ؤُرْشَالِيمْ ن جْذِيذْ
21
1 أَوَارْنِي أَسْ ژْرِيغْ إِجّْ ن ؤُجنَّا ن جْذِيذْ ذ إِجّْ ن ثمُّورْثْ ن جْذِيذْ، مَاغَارْ أَجنَّا أَمزْوَارُو ذ ثمُّورْثْ ثَامزْوَارُوثْ ثُوغَا عْذُونْ، ڒبْحَارْ وَارْ إِقِّيمْ عَاذْ. ▪ 2 نشّْ ژْرِيغْ ثَانْذِينْثْ إِقدّْسنْ، ؤُرْشَالِيمْ ن جْذِيذْ، ثهْوَا-د زڭْ ؤُجنَّا زِي أَرنْذَاذْ أَربِّي، ثڭَّا أَمشْنَاوْ ثَاسْڒِيثْ إِزهّْجنْ إِ وسْڒِي. ▪ 3 ؤُشَا سْڒِيغْ إِشْثْ ن ثْمِيجَّا ثتّْڒَاغَا-د زڭْ ؤُجنَّا س جّهْذْ: ”خْژَارْ، أَقِيضُونْ ن أَربِّي أَقَا-ت جَارْ إِوْذَانْ،
ؤُشَا نتَّا أَذْ غَارْسنْ إِزْذغْ.
نِيثْنِي أَذْ إِڒِينْ ذ ڒْڭنْسْ نّسْ،
ؤُشَا أَربِّي سِيمَانْثْ نّسْ أَذْ غَارْسنْ يِيڒِي،
ؤُشَا أَذْ يِيڒِي ذ أَربِّي نْسنْ. ▪
4 أَذْ أَسنْ إِسِّيژغْ كُوڒْ إِمطَّا زِي ثِيطَّاوِينْ نْسنْ،
ؤُشَا ڒْموْثْ ذ وشْضَانْ ذ ؤُشثْشِي ذ ڒحْرِيقْ،
وَارْ تِّيڒِينْ عَاذْ، س سِّيبّثْ نّسْ.“ ▪
5 ؤُ خْمِي ڭُّورغْ، إِنَّا ونِّي إِقِّيمنْ خْ ڒْعَارْشْ:
”خْژَارْ، أَذْ ڭّغْ مَارَّا ذ جْذِيذْ !“
ؤُشَا إِنَّا أَيِي:
”أَرِي: أَوَاڒنْ-أَ أَقَا ذَايْسنْ ڒَامَانْ ذ ثِيذتّْ.“ ▪
6 نتَّا إِنَّا أَيِي:
”أَقَا إِتّْوَاكمّڒْ.
نشّْ ذ أَلِيفْ ذ ثَاوْ،
نشّْ ذ بدُّو ذ أَكمّڒْ.
ونِّي إِفُّوذنْ أَذْ أَسْ وْشغْ أَذْ إِسُو بَاطڒْ،
زِي ڒْعُونْصَارْ ن وَامَانْ ن ثُوذَارْثْ. ▪
7 وِي إِ غَا إِغلّْبنْ أَذْ إِوَارْثْ مَانْ أَيَا،
ؤُشَا نشّْ أَذْ إِڒِيغْ ذ أَربِّي نّسْ،
ؤُ نتَّا أَذْ يِيڒِي ذ مِّي. ▪
8 مَاشَا إِنِّي إِتّْشكَّانْ، ذ لْكُوفَّارْ، ذ إِعفَّاننْ،
ذ إِمخْمَاجْ، ذ إِقتَّاڒنْ، ذ ينِّي إِڭِّينْ ثَاسحَّارْثْ،
ذ أَيْثْ ن فَارْقْ-شّْغڒْ ذ ينِّي إِعبّْذنْ لْ-أَصْنَامْ
ذ مَارَّا أَيْثْ ن بُو-إِخَارِّيقنْ،
أَذْ ثِيڒِي ثسْغَارْثْ نْسنْ ذڭْ ؤُيڒْمَامْ إِتّْشفْشُوفنْ
س ثْمسِّي ذ ڒشْبَاريّثْ،
ثَا ذ ڒْموْثْ وِيسّْ ثْنَاينْ.“ ▪
ؤُرْشَالِيمْ ن جْذِيذْ
9 ؤُشَا يُوسَا-د إِجّنْ زِي سبْعَا ن لْمَالَاكَاثْ ثِينِّي غَارْسنْثْ سبْعَا ن طَّاوْيَاثْ شُّورنْثْ س سبْعَا ن جّْرَايحْ ثِينڭُّورَا، ؤُشَا إِسِّيوڒْ أَكِيذِي، إِنَّا:
”أَسْ-د، أَذْ أَشْ سّشْنغْ ثَاسْڒِيثْ، ثَامْغَارْثْ ن يزْمَارْ.“ ▪
10 إِنْذهْ أَيِي ذِي أَرُّوحْ غَارْ إِجّْ ن وذْرَارْ ذ أَمقّْرَانْ يُوعْڒَانْ أَطَّاسْ ؤُشَا إِسّْشنْ أَيِي ثَانْذِينْثْ إِقدّْسنْ، ؤُرْشَالِيمْ، أَمْ د-ثهْوَا زڭْ ؤُجنَّا، زِي زَّاثْ ن أَربِّي، ▪
11 أَمْ غَارسْ إِدْجْ ؤُعُودْجِي ن أَربِّي، ؤُشَا طّْيَا نّسْ ثتِّيسِّيقْ أَمشْنَاوْ أَژْرُو إِغْڒَانْ أَطَّاسْ، أَمْ وژْرُو ن يَاسْبِيسْ نِّي د-إِضْهَارنْ أَمْ ؤُكْرِيسْثَالْ.
12 إِقُووَّارْ أَسْ د إِجّْ ن وغْبَارْ ذ أَمقّْرَانْ يُوعْڒَا غَارسْ ثنْعَاشْ ن ثوُّورَا ؤُ ثنْعَاشْ ن لْمَالَاكَاثْ ثُوغَا تّْبدَّانْثْ غَارْ ثِيوُّورَا، ؤُ تّْوَارِينْ خَاسنْثْ إِسْمَاونْ، أَقَا إِسْمَاونْ ن ثنْعَاشْ ن ثْقبَّاڒْ ن أَيْثْ ن إِسْرَائِيل.
13 أَقَا ذِينْ ثْڒَاثَا ن ثوُّورَا غَارْ مَانِيسْ ذ ثْنقَّارْ ثْفُوشْثْ ؤُ غَارْ شَّامَالْ ثْڒَاثَا ن ثوُّورَا ؤُ غَارْ لْجَانُوبْ ثْڒَاثَا ن ثوُّورَا ؤُ أَقَا ذِينْ ثْڒَاثَا ن ثوُّورَا غَارْ مَانِي ثْغدْجِي ثْفُوشْثْ.
14 أَغْبَارْ ن ثنْذِينْثْ إِبدّْ خْ ثنْعَاشْ ن ذْسُوسَا تّْوَارِينْ خَاسنْ ثنْعَاشْ ن إِسْمَاونْ ن رُّوسُولْ ن ثْممِّيثْ. ▫ ▪
15 ذ ونِّي ثُوغَا أَكِيذِي إِسَّاوَاڒنْ، غَارسْ إِجّْ ن ؤُغَانِيمْ ن ڒعْبَارْ حِيمَا أَذْ زَّايسْ إِعْبَارْ ثَانْذِينْثْ ذ وغْبَارْ نّسْ. ▪
16 ثَانْذِينْثْ ثُوغَا غَارسْ أَربْعَا ن ثْغمُّورَا ؤُ ثَازُوڭَّارْثْ نّسْ أَمْ ثِيرُو نّسْ. نتَّا إِعْبَارْ ثَانْذِينْثْ س ؤُغَانِيمْ نّسْ ن ڒعْبَارْ. ثُوغَا ثَازُوڭَّارْثْ نّسْ ثنْعَاشْ-أَڒفْ ن ’إِسْثَاذِييّنْ‘، عْڒَاحَاڒْ أَڒْفَاينْ ؤُ مِيثَاينْ كِيلُومِيثْرْ. ثِيرُو نّسْ ذ ڒُوعْڒَا نّسْ ذ إِشْثنْ.
17 إِعْبَارْ أَغْبَارْ نّسْ: مْيَا ؤُ-أَربْعَا ؤُ-أَربْعِينْ ن إِغَادْجنْ، أَقَا-ث ذ ڒْقدّْ ن إِجّْ ن بْنَاذمْ، أَقَا-ث ن لْمَالَاكْ.
18 أَغْبَارْ نّسْ ڭِّينْ ث س يَاسْبِيسْ، ؤُ ثَانْذِينْثْ ڭِّينْثْ س ؤُرغْ إِصْفَانْ، إِتّْبَانْ أَمْ زَّاجْ إِصْفَانْ.
19 ذْسُوسَا ن وغْبَارْ ن ثنْذِينْثْ ثُوغَا تّْوَازوّْقنْ كُوڒْشِي س إِژْرَا إِغْڒَانْ. ثُوغَا ذْسَاسْ أَمزْوَارُو ن وژْرُو ن يَاسْبِيسْ، ونِّي وِيسّْ ثْنَاينْ ن صَافِّيرْ، ونِّي وِيسّْ ثْڒَاثَا ن خَالْشِيذُونْ ذ أَشمْڒَاڒْ، ونِّي وِيسّْ أَربْعَا ن سْمِيرَالْذَا، 20 ونِّي ذ وِيسّْ خمْسَا ن سَارْذُونِيكْسْ، ونِّي وِيسّْ ستَّا ن سَارْذِييُوسْ، ونِّي وِيسّْ سبْعَا ن وژْرُو ن وُورغْ قَّارنْ أَسْ ’كْرِيسُولِيثْ‘، ونِّي وِيسّْ ثْمنْيَا ن بِيرِيلْ، ونِّي وِيسّْ ثسْعَا ن ثُوبَاسْ، ونِّي وِيسّْ عشْرَا ن كْرِيسُوبْرَاسْ، ونِّي وِيسّْ حِيطَاشْ ن يَازِينْثْ ؤُشَا ونِّي وِيسّْ ثنْعَاشْ ن ؤُمثِيسْثْ. ▫ 21 ثنْعَاشْ ن ثوُّورَا ذ ثنْعَاشْ ن ثْيَاقُوثِينْ، إِشْثْ إِشْثْ. كُوڒْ إِشْثنْ زِي ثوُّورَا نِّي ثُوغَا زڭْ إِشْثْ ن ثْيَاقُوثْ. مَاشَا أَبْرِيذْ ن ثنْذِينْثْ ثُوغَا-ث ن وُورغْ إِصْفَانْ، أَمْ زَّاجْ إِصْفَانْ.
22 وَارْ ژْرِيغْ شَا زَّاوشْثْ ذَايسْ مِينْزِي سِيذِي أَربِّي، أَمْزمَّارْ خْ كُوڒْشِي، نتَّا سِيمَانْثْ نّسْ ذ زَّاوشْثْ نّسْ. 23 إِزْمَارْ ذ ثنْذِينْثْ وَارْ حْذَاجنْ شَا ثْفُوشْثْ ؤُڒَا ذ ثَازِيرِي حِيمَا أَذْ خَاسْ سَّارْغنْثْ، مِينْزِي أَعُودْجِي ن أَربِّي يَارقّْ ذَايسْ ؤُشَا إِزْمَارْ ذ ڒفْنَارْ نّسْ. ▪ 24 ؤُشَا ڒڭْنُوسْ أَذْ ؤُيُورنْ س ثْفَاوْثْ نّسْ ؤُشَا إِجدْجِيذنْ ن ثمُّورْثْ أَذْ غَارسْ سِّيذْفنْ أَعُودْجِي. ▪ 25 ثِيوُّورَا نّسْ وَارْ تّْوَاقّْننْثْ عمَّارْصْ س ؤُزِيڒْ، مِينْزِي دْجِيڒثْ وَارْ ثتّْغِيمِي شَا ذِينْ. ▪ 26 نِيثْنِي أَذْ أَوْينْ أَعُودْجِي ذ شَّانْ ن ڒڭْنُوسْ. 27 عمَّارْصْ أَذْ ذَايسْ ثَاذفْ شَا ن ڒْحَاجّثْ ثَامنْڭُوسْثْ نِيغْ ونِّي إِڭِّينْ نّْعَاوَاثْ نِيغْ ونِّي إِسّْخَارِّيقنْ، مَاشَا إِنِّي إِتّْوَارِينْ ذڭْ وذْلِيسْ ن يزْمَارْ وَاهَا. ▪