Řectab iqedsen dayes aṭṭas n imezruyen d řemtuř uca nzemmar ad zzaysen neřmed aṭtas tmesřayin. Tḥajit n Ibrahim u mammec tuɣa iqeddem mmis d taɣarṣt i Arebbi, aqqa-tt d ict n umezruy isbeḥ aṭṭas.

Ejj aneɣ ad nẓar mammec t yuran deg umezwaru n řectab iqedsen deg wedlis Amezwaru 22:2! Inna Arebbi i ibrahim: "Ksi řexxu mmic, ijjen nnec, mmic, wenni tettexsed, ruḥ ɣar tmurt n Muriya uca tqeddmed t din d taɣarṣt s tmessi i Arebbi x ijjen zeg idurar i d ac i ɣa iniɣ. "

Aqqa da Ibrahim, babas n Isḥaq wenni d ayenni n mmis n Ibrahim i tuɣa t ittraja aṭtas n řweqt ɛlaḥsab n řweɛd n Arebbi uca Ibrahim tuɣa ittexs Isḥaq aṭtas. Arrebi ittar zzayes maḥend ad iqeddem mmis d taɣarṣt. Ibrahim tuɣa ittegg as array nican. Iksi timessi d řmus iqḍeɛ akides u igga ikeccuḍen i tmessi x tiɣardin n Isḥaq uca ammu ruḥen nitni jmiɛ ɣar wemcan i tuɣa ineyyec it Arebbi. Xmi din wḍen nitni s tnayen, iqqen Ibrahim mmis x ikecwaḍ uca iksi řmus iqḍeɛ maḥend ad t iɣarṣ. Iban-d mliḥ belli Ibrahim tuɣa iṭtaɛ nican i Arebbi nnebřa řɛib. Xenni Arebbi war t ijji ad iɣarṣ i mmis Isḥaq ḥima war ittmetti ca. Di řectab iqedsen di tebrat i Iɛbraniyyen 11;19 nettaf belli Ibrahim “Tuɣa ixarreṣ belli Arebbi izemmar ɛawed ad t-id issnekkar zeg imettinen, zi manis t-id iksi ɣares ɛawed am ij n lmatal ." Ma war iǧi man aya d ij n lmatal d ameqqran n taɣraṣt iɣřan d tameqqrant x marra tiɣarṣin (=ddbayeḥ)!

Ƴar řexxu awařen i inna Yeccu Lmasiḥ maḥend ad tfehmed mliḥ řmeɛna n lmatal-a i iǧan deg umezruy n Ibrahim d mmis. Yeccu Lmasiḥ inna "Ammu ixs Arebbi ddunnit ař mani d iwca ayenni n Mmis ḥima kuř ijjen wenni zzayes i ɣa yamnen, war ittmetti ca maca ad ɣares tiři tudart n řebda. Minzi Arebbi war d issekk ca Mmis ɣar ddunnit ḥima ad iḥaseb ddunnit, maca issekk it-id ḥima ad zzayes issenjem ddunnit. Wenni zzayes i ɣa yamnen war ittetwaḥaseb ca, maca wenni war ittimnen ca aqqa itwaḥasab zi řexxu minzi netta war yumin ca deg yisem n uyenni n Mmis n Arebbi." (Linjil s ufus n Yuḥanna 3:16-18)

Wah, Arebbi Tbabat ittexs cek/cem ař iwca ayenni n Mmis i iweɛden zzayes zzic, ḥima wa - am tuɣa yarebbu ṣṣalib nnes - tuɣa iraḥ ɣar Juljuta (ij n tawrirt tudes-d n Urcalim), ɣar wemcan ineyyec it Arebbi d amcan n teɣraṣt. Aqqa-t d Mmis n Arebbi ikemmren qaɛ, aqqa itwaɛaqeb di ssibbet n ddnub nneɣ, waxxa amenni war dayes itwaf uřa d ijj n uxeṭtu. Ammu tuɣa iqeddem ixef nnes d ddebiḥet yarḍan i Arebbi u x xuyenni issnekkar it Arebbi zeg imettinen! Aqqa iddar, řexxu ass-a d řebda! S wa d s ddebiḥet nnes n yixef nnes i Arebbi, nkessi aɣfar i ddnub nneɣ d tudart n řebda! s liman zzayes!

"X uyenni mařa ḥed di Lmasiḥ i iǧa, aqqa netta itwaxřeq-d jdid,

xenni min iǧan d aqdim iɛdu,

xẓar, aqqa marra idweř d jdid. (2 Cor. 5:17)