مَانْ ونْ إِدْجَانْ ذ لْمَاسِيحْ؟

إِنَّا لْمَالَاكْ إِ يُوسُوفْ: "أَ يُوسُوفْ، أَ مِّيسْ ن ذَاوُوذْ، وَارْ تّڭّْوذْ أَذْ غَارْكْ ثِيڒِي مَارْيمْ ذ ثَامْغَارْثْ نّكْ، مِينْزِي مِينْ إِ ذ أَسْ-د إِثْوَارْونْ، أَقَا نتَّا زِي أَرُّوحْ إِقدّْسنْ.“   ؤُشَا أَذْ ثَارُووْ أَحنْجِيرْ، أَذْ ث ثْسمِّيذْ يَاسُوع، مِينْزِي نتَّا أَذْ إِسّنْجمْ ڒْْڭنْسْ نّسْ زِي دّْنُوبْ نْسنْ.“ (مَاتَّا 1:20-21)

يُوحَانَّا أَمْسغْضَاصْ إِنَّا خْ يَاسُوع لْمَاسِيحْ: "نشّْ أَذْ كنِّيوْ سّْغضْصغْ ذڭْ وَامَانْ إِ تُّوبثْ. مَاشَا ونِّي د إِ غَا يَاسنْ أَوَارْنِي أَيِي، نتَّا إِجْهذْ خَافِي، نشّْ وَارْ سّْذِيهدْجغْ أَذْ أَسْ كْسِيغْ سَانْذَالِييَاثْ نّسْ، أَقَا نتَّا أَذْ كنِّيوْ إِسّغْضصْ س أَرُّوحْ إِقدّْسنْ ذ ثْمسِّي."(مَاتَّا 3:11)

ڒَامِي إِژْرَا نَاثَانَايِيلْ يَاسُوع لْمَاسِيحْ ثْوَاڒَاثْ ثَامزْوَارُوثْ، إِنَّا: "”أَ ’رَابِّي‘ (=سِيذِي، أَمْسڒْمَاذْ)، شكْ ذ مِّيسْ ن أَربِّي، شكْ ذ أَجدْجِيذْ ن إِسْرَايِيلْ.“ يَاسُوع يَارَّا-ذ، إِنَّا أَسْ ”مَا ثُومْنذْ س مِينْ ذ أَشْ نِّيغْ ’أَقَا ژْرِيغْ شكْ سْوَادَّايْ إِ وَارْثُو‘؟ أَذْ ثْژَارذْ مِينْ إِدْجَانْ كْثَارْ زِي مَانْ أَيَا.“   إِنَّا أَسْ ”س ثِيذتّْ، س ثِيذتّْ، أَذْ أَومْ إِنِيغْ، زِي سَّا ذ ثْسَاونْثْ أَذْ ثْژَارمْ أَجنَّا إِنُّورْزمْ ؤُ لْمَالَاكَاثْ ن أَربِّي تَّاڒْينْ هكّْوَانْ خْ مِّيسْ ن بْنَاذمْ.“ (يُوحَانَّا 1:49-51)

مِينْ ثنَّا يمَّاسْ مَارْيَامْ: ”مِينْ ذ أَومْ إِ غَا يِينِي، ڭّمْ ث.“ (يُوحَانَّا 2:5)

إِنَّا يَاسُوع لْمَاسِيحْ: "أَمُّو إِخْسْ أَربِّي دُّونِّيثْ أَڒْ مَانِي إِوْشَا أَينِّي ن مِّيسْ حِيمَا كُوڒْ إِجّنْ ونِّي زَّايسْ إِ غَا يَامْننْ، وَارْ إِتّْمتِّي شَا مَاشَا أَذْ غَارْسْ ثِيڒِي ثُوذَارْثْ ن ڒبْذَا. مِينْزِي أَربِّي وَارْ د إِسّكّْ شَا مِّيسْ غَارْ دُّونِيثْ حِيمَا أَذْ إِحَاسبْ دُّونِّيثْ، مَاشَا إِسّكّْ إِثْ-إِدّْ حِيمَا أَذْ زَّايسْ إِسّنْجمْ دُّونِيثْ. ونِّي زَّايسْ إِ غَا يَامْننْ وَارْ إِتّثْوَاحَاسبْ شَا، مَاشَا ونِّي وَارْ إِتِّيمْننْ شَا أَقَّا إِثْوَاحَاسَابْ زِي ڒخُّو مِينْزِي نتَّا وَارْ يُومِينْ شَا ذڭْ يِيسمْ ن ؤُينِّي ن مِّيسْ ن أَربِّي." (يُوحَانَّا 3:16-18)

لْمَاسِيحْ إِنَّا إِ وُوذَاينْ نِّي ثُوغَا إِخْسنْ أَذْ ث نْغنْ ڒَْامِي ثُوغَا إِتّْڒَاغَا 'بَابَا' إِ أَربِّي، إِسّمْقُودَّا إِخفْ نّسْ أَكْ-ذ أَربِّي: ”س ثِيذتّْ، س ثِيذتّْ، أَذْ أَومْ إِنِيغْ، ثَاممِّيثْ وَارْ إِزمَّارْ أَذْ يڭّْ ؤُڒَا ذ إِشْثْ ن ثْمسْڒَاشْثْ س يِيخفْ نّسْ، مْغِيرْ مَاڒَا إِژْرَا ثَابَابَاثْ إِتّڭّْ إِتّْ. مِينْ مَّا إِتّڭّْ نتَّا ؤُڒَا ذ ثَاممِّيثْ إِتّڭّْ أَمنِّي.ثَابَابَاثْ إِتّخْسْ ثَاممِّيثْ ؤُشَا إِسّْشنْ أَسْ مَارَّا مِينْ إِتّڭّْ ؤُشَا أَذْ أَسْ إِسّْشنْ ڒخْذَايمْ ثِيمقّْرَانِينْ خْ ثِينَا حِيمَا أَذْ ثْذهْشمْ. أَمْ مَامّشْ ذ إِسّْنكَّارْ ثْبَابَاثْ إِمتِّيننْ ؤُشَا إِتِّيشّْ ثُوذَارْثْ، أَمنِّي ؤُڒَا ذ ثَاممِّيثْ إِتِّيشّْ ثُوذَارْثْ إِ ونِّي إِخْسْ. ثَابَابَاثْ وَارْ إِتّْحَاسَابْ ؤُڒَا ذ إِجّْ، مَاشَا إِوْشَا لْحِيسَابْ مَارَّا إِ ثْممِّيثْ، حِيمَا أَذْ وقَّارنْ مَارَّا ثَاممِّيثْ أَمْ تّْوقَّارنْ ثَابَابَاثْ. ونِّي وَارْ إِتّْوقَّارنْ ثَاممِّيثْ، وَارْ إِتّْوقَّارْ شَا ثَابَابَاثْ ونِّي إِثْ-إِدّْ إِسّكّنْ. (يُوحَانَّا 5:19-23)

إِنَّا يَاسُوع إِ ثنْعَاشْ ن إِمحْضَارنْ: ”أَذْ نْڭَاعّذْ غَارْ ؤُرْشَالِيمْ ؤُشَا أَذْ إِثْوَاقْفڒْ إِ مِّيسْ ن بْنَاذمْ مَارَّا مِينْ يُورَانْ زڭْ إِنَابِييّنْ. مِينْزِي نتَّا أَذْ إِتّْوَاسلّمْ إِ ڒڭْنُوسْ، أَذْ ث سّحْقَارنْ، أَذْ زَّايسْ سّْبهْثْڒنْ، أَذْ ث ثكّْوَارنْ ؤُشَا أَذْ خَاسْ سُّوسْفنْ، أَذْ ث هتّْكنْ س ؤُركُّوضْ، أَذْ ث نْغنْ ؤُشَا ذڭْ وَاسّْ وِيسّْ ثْڒَاثَا أَذْ د-إِكَّارْ.“ (لُوقَا 18:31-33)

يَاسُوع إِقَّارْ: "نشّْ ذ أَمكْسَا ذ أَصبْحَانْ. سّْنغْ ؤُدْجِي إِنُو ؤُشَا ؤُدْجِي إِنُو إِسّنْ أَيِي، أَمْ مَامّشْ إِ ذ أَيِي إِسّنْ ثْبَابَاثْ، أَمُّو إِ سّْنغْ نشّْ ثَابَابَاثْ. نشّْ وْشِيغْ ثُوذَارْثْ إِنُو إِ وُودْجِي إِنُو.  ... س مَانْ أَيَا إِتّخْسْ أَيِي ثْبَابَاثْ، مِينْزِي نشّْ وْشِيغْ ثُوذَارْثْ إِنُو حِيمَا أَذْ ت-إِدّْ كْسِيغْ عَاوذْ. ؤُڒَا ذ إِجّْ وَارْ زَّايِي ت إِكْسِي، مَاشَا نشّْ وْشِيغْ ت س يِيخفْ إِنُو. غَارِي صُّولْطَا حِيمَا أَذْ ت وْشغْ ؤُ غَارِي ثِيزمَّارْ أَذْ ت-إِدّْ كْسِيغْ عَاوذْ. ثَاوْصيّثْ-أَ طّْفغْ ت زِي بَابَا.“(يُوحَانَّا 10:14،15،17،18)

مِينْ ثنِّيذْ شكْ؟ وِي إِنَّانْ أَقَا بلِّي نتَّا إِتَّامنْ ذِي لْمَاسِيحْ، إِثْخصَّا أَسْ أَذْ يَامنْ ذڭْ وَاوَاڒنْ ن لْمَاسِيحْ. مَاڒَا وَارْ ثتِّيمْنذْ ؤُڒَا ذَايْسنْ، إِخْسْ أَذْ يِينِي وَارْ ڭُّورْ أَذْ ثْنجْمذْ زِي ڒْْمُوعْصِييّثْ نّكْ ؤُ وَارْ ڭُّورْ أَذْ ثطّْفذْ أَسَامحْ مَاحنْذْ أَذْ كِيذسْ ثقِّيمذْ ؤُ أَذْ ث ثضْفَارذْ، وَارْ ڭُّورْ أَذْ غَاركْ ثِيڒِي ثُوذَارْثْ ن ڒبْذَا.