مِينْ إِقَّارْ وذْلِيسْ إِقدّْسنْ خْ ڒمْڒَاشْ؟

ذڭْ وذْلِيسْ أَمزْوَارُو (أَذْلِيسْ وِيسّْ أَمزْوَارُو ن وذْلِيسْ إِقدّْسنْ) نقَّارْ:

إِسّهْوَا-د سِيذِي أَربِّي إِجّْ ن يِيضصْ يُودْجغْ خْ أَذَامْ

ؤُشَا أَمْ ثُوغَا إِطّصْ، ڒخْذنِّي إِكْسِي إِشْثنْ زِي ثْغزْذِيسِينْ نّسْ ؤُشَا إِقّنْ أَمْشَانْ سَاذُو نّسْ س ويْسُومْ.

يَارَّا سِيذِي أَربِّي ثَاغزْذِيسْثْ ثنِّي إِ إِكْسِي زِي أَذَامْ ذ ثَامْغَارْثْ ؤُشَا إِوْيِي ت-إِدّْ غَارْ أَذَامْ. إِنَّا أَذَامْ:

 

"ڒخُّو ثَانِيثَا أَقَا-ت ذ إِغسْ زڭْ إِخْسَانْ إِنُو ذ أَيْسُومْ زڭْ ويْسُومْ إِنُو.

أَذْ ثثْوَاسمَّا ’ثَارْيَازْثْ‘، (إِخْسْ أَذْ يِينِي ’ثَامْغَارْثْ‘)، مِينْزِي نتَّاثْ ثثْوَاكْسِي-د زڭْ ورْيَازْ.

سْ مَانْ أَيَا أَذْ يجّْ أَرْيَازْ بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ، أَذْ إِڒِينْ ذ إِجّْ ن ويْسُومْ."

(أَمزْوَارُو 2:21-25)

 

ذِي ڒخْبَارْ أَصبْحَانْ س ؤُفُوسْ ن مَاتَّا نقَّارْ خْ إِجّْ ن ؤُمْسَاڭَارْ جَارْ يَاسُوع لْمَاسِيحْ ذ إِفَارِيسِييّنْ نِّي ث إِسّقْسَانْ أَمُّو:

 

””مَا غَارْسْ ڒْْحقّْ إِ بْنَاذمْ أَذْ إِدْجفْ إِ ثمْغَارْثْ نّسْ أَمنِّي وَاهَا؟“

يَارَّا-د خَاسنْ يَاسُوع ”مَا وَارْ ثغْرِيمْ شَا بلِّي ونِّي إِڭِّينْ بْنَاذمْ زڭْ ؤُمزْوَارُو، إِڭَّا إِثنْ ذ أَرْيَازْ ذ ثمْغَارْثْ،

ؤُشَا أَقَا إِنَّا ’س ؤُينِّي إِتّْخصَّا إِ بْنَاذمْ أَذْ إِسْمحْ ذِي بَابَاسْ ذ يمَّاسْ، أَذْ إِڒْصقْ ذِي ثمْغَارْثْ نّسْ

ؤُشَا ثْنَاينْ إِذْسنْ نِّي أَذْ إِڒِينْ ذ إِجّْ ن ويْسُومْ'؟‘ أَمُّو وَارْ تِّيڒِينْ عَاذْ ذ ثْنَاينْ، مَاشَا أَذْ إِڒِينْ ذ إِجّْ ن ويْسُومْ.

خنِّي مِينْ إِسّْمُونْ أَربِّي، بْنَاذمْ وَارْ ث إِبطِّي“

(مَاتَّا 19:3-6)

 

أَمُّو نسّنْ أَقَا أَربِّي ذ ونِّي د-إِخڒْقنْ ڒمْرَاشْ جَارْ ورْيَازْ ذ ثمْغَارْثْ نّسْ حِيمَا أَذْ إِڒِينْ ذ إِجّْ ن ويْسُومْ ؤُشَا نفْهمْ عَاوذْ أَقَا بْنَاذمْ وَارْ إِزمَّارْ أَذْ إِبْضَا مِينْ إِسّْمُونْ أَربِّي. ذ مَانْ أَيَا ذ لْقَاعِيذَا ن أَربِّي إِ مَارَّا إِوْذَانْ. ذِي ثِيطَّاوِينْ ن أَربِّي ڒمْڒَاشْ جَارْ ورْيَازْ ذ ثمْغَارْثْ نّسْ أَذْ إِقِّيمْ أَڒْ ڒْموْثْ ن إِجّنْ زَّايْسنْ أَمْ مَامّشْ نقَّارْ ذِي ثبْرَاثْ ن ؤُمَازَانْ بُولِيسْ غَارْ ڒْْمُومِينِينْ ذِي رُومَا، إِنَّا:

 

مِينْزِي ثَامْغَارْثْ ثنِّي سَاذُو ورْيَازْ س شَّارِيعَا، أَقَا ثتّْغِيمَا ثُويڒْ ذڭْ يِيرِي ن ورْيَازْ نّسْ مِينْثْرَا عَاذْ إِدَّارْ،

مَاشَا مَاڒَا إِمُّوثْ ورْيَازْ، أَقَا ثثْوَافكّْ زڭْ ورْيَازْ س شَّارِيعَا.

خنِّي مَاڒَا ثذْوڒْ إِ ورْيَازْ نّضْنِي، مِينْ إِ غَا يكّْ ورْيَازْ إِدَّارْ، ثثْوَاسمَّا ثزْنَا.

مَاشَا مَاڒَا إِمُّوثْ ورْيَازْ نّسْ، نتَّاثْ غَارْسْ لْحُورِّييَا زِي شَّارِيعَا

أَڒَامِي وَارْ ثْزنِّي مَاڒَا ثمْڒشْ أَكْ-ذ ورْيَازْ نّضْنِي

(رُوم. 7:2-3)

 

أَرْيَازْ ذ ثمْغَارْثْ قّْننْ إِجّْ غَارْ ونّضْنِي س ڒمْڒَاشْ أَڒْ إِ غَا إِمّثْ إِجّْ

زَّايْسنْ. أَرْيَازْ وَارْ إِزمَّارْ أَذْ إِدْجفْ إِ ثَامْغَارْثْ نّسْ ؤُ ثَامْغَارْثْ وَارْ ثْزمَّارْ أَذْ ثدْجفْ إِ ورْيَازْ نّسْ. مَاشَا أَطَّاسْ ن ينِّي إِحسّْبنْ إِخفْ نْسنْ ذ إِمَاسِيحِييّنْ ؤُڒَا ذ إِوْذَانْ إِنِّي وَارْ إِحسّْبنْ إِخفْ نْسنْ ذ إِمَاسِيحِّيينْ وَارْ ضفَّارنْ شَا أَوَاڒْ ن أَربِّي ذِي مَانْ أَيَا ؤُ تّدْجْفنْ ؤُ أَطَّاسْ زَّايْسنْ مدْجْشنْ وِيسّْ ثْنَاينْ أَمْ ورْيَازْ نِيغْ ثمْغَارْثْ نْسنْ عَاذْ يكّْ أَذْ إِدَّارْ.

خْزَارْ مِينْ إِقَّارْ لْمَاسِيحْ خْ ينِّي إِتّڭّنْ أَمُّو:

 

مَاشَا نشّْ أَذْ أَومْ إِنِيغْ، مَارَّا ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي زِي سِّيبّثْ ن فَارْقْ-شّْغڒْ،

إِتَّارَّا ت أَذْ ثزْنَا ؤُشَا ونِّي إِ غَا إِمڒْشنْ ثنِّي ؤُمِي إِدْجْفنْ، أَقَا نتَّا إِزْنَا

(مَاتَّا  5:32)

 

مَاشَا نشّْ أَذْ أَومْ إِنِيغْ، أَقَا ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي زِي سِّيبّثْ ن فَارْقْ-شّْغڒْ،

ؤُشَا أَذْ إِمْڒشْ إِشْثنْ نّضْنِي، أَقَا نتَّا إِزنَّا ؤُ ونِّي إِ غَا إِمڒْشنْ ثَامْغَارْثْ ثنِّي إِدْجْفنْ، أَقَا ؤُڒَا ذ نتَّا إِزنَّا“

(مَاتَّا  19:9)

 

إِنَّا أَسنْ ”وِي إِ غَا إِدْجْفنْ إِ ثمْغَارْثْ نّسْ ؤُشَا أَذْ إِمْڒشْ ثنّضْنِيثْ، أَقَا نتَّا إِزْنَا خَاسْ.

ؤُ مَاڒَا ثَامْغَارْثْ ثدْجفْ إِ ورْيَازْ نّسْ، خنِّي أَذْ ثمْڒشْ ونّضْنِي، أَقَا نتَّاثْ ثزْنَا“

(مَارْكُو10:11،12)

 

مَارَّا وِي إِ غَا إِدْجْفنْ إِ ثمْغَارْثْ نّسْ ؤُشَا أَذْ إِمْڒشْ أَكْ-ذ ثنّضْنِيثْ،

أَقَا إِزنَّا ؤُ مَارَّا وِي إِ غَا إِمڒْشنْ ثنِّي ؤُمِي خْ يُوژّڒْ ورْيَازْ نّسْ، أَقَا إِزنَّا.

(لُوكَا 16:18)

 

مَاڒَا إِدْجْفنْ إِوْذَانْ ذِي زَّامَانْ-أَ، أَربِّي وَارْ إِحسّبْ مَانْ أَيَا ذ ؤُنڭَّارْ ن ڒمْڒَاشْ نْسنْ. إِحسّبْ مَانْ أَيَا ذ دّنْبْ ذ زِّينَا، مَاشَا ذِي ثِيطَّاوِينْ نّسْ ڒمْڒَاشْ إِقِّيمْ أَڒْ إِ غَا إِمُّوثْ إِجّْ زَّايْسنْ. أَطَّاسْ ن إِوْذَانْ إِتّْغِيڒْ أَسنْ أَقَا لْمَاسِيحْ إِسَامْحْ إِ بْنَاذمْ حِيمَا أَذْ إِمْڒشْ وِيسّْ ثْنَاينْ مِينْثْرَا أَرْيَازْ نِيغْ ثَامْغَارْثْ إِدَّارْ (ثدَّارْ) عَاذْ، قَّارنْ أَقَا لْمَاسِيحْ إِنَّا 'وَارْ إِدْجِي زِي سِّيبّثْ ن فَارْقْ-شّْغڒْ' (خْزَارْ سنّجْ مَاتَّا 5 ذ 19). خنِّي إِتّْغِيڒْ أَسنْ أَقَا بْنَاذمْ وَارْ

إِزمَّارْ أَذْ إِدْجفْ مْغِيرْ مَاڒَا أَرْيَازْ نّسْ نِيغْ ثَامْغَارْثْ نّسْ إِزنَّا. مَاشَا لْمَاسِيحْ وَارْ إِقَّارْ مَانْ أَيَا، مَاشَا إِسَّاوَاڒْ خْ 'فَارْقْ-شّْغڒْ'. نسّنْ مَارَّا أَقَا زِّينَا ذ فَارْقْ-شّْغڒْ، مَاشَا فَارْقْ-شّْغڒْ ذَايْسْ ؤُڒَا ذ أَطَّاسْ ن ثْمسْڒَايِينْ نّضْنِي. نقَّارْ ذِي ثبْرَاثْ ن ؤُمَازَانْ بُولُوسْ إِ رُومَا خْ إِوْذَانْ نِّي ؤُڭِينْ أَذْعبْذنْ أَربِّي:

 

أَقَا نِيثْنِي بدّْڒنْ ثِيذتّْ ن أَربِّي س ؤُخَارِّيقْ،عبْذنْ ؤُ خذْمنْ إِ مِينْ د-إِثْوَاخڒْقنْ

سنّجْ إِ ونِّي إِخڒْقنْ ونِّي ؤُمِي غَارْ ثدْجْ لْبَارَاكَا إِ ڒبْذَا قَاعْ. أَمِينْ.

سْ ؤُينِّي إِسلّمْ إِثنْ أَربِّي غَارْ ؤُشَاهِي إِنْفضْحنْ،

مِينْزِي ؤُڒَا ذ ثِيمْغَارِينْ نْسنْ بدّْڒنْثْ أَبْرِيذْ ن طّْبِيعثْ س مِينْ وَارْ إِدْجِينْ ذ طّْبِيعثْ.

أَمنِّي إِرْيَازنْ عَاوذْ جِّينْ ثَامُونْثْ عْلَاحْسَابْ طّْبِيعثْ أَكْ-ذ ثمْغَارِينْ، ذعْقنْ س نّشْوَاثْ أَكْ-ذ وَايَاوْيَا،

إِرْيَازنْ إِتّڭّنْ ڒفْضَايحْ أَكْ-ذ يرْيَازنْ، قبّْڒنْ ذڭْ إِخفْ نْسنْ ڒْْمُونثْ إِ إِسْذَاهدْجنْ أَخطُّو نْسنْ.

(رُوم. 1:25-27)

 

مَارَّا مَانْ أَيَا ذ فَارْقْ-شّْغڒْ، مَاشَا ثُوقهْبِيثْ نِّي وَارْ ثدْجِي ذ زِّينَا. فَارْقْ-شّْغڒْ أَقَا-ت مَارَّا مَارْكَاثْ ن ڒفْسذْ إِ إِمْسَارنْ بَارَّا إِ ڒمْڒَاشْ، وَارْ إِدْجِي ذ زِّينَا وَاهَا. نسّنْ زڭْ وذْلِيسْ إِقدّْسنْ، أَقَا شَّارِيعَا ثْحَارّمْ أَمُّو ڒمْڒَاشْ جَارْ ينِّي زڭْ إِشْثْ ن ثْوَاشُونْثْ  (خْزَارْ لَاوْ. 18:6-18)

 

مِّيسْ وَارْ إِزمَّارْ أَذْ إِمْڒشْ أَكْ-ذ يمَّاسْ، ثَامْغَارْثْ ن بَابَاسْ،

(2) مِّيسْ وَارْ إِزمَّارْ أَذْ إِمْڒشْ أَكْ-ذ ؤُتْشْمَاسْ (زِي بَابَاسْ نِيغْ زڭْ يمَّاسْ)،

(3) بَابَاسْ وَارْ إِزمَّارْ أَذْ إِمْڒشْ أَكْ-ذ يدْجِيسْ ن مِّيسْ نِيغْ ن يدْجِيسْ،

(4) مِّيسْ وَارْ إِزمَّارْ أَذْ إِمْڒشْ أَكْ-ذ ؤُتْشْمَاسْ ن بَابَاسْ نِيغْ أَكْ-ذ ؤُتْشْمَاسْ ن يمَّاسْ،

(5) مِّيسْ وَارْ إِزمَّارْ أَذْ إِمْڒشْ أَكْ-ذ ثمْغَارْثْ ن ؤُمَاسْ ن بَابَاسْ

(6) بَابَاسْ وَارْ إِزمَّارْ أَذْ إِمْڒشْ أَكْ-ذ ثمْغَارْثْ ن مِّيسْ

(7) ثَاوْمَاثْ وَارْ إِزمَّارْ أَذْ إِمْڒشْ أَكْ-ذ ثمْغَارْثْ ن ؤُمَاسْ

(8) ........

 

مَاشَا أَحَارّمْ-أَ وَارْ ثُوغَا زڭْ ؤُمزْوَارُو مِينْزِي إِحنْجِيرنْ ن أَذَامْ مڒْشنْ أَكْ-ذ وَايَاوْيَا ؤُشَا نْثَافْ عَاوذْ ذڭْ وذْلِيسْ ن ؤُفُّوغْ 6:20 أَقَا أَمْرَانْ (ونِّي زِي أَيْثْ ن لَاوِي) إِمْڒشْ أَكْ-ذ ؤُتْشْمَاسْ ن بَابَاسْ ؤُمِي ثُوغَا أَيْثْ ن إِسْرَايِيلْ عَاذْ ذِي مِيصْرَا قْبڒْ ؤُفُّوغْ نْسنْ زِي مِيسْڒَا س ؤُفُوسْ ن مُوسَا. مَاشَا ؤُمِي د-ثُوسَا شَّارِيعَا س ؤُفُوسْ ن مُوسَا، نْثَافْ أَقَا ذِينْ ڒمْڒَاشَاثْ نِّي وَارْ تّْوَاهضّْبنْ شَا ذ ڒمْڒَاشَاثْ زَّاثْ إِ أَربِّي. س ؤُينِّي إِزمَّارْ أَقَا لْمَاسِيحْ ثُوغَا إِشيَّارْ غَارْ ڒمْڒَاشَاثْ-أَ ؤُمِي إِنَّا 'وَارْ إِدْجِي زِي سِّيبّثْ ن فَارْقْ-شّْغڒْ'. مَاڒَا شَا ن يِيجّنْ جَارْ أَيْثْ ن إِسْرَايِيلْ ثُوغَا إِفّغْ زڭْ وبْرِيذْ ن أَربِّي أَڒَامِي إِمْڒشْ بَارَّا إِ شَّارِيعَا ن أَربِّي س ؤُفُوسْ ن مُوسَا ؤُ أَوَارْنِي مَانْ أَيَا، إِنْذمْ، إِدْجفْ إِ ثمْغَارْثْ نّسْ، أَيَا وَارْ إِثْوَاحَاسّبْ شَا أَقَا نتَّا إِتَّارَّا ثَامْغَارْثْ نّسْ ثزْنَا.

مَاشَا وَاخَّا أَمنِّي ؤُ س مَارَّا مَانْ أَيَا وَارْ نقَّارْ ذڭْ إِزِييْنَاثْ إِ نْقدّمْ سنّجْ زڭْ وذْلِيسْ إِقدّْسنْ أَقَا لْمَاسِيحْ إِوْشَا تّسْرِيحْ إِ ونِّي خْ إِتّْوَاجّْ زڭْ ورْيَازْ نّسْ نِيغْ زِي ثمْغَارْثْ نّسْ حِيمَا أَذْ إِمْڒشْ وِيسّْ ثْنَاينْ أَمْ إِتّكّْ ورْيَازْ نِيغْ ثَامْغَارْثْ دَّارنْ عَاذْ. ونِّي إِزنَّانْ ؤُڒَا ذ ونِّي إِتّْوَاجّنْ إِتّْخصَّا أَسنْ س ثْنَاينْ إِذْسنْ أَذْ طَاعنْ إِ وَاوَاڒْ ن لْمَاسِيحْ. ونِّي إِزنَّانْ إِتّْخصَّا أَسْ أَذْ إِنْذمْ ؤُ أَذْ إِنْعمْ س دّنْبْ نّسْ ؤُ ونِّي إِتّْوَاجّنْ أَذْ إِقِّيمْ أَمنِّي، إِتّْخصَّا أَسْ وَارْ إِزنَّا ؤُڒَا ذ نتَّا(ث) أَمْ ونّضْنِي. أَوَاڒْ-أَ ذ إِجّْ ن وَاوَاڒْ إِقْسحْ خْ بْنَاذمْ. أَذْ ثَاغْ ذ مَانْ أَيَا ذ سِّيبّثْ إِ زِي لْمَاسِيحْ ثُوغَا يَارنِّي عَاذْ ذڭْ وَاوَاڒنْ نّسْ ڒَْامِي د-يَارَّا خْ مِينْ نَّانْ إِمحْذَارنْ نّسْ:

 

'مَاڒَا أَمُّو إِ ثدْجْ ثْمسْڒَاشْثْ جَارْ بْنَاذمْ ذ ثمْغَارْثْ نّسْ، خنِّي نهْڒَا مَّا أَذْ إِمْڒشْ.'

مَاشَا يَاسُوع إِنَّا أَسنْ 'مَاشِي مَارَّا زمَّارنْ أَذْ قبْڒنْ أَوَاڒْ-أَ مْغِيرْ إِنِّي ؤُمِي ثمّوْشْ.

مِينْزِي أَقَا ذِينْ إِنِّي إِثْوَاقسّنْ زڭْ ؤُعذِّيسْ ن يمَّاثْسنْ،

ؤُشَا أَقَا ذِينْ إِنِّي إِثْوَاقسّنْ زڭْ إِوْذَانْ

ؤُشَا أَقَا ذِينْ إِنِّي إِقصّنْ إِخفْ نْسنْ ذِي طّْوعْ ن ثْڭلْذِيثْ ن إِجنْوَانْ.

ونِّي إِزمَّارنْ أَذْ ث إِقْبڒْ، أجّْ إِثْ أَذْ ث إِقْبڒْ.' 

(مَاثْ 19:10-12)

 

أَوَاڒنْ ن ؤُمَازَانْ بُولُوسْ خْ ڒمْڒَاشْ

 

""س ؤُينِّي خْزَارمْ مْلِيحْ مَامّشْ إِ غَا ثُويُورمْ، مَاشِي أَمْ إِبُوهَاڒِييّنْ مَاشَا أَمْ إِمِيغِيسنْ، مَاحنْذْ أَذْ ثَاوْيمْ أَرِيقِّي إِ ڒْْوقْثْ-أَ، مِينْزِي ؤُسَّانْ-أَ ذ إِعفَّاننْ. وَارْ تِّيڒِيمْ ذ إِبُوهَاڒِييّنْ مَاشَا فهْممْ مِينْ إِخْسْ أَربِّي. وَارْ سْشَّارَامْ شَا س بِينُو إِ إِتَّاوْينْ غَارْ ڒقْجَاحثْ، مَاشَا إِڒِيمْ ثْعمَّارمْ س أَرُّوحْ، أَمْ ثسَّاوَاڒمْ جَارَاومْ س إِزهِّيذنْ ذ إِزْڒَانْ ن ؤُسبّحْ ذ إِزْڒَانْ س أَرُّوحْ، ثتّْغنَّاجمْ ؤُ ثسْڒِيوْڒِيومْ ذڭْ وُوڒْ نْومْ إِ أَربِّي أَمْ ثتّْقَاذَامْ زِي كُوڒْ ڒْْوقْثْ خْ مَارَّا إِ أَربِّي ثَابَابَاثْ ذڭْ يِيسمْ ن سِيذِي يَاسُوع لْمَاسِيحْ، ؤُ ثتّْوَاضْعمْ إِجّْ إِ ونّضْنِي ذِي ثِيڭّْوُوذِي زِي أَربِّي.

 

أَ ثِيمْغَارِينْ، وَاضْضْعنْثْ إِ يرْيَازنْ نْكنْثْ أَمْ مَامّشْ ثتّْوَاضْضْعنْثْ إِ سِيذِي،

مِينْزِي أَرْيَازْ أَقَا ذ أَزدْجِيفْ ن ثمْغَارْثْ أَمشْنَاوْ عَاوذْ لْمَاسِيحْ إِدْجَانْ ذ أَزدْجِيفْ ن ثْمسْمُونْثْ ؤُشَا نتَّا ذ أَمْسنْجمْ ن أَرِّيمثْ.

أَمشْنَاوْ ثَامسْمُونْثْ إِ إِتّْوَاضْضْعنْ إِ لْمَاسِيحْ أَمنِّي عَاوذْ ثِيمْغَارِينْ إِ يرْيَازنْ نْسنْثْ ذِي مَارَّا.

أَ إِرْيَازنْ، خْسمْ ثِيمْغَارِينْ نْومْ أَمْ مَامّشْ ثُوغَا إِخْسْ لْمَاسِيحْ ثَامسْمُونْثْ ؤُشَا إِسلّمْ إِخفْ نّسْ ذِي طّْوعْ نّسْ،

حِيمَا أَذْ ت يَارّْ ذ ثَامْقدَّاسْثْ أَمْ ذ أَسْ إِسِّيزْذڭْ س ؤُسِيرْذْ ن وَامَانْ س وَاوَاڒْ،

حِيمَا أَذْ إِڭّْ ثَامسْمُونْثْ قِيبَاتْشْ إِ يِيخفْ نّسْ س ؤُعُودْجِي بْڒَا أَبقِّيضْ نِيغْ أَشبْرِيقْ، مَاشَا أَذْ ثِيڒِي ذ ثَامْقدَّاسْثْ ؤُ بْڒَا ڒْْعِيبْ.

أَمُّو إِتّْخصَّا أَذْ خْسنْ يرْيَازنْ ثِيمْغَارِينْ نْسنْ أَمْ أَرِّيمثْ ن يِيخفْ نْسنْ. أَقَا ونِّي إِتّخْسنْ ثَامْغَارْثْ نّسْ، أَقَا إِتّخْسْ إِخفْ نّسْ.

ؤُڒَا ذ إِجّْ وَارْ إِشَارْهْ أَيْسُومْ نّسْ، مَاشَا إِسّشَّا ث، إِتّْحَاوَاڒْ خَاسْ أَمْ مَامّشْ (إِتّْحَاوَاڒْ) عَاوذْ لْمَاسِيحْ خْ ثْمسْمُونْثْ.

نشِّينْ ذ إِخْفَاونْ ن أَرِّيمثْ نّسْ، ن ويْسُومْ نّسْ ؤُ ن إِخْسَانْ نّسْ.

خْ ؤُينِّي أَرْيَازْ أَذْ إِجّْ يمَّاسْ ذ بَابَاسْ مَاحنْذْ أَذْ إِقّنْ غَارْ ثمْغَارْثْ نّسْ، أَذْ إِڒِينْ س ثْنَاينْ إِذْسنْ ذ إِشْثْ ن أَرِّيمثْ.

سِّيرّْ-أَ ذ أَمقّْرَانْ، مَاشَا نشّْ قَّارغْ ث زِي جِّيهثْ ن لْمَاسِيحْ ذ ثْمسْمُونْثْ.

مَامّشْ مَّا ثُوسَا-د، أَذْ إِخْسْ كُوڒْ إِجّْ ثَامْغَارْثْ نّسْ أَمشْنَاوْ سِيمَانْثْ نّسْ ؤُ ثَامْغَارْثْ أَذْ ثْوقَّارْ أَرْيَازْ

(أَفْ 5:15-33)

 

أَوَاڒنْ زڭْ وذْلِيسْ إِقدّْسنْ خْ شّهْوَاثْ ذ أَرِّيمثْ

 

أَقَا ثسْڒِيمْ بلِّي إِثْوَانَّا إِ ڒجْذُوذْ ’وَارْ زنِّي شَا‘، مَاشَا نشّْ أَذْ أَومْ إِنِيغْ،

مَارَّا ونِّي إِ غَا إِخْزَارنْ غَارْ ثمْغَارْثْ س نّشْوثْ، أَقَا إِزْنَا أَكِيذسْ ذڭْ وُوڒْ نّسْ.

(مَاتَّا 5:27,28)

 

مَا وَارْ ثسِّينمْ شَا بلِّي أَرِّيمَاثْ نْومْ دْجَانْثْ ذ إِغزْذِيسنْ ن لْمَاسِيحْ؟

مَا أَذْ كْسِيغْ خنِّي إِغزْذِيسنْ ن لْمَاسِيحْ مَاحنْذْ أَذْ ثنْ ڭّغْ ذ إِغزْذِيسنْ ن ڒْْقحْبَا؟عمَّارْصْ!

نِيغْ وَارْ ثسِّينمْ شَا بلِّي وِي إِمُوننْ أَكْ-ذ ڒْْقحْبَا، أَقَا-ث ذ إِشْثْ ن أَرِّيمثْ أَكِيذسْ؟

مِينْزِي إِقَّارْ ”نِيثْنِي س ثْنَاينْ أَذْ إِڒِينْ ذ إِجّْ ن ويْسُومْ.“

مَاشَا ونِّي إِمُوننْ أَكْ-ذ سِيذِي، أَقَا-ث ذ إِجّْ ن أَرُّوحْ أَكِيذسْ.

نِيغْ وَارْ ثسِّينمْ شَا بلِّي وِي إِمُوننْ أَكْ-ذ ڒْْقحْبَا، أَقَا-ث ذ إِشْثْ ن أَرِّيمثْ أَكِيذسْ؟

مِينْزِي إِقَّارْ ”نِيثْنِي س ثْنَاينْ أَذْ إِڒِينْ ذ إِجّْ ن ويْسُومْ.“

أَروْڒمْ زِي فَارْقْ-شّْغڒْ. كُوڒْ شَا ن دَّانْبْ إِ إِتّڭّْ إِثْ بْنَاذمْ، أَقَا-ث بَارَّا إِ أَرِّيمثْ،

مَاشَا ونِّي إِتّْقحّْبنْ، أَقَا إِخطَّا ضِيدّْ ن أَرِّيمثْ نّسْ.

مَا وَارْ ثسِّينمْ شَا بلِّي أَرِّيمثْ نْومْ ذ ثَادَّارْثْ ن أَرُّوحْ إِقدّْسنْ ثنِّي إِ ذَايْومْ إِدْجَانْ،

ثنِّي إِ ذ أَومْ-د يُوسِينْ زِي أَربِّي، ؤُشَا خنِّي كنِّيوْ وَارْ ثدْجِيمْ شَا إِ يِيخفْ نْومْ؟

أَقَا ثمّسْغمْ-د س تَّامَانْ. سمْغَارمْ خنِّي أَربِّي ذِي أَرِّيمثْ نْومْ

ؤُ ذِي أَرُّوحْ نْومْ ثِينِّي إِدْجَانْ ن أَربِّي.

(1 كُورِينْطُوسْ 6:15-20)

 

أجّْ أَذْ يِيڒِي ڒمْڒَاشْ ذ أَوقَّارْ غَارْ مَارَّا، ذ قَامَا (ن ڒمْڒَاشْ) بْڒَا ڒخْمجْ،

مِينْزِي أَربِّي أَذْ إِحْكمْ خْ إِقحْبِييّنْ ؤُ خْ ينِّي إِتّڭّنْ زِّينَا.

(إِعِيبْرَانِييّنْ 13:4)

 

ثَادْجسْثْ ذ ثْفَاوْثْ وَارْ زمَّارنْثْ أَذْ زذْغنْثْ أَمْ مُوننْ ذِي ڒمْڒَاشْ

 

ثَادْجسْثْ ذ ثْفَاوْثْ وَارْ زمَّارنْثْ أَذْ زذْغنْثْ أَمْ مُوننْ ذِي ڒمْڒَاشْ

إِنِّي إِتّْوَاسْنجْمنْ س لِيمَانْ ذِي يَاسُوع لْمَاسِيحْ أَقَا-ثنْ ذ ثَارْوَا ن ثْفَاوْثْ

ؤُ وَارْ غَارْسنْ ثَاسْغَارْثْ أَكْ-ذ ثَارْوَا ن ثَادْجسْثْ، إِخْسْ أَذْ يِينِي أَكْ-ذ ينِّي وَارْ إِتِّيمْننْ شَا (أَفْ. 5:6-8؛ 2 كُور. 6:14). أَوَاڒْ-أَ وَارْ إِخْسْ شَا أَذْ يِينِي بلِّي وَارْ إِتّْخصِّي إِ ثَارْوَا ن ثْفَاوْثْ مَاحنْذْ أَذْ وقَّارنْ نِيغْ أَذْ سّْعِيزّنْ إِنِّي وَارْ إِتِّيمنْ شَا، مَاشَا أَذْلِيسْ ن أَربِّي إِقَّارْ أَقَا وَارْ إِزمَّارْ أَذْ ذِينْ يِيڒِي إِجّْ ن ؤُمُونِي يُوذْسنْ جَارْ ونِّي إِتَّامْننْ ذ ونِّي وَارْ إِتِّيمْننْ شَا. س ؤُينِّي إِتّْخصَّا إِ ثَارْوَا ن ثْفَاوْثْ وَارْ مدْجْشنْ شَا أَكْ-ذ ثَارْوَا ن ثَادْجسْثْ مْغِيرْ مَاڒَا إِنِّي غَارْسنْ ثدْجْ صُّولْطَا خَاسنْ ذِي ثْمسْڒَاشْثْ ن ڒمْڒَاشْ عْلَاحْسَابْ أَذْلِيسْ إِقدّْسنْ أَذْ خَاسْ ڭّنْ أَغِيڒْ. مَانْ أَيَا إِخْسْ أَذْ يِينِي بلِّي أَمَاسِيحِي ونِّي يُومْننْ أَقَا يَاسُوع لْمَاسِيحْ ذ مِّيسْ ن أَربِّي إِمُّوثْ خْ صَّالِيبْ مَاحنْذْ أَذْ أَسْ-د يَاوِي أَسنْجمْ ن دّْنُوبْ نّسْ، وَارْ إِزمَّارْ أَذْ إِمْڒشْ أَكْ-ذ شَا ن يِيجّنْ ونِّي وَارْ يُومِّيننْ شَا نِيشَانْ أَمْ مَامّشْ يُومنْ نتَّا.

مَاڒَا شَا ن يِيجّنْ يُومنْ ذِي لْمَاسِيحْ أَوَارْنِي ڒَْامِي ن ڒمْڒَاشْ، خنِّي أَذْ يَامنْ ذِي لْمَاسِيحْ، أَوَارْنِي أَسْ وَارْ إِتّجِّي شَا ونّضْنِي مَاشَا أَذْ كِيذسْ إِقِّيمْ مَاڒَا ونّضْنِي إِقْبڒْ لِيمَانْ ن جْذِيذْ نّسْ. مَاڒَا ونِّي يُومْننْ ذِي لْمَاسِيحْ وَارْ إِقْبِيڒْ لِيمَانْ ن جْذِيذْ نّسْ ؤُشَا إِجَّا إِتّْ ؤُشَا إِڒُوحْ (نِيغْ نتَّاثْ ثْرُوحْ)، خنِّي ونِّي يُومْننْ ذِي لْمَاسِيحْ أَذْ إِقِّيمْ أَمنِّي، وَارْ إِمدْجشْ شَا عَاوذْ أَكْ-ذ إِجّْ ن ڒْْمُومِينْ، مَاشَا حْسنْ مَاڒَا إِژُّودْجْ إِ أَربِّي، أَذْ ثَاغْ أَربِّي أَذْ يَارْزمْ ؤُڒْ ن ونّضْنِي أَڒَامِي إِ غَا يَامنْ ؤُڒَا ذ ونّضْنِي ذِي يَاسُوع لْمَاسِيحْ، مِّيسْ ن أَربِّي ذ مِّيسْ ن بْنَاذمْ (غَارْ 1 كُور. 7 خْ ثْمسْڒَايِينْ-أَ)