ڒْعَاهْذْ أَقْذِيمْ ذ ڒْْعَاهْذْ أَجْذِيذْ مَا نِيثْنِي ذ ثْنَاينْ ن إِذْلِيسنْ إِثْوَافَارْزنْ؟

أَطَّاسْ ن إِوْذَانْ إِتّْغِيڒْ أَسنْ بلِّي ؤُذَاينْ غَارْسنْ أَذْلِيسْ نْسنْ ؤُ إِمَاسِيحِييّنْ غَارْسنْ إِجّنْ نّضْنِي! إِوَا أَقَا مَانْ أَيَا وَارْ إِدْجِي شَا ذ ثِيذتّْ!

إِنّضْنِي قَّارنْ أَقَا ؤُذَاينْ غَارْسنْ ثْنَاينْ ن إِذْلِيسنْ ؤُمِي قَّارنْ تَّاوْرَاثْ ذ زَّابُورْ (أَوَاڒْ-أَ إِخْسْ أَذْ يِينِي 'إِذْلِيسنْ') ؤُ أَقَا إِمَاسِيحِييّنْ غَارْسنْ إِجّْ ن وذْلِيسْ وِيسّْ ثْڒَاثَا إِعْذُو إِذْلِيسنْ ثْنَاينْ إِمزْوُورَا ؤُ قَّارنْ أَسْ لْ'إِنْجِيلْ (أَوَاڒْ-أَ إِخْسْ أَذْ يِينِي `ڒخْبَارْ أَصبْحَانْ'). ؤُ عَاوذْ ذِينْ أَطَّاسْ ن إِوْذَانْ-أَ ڭُّورْ أَذْ إِنِينْ أَقَا أَربِّي إِسُّوفّغْ-د عَاذْ أَذْلِيسْ وِيسّْ أَربْعَا. إِوَا أَقَا ؤُڒَا ذ مَانْ أَيَا وَارْ إِدْجِي نِيشَانْ!

أَربِّي إِوْشَا أَنغْ مْغِيرْ إِجّْ ن وذْلِيسْ مِينْ ذِي إِدْجْ شَا ن إِسْمُونِيثنْ ن إِذْلِيسنْ، مَاشَا مَارَّا إِذْسنْ وَارْ ثْوَاحَارّْفنْ ؤُ وَارْ ثْوَابضْڒنْ شَا، أَقَا-ثنْ جْمِيعْ ذ أَوَاڒْ ن أَربِّي ذ إِجّنْ!

إِتّْخصَّا أَذْ ثسّْنذْ أَمزْوَارُو أَقَا ؤُذَاينْ بْضَانْ إِذْلِيسنْ ن ڒْْعَاهْذْ أَقْذِيمْ ('ثِينَاخْ') خْ ثْڒَاثَا ن إِسْمُونِيثنْ ؤُمِي قَّارنْ ثْوْورَاهْ (أَوَاڒْ-أَ إِخْسْ أَذْ يِينِي "ثَاغُورِي"، ذَايْسْ خمْسَا ن إِذْلِيسنْ إِمزْوُورَا ن مُوسَا، إِخْسْ أَذْ يِينِي تَّاوْرَاثْ)، كثُوبِيمْ (أَوَاڒْ-أَ إِخْسْ أَذْ يِينِي 'إِذْلِيسنْ' نِيغْ 'زَّابُورْ' ؤُ نتَّا جَارَاسنْ أَوَاڒنْ إِوزْننْ ن سُولَايْمَانْ ذ إِزهِّيذنْ ن ذَاوُوذْ ؤُڒَا ذ أَذْلِيسْ أَيُوبْ) ذ نبِييِيمْ (إِخْسْ أَذْ يِينْ إِذْلِيسنْ ن إِنَابِييّنْ، إِنَابِييّنْ إِمقّْرَاننْ ذ إِمژْيَاننْ نِّي يُورَانْ كُوڒْ إِجّْ زَّايْسنْ إِجّْ ن وذْلِيسْ س يِيسمْ نْسنْ). ثِينَا ثُوغَا ذ ثِيرَا إِقدّْسنْ ن وُوذَاينْ عْڒَاحَاڒْ 400 إِسڭّْوُوسَّا قْبڒْ ثْڒَاڒِيثْ ن يَاسُوع لْمَاسِيحْ زِي أَرُّوحْ إِقدّْسنْ زِي ثعْزَارشْثْ مَارْيَامْ.

أَطَّاسْ ن وُوذَاينْ ؤُمْننْ ذَايسْ ؤُ مَارَّا إِمَازَاننْ ن يَاسُوع ثُوغَا-ثنْ ذ ؤُذَاينْ إِ ذَايسْ يُومْننْ. ؤُ نِيشَانْ ذڭْ إِيُورنْ إِمزْوُورَا أَوَارْنِي ڒَْامِي إِمّكْسِي يَاسُوع لْمَاسِيحْ غَارْ ؤُجنَّا ؤُذْفنْ ذِي لِيمَانْ ذَايْسْ مْغِيرْ ذِي ؤُرْشَالِيمْ وَاهَا أَمشْنَاوْ ڒُْوڒُوفْ ن إِوْذَانْ، ؤُمنْ بلِّي نتَّا ذ لْمَاسِيحْ إِثْوَاوَاعْذنْ.

ؤُذَاينْ نِّي ؤُمْننْ ذِي لْمَاسِيحْ ثْوَابزّْعنْ أَوَارْنِي شَا ن ڒْْوقْثْ ذِي ڒسْبَابْ ن ثْقطَّاعْثْ ن وبْرِيذْ ذ ؤُضْطَاهذْ إِ ثُوغَا د-إِتَّاسنْ أَمزْوَارُو زِي جِّيهثْ ن وُوذَاينْ إِمقّْرَاننْ ن دِّينْ ذِي ڒْْوقْثْ نِّي. إِجّنْ زَّايْسنْ، بُولُوسْ، ثُوغَا-ث ذ أَمقّْرَانْ ن لِيضْطِيهَاذْ ن وُوذَاينْ إِمَاسِيحِييّنْ، مَاشَا يُوسَا-د غَارْ لِيمَانْ ذِي لْمَاسِيحْ أَوَارْنِي ڒَْامِي د-إِضْهَارْ لْمَاسِيحْ غَارسْ إِجّْ ن ثْفَاوْثْ ثَامقّْرَانْثْ ذڭْ وبْرِيذْ نّسْ غَارْ ذِيمَاشْقْ ونِّي يُومُورنْ بُولُوسْ مَاحنْذْ أَذْ إِبَارّحْ ڒخْبَارْ أَصبْحَانْ ن يَاسُوع لْمَاسِيحْ إِ مَارَّا إِوْذَانْ ذ مَارَّا إِيْذُوذنْ.

أَرْيَازْ-أَ بُولُوسْ ذ ثنْعَاشْ ن إِمَازَاننْ ثُوغَا-ثنْ مَارَّا ذ ؤُذَاينْ ؤُشَا نِيثْنِي مَارَّا ؤُمْننْ ذِي لْمَاسِيحْ، ؤُمْننْ أَقَا-ث ذ لْمَاسِيحْ إِتّْوَاوَاعْذنْ إِ ڒْْڭنْسْ ن وُوذَاينْ س ؤُقمُّومْ ن إِنَابِييّنْ نْسنْ. نِيثْنِي مَارَّا خذْمنْ أَكْ وَايَاوْيَا مَاحنْذْ أَذْ سّعْذُونْ ڒخْبَارْ بلِّي يَاسُوع لْمَاسِيحْ أَقَا-ث ذ "هَا-مَاشِييَاخْ" (=لْمَاسِيحْ)، ونِّي إِثْوَاذهْننْ زِي أَربِّي مَاحنْذْ أَذْ إِسّنْجمْ إِوْذَانْ نّسْ. إِوْذَانْ نّسْ ذ ينِّي يُومْننْ ذِي يَاسُوع لْمَاسِيحْ زِي مَارَّا ثِيقبَّاڒْ ؤُ زِي مَارَّا ڒڭْنُوسْ ؤُ زِي مَارَّا ثِيمُّورَا

شَا ن إِمَازَاننْ ن لْمَاسِيحْ ذ بُولُوسْ ذ ؤُنضْفَارْ أَخدَّامْ ن بُولُوسْ لُوقَا، أَضْبِيبْ، (بَالَاكْ ثُوغَا-ث ذ أَيُونَانِي)، أَقَا ؤُرَانْ زّْيَاذَا ن إِذْلِيسنْ نِّي د-إِثْوَاخڒْقنْ زِي أَرُّوحْ إِقدّْسنْ ن أَربِّي، تّْوَاسّْننْ ڒُْوخَا أَمْ لْ'إِنْجِيلْ. خنِّي إِتّْوَامَارْنِي لْ'إِنْجِيلْ غَارْ ثْڒَاثَا ن إِسْمُونِيثنْ ن إِذْلِيسنْ ن وُوذَاينْ (ثْهْoرَاهْ، كثُوبِيمْ ذ نبِييِيمْ)   إِنِّي ثُوغَا-ثنْ قْبڒْ ؤُ أَمُّو إِ كوّْننْ نِيثْنِي س أَربْعَا ثِيرَا إِقدّْسنْ أَڒْ أَسّْ-أَ.

ذِي لْ'إِنْجِيلْ نتَّافْ ذَايْسْ أَربْعَا ن إِمزْرُوينْ ن يَاسُوع لْمَاسِيحْ، أَذْلِيسْ 'ڒخْذَايمْ ن إِمَازَاننْ (=رُّوسُولْ)' ؤُ كْثَارْ قدَّا ن ثبْرَاثِينْ د-إِتّْوَاوحَّانْ إِتّْوَارِينْ س ؤُفُوسْ ن إِمَازَاننْ إِ لْكَانَايِيسْ (=ثِيمسْمُونِينْ) ن وُوسَّانْ نِّي ؤُ إِ شَا ن إِنضْفَارنْ إِخدَّامنْ. غَارْ ؤُنڭَّارْ ن لْ'إِنْجِيلْ مَارَّا نتَّافْ أَذْلِيسْ 'أَسَارْڭبْ' س ؤُفُوسْ ن ؤُمَازَانْ يُوحَانَّا غَارْ ؤُنڭَّارْ ن لْقَارْنْ ؤُمزْوَارُو أَوَارْنِي إِ ثْڒَاڒِيثْ ن لْمَاسِيحْ. ذڭْ وذْلِيسْ-أَ إِسِّيوڒْ يُوحَانَّا خْ يِيجّْ ن ؤُوحْهِي ذ أَمقّْرَانْ ؤُ خْ ثْمسْڒَايِينْ ن تُّوقَاثْ ن دُّونِّيثْ. إِذْلِيسنْ-أَ خنِّي ذ أَسْمُونِي وِيسّْ أَربْعَا ن إِذْلِيسنْ إِنِّي إِكوّْننْ جْمِيعْ ثِيرَا إِقدّْسنْ ن وُوذَاينْ، قَّارنْ أَسْ لِينْجِيلْ نِيغْ ڒْْعَاهْذْ أَجْذِيذْ.

غَارْ ؤُبلّعْ ن وذْلِيسْ-أَ غَارْ ؤُنڭَّارُو ن ڒشْثَابْ إِقدّْسنْ نْثَافْ أَوَاڒنْ-أَ:

"نشّْ شهّْذغْ إِ مَارَّا إِنِّي إِتّسْڒَانْ أَوَاڒنْ ن أَربِّي زڭْ وذْلِيسْ-أَ، مَاڒَا ذِينْ حذْ ونِّي خَاسنْ إِ غَا يَارْنِينْ (خْ وَاوَاڒنْ-أَ)، أَربِّي أَذْ خَاسْ إِغْضڒْ جّْرَايحْ ثِينِّي إِثْوَارِينْ ذڭْ وذْلِيسْ-أَ. مَاڒَا شَا ن إِجّنْ أَذْ إِكّسْ زڭْ وَاوَاڒنْ ن أَربِّي زڭْ وذْلِيسْ-أَ، أَذْ أَسْ إِكّسْ أَربِّي ثَاسْغَارْثْ نّسْ زِي ثْشجَّارْثْ ن ثُوذَارْثْ ؤُ زِي ثنْذِينْثْ إِقدّْسنْ ؤُ زِي مِينْ يُورَانْ ذڭْ وذْلِيسْ-أَ.   ونِّي إِشهّْذنْ خْ مَانْ أَيَا، إِقَّارْ ”وَاهْ، نشّْ أَذْ د-أَسغْ ذغْيَا!“ ”أَمِينْ! أَسْ-د، أَ سِيذِي يَاسُوع!“ . ڒْخَاضَارْ ن سِيذِي يَاسُوع لْمَاسِيحْ أَذْ ثِيڒِي أَكْ-ذ مَارَّا إِمْقدَّاسنْ. أَمِينْ !".

(أَسَارْڭبْ 22:18-21)

إِنَا ذ أَوَاڒنْ إِنڭُّورَا ن وذْلِيسْ إِقدّْسنْ ( 'بِيبْل'). أَذْلِيسْ إِقدّْسنْ وَانِيثَا إِبْذَا س ثْڒَاثَا ن إِسْمُونِيثنْ ن إِذْلِيسنْ زڭْ وُوذَاينْ: 'ثْوْورَاهْ'، 'كثُوبِيمْ' ذْ 'نبِييِيمْ'، قَّارنْ أَسنْ س ثْڒَاثَا 'ڒْْعَاهْذْ أَقْذِيمْ'. خنِّي أَوَارْنِي مَانْ أَيَا غَارْ ؤُنڭَّارُو ن وذْلِيسْ إِقدّْسنْ أَقَا ذِينْ إِجّْ ن ؤُسْمُونِي ن إِذْلِيسنْ (أَسْمُونِي-يَا إِثْوَاسُّوفُّوغْ-د ؤُڒَا س ؤُفُوسْ ن وُوذَاينْ نِّي يُومْننْ ذِي لْمَاسِيحْ ؤُ قَّارنْ أَسْ إِ ؤُسْمُونِي-يَا ؤُنڭَّارْ لْ'إِنْجِيلْ، إِخْسْ أَذْ يِينِي ڒخْبَارْ أَصبْحَانْ ن يَاسُوع لْمَاسِيحْ، ونِّي قَّارنْ أَسْ عَاوذْ 'ڒْْعَاهْذْ ن جْذِيذْ'.

سْ ؤُينِّي ذِينْ مْغِيرْ   إِجّْ ن وذْلِيسْ ن أَربِّي إِ يُورَانْ س ونْذَاهْ ن أَرُّوحْ إِقدّْسنْ ن أَربِّي س ؤُفُوسْ ن وَاطَّاسْ ن إِوْذَانْ إِنِّي ثُوغَا مَارَّا ذ ؤُذَاينْ (بَالَاكْ لُوقَا وَاهَا إِ وَارْ إِدْجِينْ ذ ؤُذَايْ) ؤُ أَذْلِيسْ ن أَربِّي وَانِيثَا إِثْوَابْضَانْ ذِي ڒْْعَاهْذْ أَقْذِيمْ ذ ڒْْعَاهْذْ أَجْذِيذْ.