مَا إِتّْوَابْضڒْ ڒْْعَاهْذْ أَقْذِيمْ؟
ڒْعَاهْذْ أَقْذِيمْ ذ ڒْْعَاهْذْ أَجْذِيذْ نِيثْنِي ذ إِجّْ ن وذْلِيسْ ؤُ نِيثْنِي س ثْنَاينْ سدْجْحنْ ؤُ سَّاوَاڒنْ خْ يَاسُوع لْمَاسِيحْ، وَارْ إِدْجِي ڒْْعَاهْذْ ن جْذِيذْ (لْ'إِنْجِيلْ) وَاهَا.
ذِي ڒخْبَارْ أَصبْحَانْ س ؤُفُوسْ ن لُوقَا 24:13- 27 نتَّافْ أَقَا لْمَاسِيحْ إِسَّاوَاڒْ أَكْ-ذ شَا ن إِمحْضَارنْ نّسْ أَوَارْنِي ڒَْامِي د-إِتّْوَاسْنكَّارْ-د زِي ڒْْموْثْ. لْمَاسِيحْ ثُوغَا إِسَّاوَاڒْ أَكِيذْسنْ خْ ڒْْموْثْ نّسْ خْ صَّالِيبْ، إِنَّا أَسنْ: ” 'أَ إِفْغَاڒْ، أَ إِنضْقَاڒْ ن وُوڒْ ذِي لِيمَانْ س مَارَّا مِينْ سِّيوْڒنْ إِنَابِييّنْ! مَا وَارْ إِتّْخصِّي أَذْ إِودّبْ لْمَاسِيحْ أَمُّو ؤُشَا أَذْ يَاذفْ غَارْ ؤُعُودْجِي نّسْ؟' خنِّي إِبْذَا زِي مُوسَا ؤُ زِي مَارَّا إِنَابِييّنْ، إِتّْفسَّارْ أَسنْ مِينْ خَاسْ يُورَانْ ذِي مَارَّا إِذْلِيسنْ.""
نَارْشمْ أَستّرْ أَنڭَّارْ س ؤُزڭّْوَاغْ، مَاغَارْ إِسّْبيّنْ أَنغْ مْلِيحْ مَامّشْ إِذْلِيسنْ ن مُوسَا ؤُ ن إِنَابِييّنْ شهّْذنْ خْ لْمَاسِيحْ. خَارّصْ مْغِيرْ ذڭْ ؤُمزْرُويْ ن ؤُوهّبْ ن إِسْحَاقْ، مِّيسْ ن إِبْرَاهِيمْ، إِ وَارْ إِثْوَاغَارْصنْ مَاغَارْ أَربِّي إِوْشَا أَسْ إِجّْ ن إِشَارِّي ذڭْ ومْشَانْ ن مِّيسْ! مَا ثژْرِيذْ مِينْ إِخْسْ أَذْ يِينِي "إِزْمَارْ ن أَربِّي"؟ أَقَا-ث ذ يَاسُوع لْمَاسِيحْ.
أَقَا ذِينْ إِشْثْ ن ڒْْقدّْ ن إِبْرِيذنْ إِ خفْ إِشْهذْ ڒْْعَاهْذْ أَقْذِيمْ (إِ ثُوغَا إِدْجَانْ قْبڒْ مَّا أَذْ د-إِتّْوَاخْڒقْ يَاسُوع زِي مَارْيَامْ) خْ يَاسُوع لْمَاسِيحْ ونِّي وَارْ د-يُوسِي عَاذْ غَارْ دُّونِيثْ ذڭْ وُوسَّانْ نِّي! أَوَاڒْ 'ڒْْعَاهْذْ أَقْذِيمْ' وَارْ إِخْسْ أَذْ يِينِي أَقَا ڒْْمعْنَا نّسْ وَارْ إِقِّيمْ أَذْ خَاكْ ثتّشْڒذْ نِيغْ وَارْ إِسقّْوَا عَاذْ غَارْ ڒْْمُومِينِينْ. أَوَارْ 'ڒْْعَاهْذْ' إِتّْخصَّا أَذْ إِثْوَاعْقَاڒْ أَمْ 'ڒْْعَاهْذْ' ( نِيغْ 'كْoنْثْرَاثَا') جَارْ أَربِّي ذ بْنَاذمْ. ڒْْعَاهْذْ أَقْذِيمْ إِسّْبيَّانْ ڒْْعَاهْذْ ن أَربِّي أَكْ-ذ مُوسَا ذ إِسْرَايِيلْ إِ إِتّْخصَّا أَذْ ضْفَارنْ ؤُ أَذْ طَاعنْ أَيْثْ ن إِسْرَايِيلْ. تَّاوْرَاثْ (=أَسڒْمذْ ذ شَّارِيعَا) ن أَربِّي إِمّوْشْ إِ مُوسَا ذڭْ وذْرَارْ. إِوَا أَقَّا مَانْ أَيَا ذ إِشْثْ ن كُونْثْرَاثَا ذ ثَاقْذِيمْثْ نِيغْ أَقَا-ت ذ ڒْْعَاهْذْ ذ أَقْذِيمْ.
ڒْعَاهْذْ أَجْذِيذْ إِسَّاوَاڒْ خْ مِينْ إِعْنَا لْمَاسِيحْ نِّي د-إِتّْوَاخڒْقنْ زِي ثعْزَارشْثْ مَارْيَامْ س أَرُّوحْ إِقدّْسنْ ؤُ خْ مَامّشْ ث ثُوغَا إِڭُّورْ ؤُ إِسّڒْمَاذْ ذِي ثمُّورْثْ ن إِسْرَايِيلْ ؤُ خْ مَامّشْ إِذْوڒْ ذْ ثِيذتّْ "إِزْمَارْ ن أَربِّي" ؤُمِي إِمُّوثْ خْ صَّالِيبْ ؤُ خْ ثْنُوكْرَا نّسْ زِي جَارْ إِمتِّيننْ ؤُ خْ مَامّشْ إِمّكْسِي غَارْ ؤُجنَّا ؤُ خْ ثْوَاسِيثْ نّسْ وِيسّْ ثْنَاينْ ؤُ خْ مَامّشْ إِ ذ أَنغْ إِتّْخصَّا أَذْ ندَّارْ إِ ؤُرَاجِي ن وذْوَارْ نّسْ!
إِوْذَانْ ن إِسْرَايِيلْ وَارْ كمّْڒنْ أَوَاڒْ نْسنْ مَاحنْذْ أَذْ ضْفَارنْ ؤُ أَذْ طَاعنْ تَّاوْرَاثْ. تَّاوْرَاثْ ثُوغَا-ت مْلِيحْ ؤُ ڒْْعَاهْذْ أَقْذِيمْ عَاوذْ مْلِيحْ، مَاشَا إِوْذَانْ فشْڒنْ مَاحنْذْ أَذْ أَوْضنْ غَارْ مِينْ إِسْذَاهدْجنْ أَمُورْ أَوَارْنِي أَمُورْ زِي سِّيبّثْ ن وُوڒْ نْسنْ أَعفَّانْ.
لِينْجِيلْ إِسّڒْمَاذْ أَنغْ بلِّي مَارَّا إِوْذَانْ عْصَانْ ؤُ خْضَانْ خْ أَربِّي، وَارْ إِدْجِي وُوذَاينْ وَاهَا. مَارَّا إِوْذَانْ زِي مَارَّا ڒڭْنُوسْ خْضَانْ ؤُ عْصَانْ، زِي أَذَامْ أَڒْ ڒخُّو، وَارْ زمَّارنْ أَذْ أَرْضَانْ أَربِّي. س وَاوَاڒْ نّضْنِي ڒْْعَاهْذْ أَقْذِيمْ إِتَّاوِي غَارْ ڒْْموْثْ زِي سِّيبّثْ ن ؤُخطُّو. لْ'إِنْجِيلْ إِقَّارْ أَقَا ڒخْڒَاصْ ن ؤُخطُّو، أَقَا-ث ذ ڒْْموْثْ (إِرُومَانِييّنْ 3.23)
سْ لِيمَانْ وَارْ إِدْجِي س ڒخْذَايمْ عْلَاحْسَابْ شَّارِيعَا؟
أجّْ أَنغْ أَذْ نحْمذْ أَربِّي إِ ثُوغَا إِبْنَانْ إِجّْ ن ڒْْعَاهْذْ نِيغْ إِشْثْ ن لْعَالَاقَا أَكْ-ذ إِبْرَاهَامْ س لِيمَانْ قْبڒْ مَّا إِڭَّا ڒْْعَاهْذْ أَكْ-ذ مُوسَا. أَقَا نقَّارْ ذِي لْ'إِنْجِيلْ ذڭْ إِشْثْ ن ثبْرَاثْ ن ؤُمَازَانْ بُولُوسْ إِ ڒْْمُومِينِينْ ن ڭَالَاطِييَا (ؤُمِي قَّارنْ ڒخُّو ثُورْكِييَا، مَانِي ثُوغَا عَاذْ وَارْ زدّْغنْ إِثُورْكِييّنْ ذِي ڒْْوقْثْ نِّي) :
"أَ إِڭَالَاطِييّنْ إِفْغَاڒْ، وِي كنِّيوْ إِقدّْشنْ مَاحنْذْ وَارْ ثطِّيعمْ إِ ثِيذتّْ؟ أَقَّا لْمَاسِيحْ ثُوغَا إِثْوَارْشمْ جَارَاومْ قِيبَاتْشْ إِ ثِيطَّاوِينْ أَمْ ونِّي إِمُّوثنْ خْ صَّالِيبْ. ذڭَّا وَاهَا خْسغْ أَذْ ث سّْنغْ زَّايْومْ، مَا ثطّْفمْ أَرُّوحْ س ڒخْذَايمْ ن تَّاوْرَاثْ نِيغْ ؤُمِي ثسْڒَامْ س لِيمَانْ؟ مَا أَمنِّي ذ إِفْغَاڒْ إِ ثدْجَامْ؟ ثبْذَامْ س أَرُّوحْ، مَا ڒخُّو أَذْ ثْكمّْڒمْ س ويْسُومْ؟ مَا ثژْرِيمْ ثَامَارَا أَطَّاسْ خْ وَالُو، مَاڒَا ثُوغَا س ثِيذتّْ خْ وَالُو؟ ونِّي ذ أَومْ إِوْشِينْ أَرُّوحْ ؤُشَا إِتّڭّْ ڒعْجَايبْ جَارَاومْ، مَا إِتّڭّْ إِثنْثْ زِي ڒخْذَايمْ ن شَّارِيعَا نِيغْ ؤُمِي ثسْڒَامْ س لِيمَانْ، أَمْ مَامّشْ ثُوغَا إِبْرَاهِيمْ 'يُومنْ ذِي أَربِّي ؤُشَا إِثْوَاحْسبْ أَسْ-د ذ ثَاسڭْذَا'. سّْنمْ أَيَا، بلِّي إِنِّي إِدْجَانْ ن لِيمَانْ، نِيثْنِي ذ أَيْثْ ن إِبْرَاهِيمْ. أَذْلِيسْ ثُوغَا إِژْرَا قْبڒْ بلِّي أَربِّي أَذْ إِسڭّذْ ڒڭْنُوسْ س لِيمَانْ، إِزَّارْ إِبشَّارْ إِ إِبْرَاهِيمْ، إِنَّا 'ذَايكْ إِ غَا ثْوَابَارْكنْ ڒڭْنُوسْ مَارَّا.' خنِّي إِنِّي ن لِيمَانْ أَذْ ثْوَابَارْكنْ أَكْ-ذ ڒْْمُومنْ إِبْرَاهِيمْ. مَارَّا إِنِّي إِدْجَانْ زِي ڒخْذَايمْ ن شّْرَا إِعَا، أَقَا نِيثْنِي سَاذُو نّعْڒثْ، مِينْزِي ثُورَا
'ذ أَمنْعُوڒْ كُوڒْ إِجّنْ ونِّي وَارْ إِقِّيمنْ إِطّفْ ذِي مَارَّا ثِيمسْڒَايِينْ يُورَانْ ذڭْ وذْلِيسْ ن شَّارِيعَا (= تَّاوْرَاثْ) حِيمَا أَذْ ثنْثْ إِڭّْ.'
أَقَا إِتّْبَانْ ڒخُّو أَقَا وَارْ ذِينْ حذْ إِ غَا إِثْوَاسڭّْذنْ غَارْ أَربِّي س ڒخْذَايمْ ن شَّارِيعَا ن تَّاوْرَاثْ، مِينْزِي ثُورَا:
'أَمْسڭَّاذْ س لِيمَانْ أَذْ إِدَّارْ.' "
خنِّي إِنِّي ن لِيمَانْ أَذْ ثْوَابَارْكنْ أَكْ-ذ ڒْْمُومنْ إِبْرَاهِيمْ." (ثَابْرَاثْ إِ إِڭَالَاطِييّنْ 3:1-9)
خنِّي نسّنْ أَقَا تَّاوْرَاثْ وَارْ ثسِّيذفْ شَا بْنَاذمْ غَارْ ثْسڭْذَا ذ ثُوذَارْثْ س لِيمَانْ، مَاشَا ”بْنَاذمْ ونِّي ثنْثْ إِتّڭّنْ، أَذْ إِدَّارْ زَّايْسنْثْ (زِي ڒخْذَايمْ ن شَّارِيعَا ن تَّاوْرَاثْ)"، إِخْسْ أَذْ يِينِي س ڒخْذَايمْ وَاهَا. زِي جِّيهثْ ن شَّارِيعَا ن أَربِّي أَقَا-نغْ مَارَّا ذ إِمذْنَابْ أَمْ أَذَامْ. مَاشَا لْمَاسِيحْ أَقَا إِخدْجصْ خَانغْ، حِيمَا أَذْ أَنغْ إِفكّْ زِي نّعْڒثْ نِّي إِدْجَانْ خْ ينِّي سَاذُو تَّاوْرَاثْ ؤُ سَاذُو دّنْبْ، أَمْ نتَّا إِذْوڒْ خَانغْ ذ أَمنْعُوڒْ - مِينْزِي ثُورَا ”ذ أَمنْعُوڒْ مَانْ ونْ مَّا يُويْڒنْ خْ ثحْنَاشْثْ“ - حِيمَا لْبَارَاكَا ن إِبْرَاهِيمْ أَذْ ثَاوضْ غَارْ ڒڭْنُوسْ س لِيمَانْ ذِي يَاسُوع لْمَاسِيحْ مَاحنْذْ مَارَّا أَذْ طّْفنْ لْوَاعْذْ ن أَرُّوحْ س لِيمَانْ أَمْ مَامّشْ ث إِطّفْ ؤُڒَا ذ إِبْرَاهِيمْ.(ثَابْرَاثْ إِ إِڭَالَاطِييّنْ 3:10-14)
شَّارِيعَا ذ لْوَاعْذْ
"أَ أَوْمَاثنْ، سَّاوَاڒغْ أَمْ بْنَاذمْ، ؤُڒَا ذ ڒْْعَاهْذْ إِ إِدْجَانْ زِي بْنَاذمْ، أَوَارْنِي ڒَْامِي إِثْوَاخْثمْ، ؤُڒَا ذ إِجّْ وَارْ إِزمَّارْ أَذْ ث إِبْضڒْ نِيغْ أَذْ خَاسْ يَارْنِي. أَقَا لْوُوعُوذْ ثْوَاڭّنْ إِ إِبْرَاهِيمْ ذ زَّارِيعثْ نّسْ. وَارْ إِقَّارْ شَا ”إِ إِعقَّاينْ ن زَّارِيعثْ“ أَمْ إِ وَاطَّاسْ، مَاشَا أَمْ إِ يِيجّنْ ”إِ ؤُعقَّا ن زَّارِيعثْ نّكْ“ ونِّي أَقَا-ث ذ لْمَاسِيحْ. ذڭَّا قَّارغْ: ڒْْعَاهْذْ ونِّي إِقدَّارْ أَربِّي إِ لْمَاسِيحْ، وَارْ ث ثْبطِّيڒْ شَا شَّارِيعَا ثنِّي ثُوسَا-د أَرْبعْمْيَا ؤُ ثْڒَاثِينْ ن إِسڭّْوُوسَا أَوَارْنِي مَانْ أَيَا أَڒَامِي ثْزمَّارْ أَذْ ثڭّْ لْوَاعْذْ إِخْوَانْ. مِينْزِي مَاڒَا ڒْْوَارْثْ إِدْجْ س شَّارِيعَا ن تَّاوْرَاثْ، أَقَا وَارْ إِدْجِي عَاذْ س لْوَاعْذْ. مَاشَا أَربِّي أَقَا إِوْشَا إِثْ إِ إِبْرَاهِيمْ س لْوَاعْذْ.
خنِّي ؤُمِي ثْنفّعْ تَّاوْرَاثْ؟ أَقَا ثثْوَامَّارْنِي خْ سِّيبّثْ ن دّْنُوبْ أَڒَامِي د-ثُوسَا زَّارِيعثْ ثنِّي ؤُمِي إِثْوَاڭّْ لْوَاعْذْ ؤُشَا لْمَالَاكَاثْ وْشِينْثْ ت ذڭْ ؤُفُوسْ ن يِيجّْ ن ؤُمْسصْڒَاحْ. أَقَا ونِّي ذ أَمْسصْڒَاحْ وَارْ إِدْجِي زڭْ إِجّنْ، مَاشَا أَربِّي ذ إِجّنْ.
مَا خنِّي شَّارِيعَا ن ثَاوْرَاثْ ضِيدّْ إِ لْوُوعُوذْ ن أَربِّي؟عمَّارْصْ! مِينْزِي مَاڒَا ثُوغَا ثمّوْشْ إِشْثْ ن تَّاوْرَاثْ ثْزمَّارْ أَذْ ثسّدَّارْ، ذ ثِيذتّْ ثُوغَا ثَاسڭْذَا س تَّاوْرَاثْ. مَاشَا أَذْلِيسْ (ن تَّاوْرَاثْ) إِبلّعْ خْ مَارَّا ذِي دّْنُوبْ، حِيمَا ڒْْوَاعْذْ أَذْ إِمّوْشْ س لِيمَانْ ذِي يَاسُوع لْمَاسِيحْ إِ يِينِّي يُومْننْ .
مَاشَا قْبڒْ مَّا أَذْ د-يَاسْ لِيمَانْ، ثُوغَا-نغْ نمّحْضَا ذِي تَّاوْرَاثْ ؤُشَا إِثْوَابلّعْ خَانغْ زَّايسْ أَڒَامِي د-يُوسَا لِيمَانْ ونِّي ثُوغَا إِ غَا إِضْهَارنْ. مَاشَا ؤُمِي د-يُوسَا لِيمَانْ، أَقَّا وَارْ نقِّيمْ عَاذْ سَاذُو ونِّي إِتَّاربَّانْ." (ثَابْرَاثْ إِ إِڭَالَاطِييّنْ 3:15-25)
أَيْثْ ن أَربِّي
مِينْزِي مَارَّا كنِّيوْ ذ أَيْثْ ن أَربِّي س لِيمَانْ ذِي لْمَاسِيحْ يَاسُوع. مِينْزِي مَارَّا إِنِّي إِثْوَاسّْغضْصنْ ذِي لْمَاسِيحْ، أَقَا أَرْضنْ لْمَاسِيحْ. وَارْ ذِينْ ؤُذَايْ نِيغْ أَيُونَانِي نِيغْ إِسْمغْ ؤُڒَا ذ أَحُورِّي، وَارْ ذِينْ أَرْيَازْ ؤُڒَا ذ ثَامْغَارْثْ ، مِينْزِي مَارَّا نشِّينْ ذ إِجّنْ إِ ندْجْ ذِي لْمَاسِيحْ يَاسُوع. مَاڒَا كنِّيوْ ثدْجَامْ ن لْمَاسِيحْ، أَقَّا كنِّيوْ ذ زَّارِيعثْ ن إِبْرَاهِيمْ ؤُشَا عْلَاحْسَابْ ڒْْوَاعْذْ ذ إِوْرِيثنْ."(ثَابْرَاثْ إِ إِڭَالَاطِييّنْ 3:26-29)
سْ ؤُينِّي نژْرَا أَقَا ثُوذَارْثْ ذ ثْسڭْذَا وَارْ دْجِينْ شَا س تَّاوْرَاثْ، مَاشَا س لْوَاعْذْ ؤُ س لِيمَانْ ذَايْسْ، إِخْسْ أَذْ يِينِي ذِي لْمَاسِيحْ إِ خفْ ثُوغَا إِسَّاوَاڒْ لْوَاعْذْ إِ إِبْرَاهِيمْ. لْوَاعْذْ إِتّْخصَّا أَذْ أَنغْ إِسَّارْغْ لِيمَانْ ذِي أَربِّي. أَكمّڒْ ن لْوَاعْذْ ن أَربِّي إِ إِبْرَاهَامْ ذ يَاسُوع لْمَاسِيحْ، ونِّي إِكْسِينْ أَمْشَانْ ن إِسْحَاقْ، مِّيسْ ن إِبْرَاهِيمْ، ؤُمِي إِثْوَاصلّبْ خْ صَّالِيبْ إِ دّنْبْ نّغْ إِ وصْڒحْ جَارْ أَربِّي ذ بْنَاذمْ! نتَّا ذ إِزْمَارْ ن أَربِّي إِ إِكّْسِينْ دّنْبْ خْ دُّونِيثْ إِ كُوڒْ إِجّنْ ونِّي زَّايسْ إِتَّامْننْ.
ذِي يَاسُوع لْمَاسِيحْ غَارْنغْ إِجّْ ن ڒْْعَاهْذْ أَكْ-ذ أَربِّي إِ ذ أَنغْ-د إِوْينْ ثُوذَارْثْ س لِيمَانْ ذِي يَاسُوع لْمَاسِيحْ. ذَايسْ نثْوَاعَاهذْ س ثُوذَارْثْ ن ڒبْذَا. ڒْْعَاهْذْ-أَ ثُوغَا إِبْذَا أَذْ يِيڒِي قْبڒْ أَذْ إِتّْوَاڭّْ ؤُجنَّا ذ ؤُمَاضَالْ ذڭْ وُوڒْ ذ ڒْْخَاضَارْ ن أَربِّي. تَّاوْرَاثْ ن مُوسَا وَارْ ث ثْخَالفْ شَا. شَّارِيعَا ن تَّاوْرَاثْ إِبَانْ-ذ أَقَا ثُوغَا نخْضَا كْثَارْ زڭْ وَامِي ثُوغَا-نغْ بْڒَا شَّارِيعَا ن تَّاوْرَاثْ، مَاغَارْ إِسْرَايِيلْ وَارْ إِضْفَارْ شَا شَّارِيعَا ن أَربِّي، أَمْ مَارَّا ڒڭْنُوسْ وَارْ ضْفَارنْ شَا شَّارِيعَا ن أَربِّي إِ إِدْجَانْ ذڭْ وُوڒْ نْسنْ.
إِنَّا يَاسُوع خْ ڒْْموْثْ نّسْ ذِي ڒخْبَارْ أَصبْحَانْ س ؤُفُوسْ ن يُوحَانَّا 12:24
"س ثِيذتّْ، س ثِيذتّْ، أَذْ أَومْ إِنِيغْ، مَاڒَا وَارْ د-إِوْضِي ڒْْحبّْ ن يِيرْذنْ ذِي ثمُّورْثْ ؤُشَا أَذْ إِمّثْ،
خنِّي أَذْ إِقِّيمْ وحْذسْ، مَاشَا مَاڒَا إِمُّوثْ، خنِّي أَذْ د-ثَاوْيِي ڒْْغِيدْجثْ أَطَّاسْ."
سْ صَّالِيبْ نّسْ إِسّْبعّذْ لْمَاسِيحْ خَانغْ دّنْبْ (بْنَاذمْ أَقْذِيمْ، إِخْسْ أَذْ يِينِي 'بْنَاذمْ أَمذْنُوبْ' إِ وَارْ إِنفّْعنْ إِ أَربِّي) ؤُشَا إِذْوڒْ غَارْسْ ڒْْغِيدْجثْ كُوڒْ ثْوَاڒَا إِجّْ ن بْنَاذمْ إِتّڭّْ أَثشْڒِي نّسْ خَاسْ. مَاڒَا نتّْتْشْ أڒْ خْ لْمَاسِيحْ خنِّي بْنَاذمْ أَقْذِيمْ إِ إِدْجَانْ ذَايْنغْ غَارْ ذَاخرْ أَذْ إِوَانْضڒْ أَكْ-ذ يَاسُوع لْمَاسِيحْ ذڭْ ونْضڒْ نّسْ حِيمَا أَذْ نثْوَاسّْنكَّارْ عَاوذْ أَكِيذسْ ؤُشَا أَذْ نبْذَا ثُوذَارْثْ ذ جْذِيذْ س لِيمَانْ ذَايْسْ.