ujenna uca indeh iten ɣar Adam ḥima ad iẓar mammec ten i ɣa isemma. Mammec ten i ɣa isemma Adam kuř buḥbeř iddaren d wa d isem nnes. Igga Adam ismawen i marra řmař d ijḍaḍ n ujenna, u i marra řewḥuc n yiyyar, maca i Adam war itwifi wi t i ɣa iɛawnen wi t i ɣa iřiqqen qibač nnes. Issehwa-d SIDI Arebbi ij n iḍeṣ yuǧeɣ x Adam uca iṭṭeṣ, řexdenni iksi icten zi tɣezdisin nnes uca iqqen amcan sadu nnes s weysum. Yarra SIDI Arebbi taɣezdist nni i iksi zi Adam d tamɣart uca iwyi tt-id ɣar Adam. Inna Adam “Řexxu tanita aqqa-tt d iɣes zeg ixsan inu d aysum zeg weysum inu. Ad tetwasemma ‘taryazt’ (=tamɣart) minzi nettat tetwakkes-d zeg weryaz. S man aya ad yejj aryaz babas d yemmas, ad iqqen ɣar temɣart nnes, ad iřin d ijj n weysum (=arrimet/ddat).” U tuɣa-ten s tnayen idsen d iɛaryanen, Adam d temɣart nnes, war din ca řeḥya jar asen.