مَانْ ڒْْمعْنَا ن ثْغَارْصْثْ ن إِبْرَاهِيمْ إِ مِّيسْ؟

أَذْلِيسْ إِقدّْسنْ ذَايْسْ أَطَّاسْ ن إِمزْرُوينْ ذ ڒمْثُوڒْ ؤُشَا نْزمَّارْ أَذْ زَّايْسنْ نڒْمذْ أَطَّاسْ ن ثْمسْڒَايِينْ.

أَمزْرُويْ ن إِبْرَاهِيمْ ؤُ مَامّشْ ثُوغَا إِقدّمْ مِّيسْ ذ ثَاغَارْصْثْ (=دّْبِيحثْ) إِ أَربِّي، أَقَا-ت ذ إِجّْ ن ؤُمزْرُويْ إِصْبحْ أَطَّاسْ.

ذڭْ وذْلِيسْ أَمزْوَارُو 22:2 زڭْ وذْلِيسْ إِقدّْسنْ، نْژْرَا أَقَا أَربِّي إِنَّا إِ إِبْرَاهِيمْ:

"كْسِي ڒخُّو أَينِّي ن مِّيشْ، ونِّي ثخْسذْ، إِسْحَاقْ، ؤُشَا رُوحْ غَارْ ثمُّورْثْ ن مُورِييَا

ؤُشَا ثْقدّْمذْ ث ذِينْ ذ ثَاغْرَاصْثْ خْ يِيجّنْ زڭْ إِذُورَارْ إِ ذ أَشْ إِ غَا إِنِيغْ. "

أَقَا ذَا إِبْرَاهِيمْ، بَابَاسْ ن إِسْحَاقْ ونِّي ذ أَينِّي ن مِّيسْ ن إِبْرَاهِيمْ إِ ثُوغَا ث إِتّْرَاجَا أَطْثَاسْ ن ڒْْوقْثْ عْلَاحْسَابْ ن لْوَاعْذْ ن أَربِّي. إِبْرَاهِيمْ ثُوغَا إِتّخْسْ إِسْحَاقْ أَطْثَاسْ. أَرّبِي إِتَّارْ زَّايسْ مَاحنْذْ أَذْ إِقدّمْ مِّيسْ ذ ثَاغَارْصْثْ. إِبْرَاهِيمْ ثُوغَا إِتّڭّْ أَسْ أَرَّايْ أَطَّاسْ. إِكْسِي أَكِيذسْ ثِيمسِّي ذ ڒْْمُوسْ إِقْضعْ ؤُ إِڭَّا إِكشُّوضنْ إِ ثْمسِّي خْ ثِيغَارْذِينْ ن إِسْحَاقْ ؤُشَا أَمُّو رُوحنْ نِيثْنِي جْمِيعْ غَارْ ومْشَانْ إِ ثُوغَا إِنيّشْ أَربِّي. ڒَْامِي ذِينْ إِوْضنْ نِيثْنِي س ثْنَاينْ، إِقّنْ إِبْرَاهِيمْ مِّيسْ خْ إِكشْوَاضْ ؤُشَا إِكْسِي ڒْْمُوسْ إِقْضعْ مَاحنْذْ أَذْ أَسْ إِغَارْصْ. إِبَانْ-د مْلِيحْ بلِّي إِبْرَاهِيمْ ثُوغَا إِطَّاعْ نِيشَانْ إِ أَربِّي بْڒَا ڒْْعِيبْ. خنِّي أَربِّي وَارْ ث إِجِّي أَذْ إِغَارْصْ إِ مِّيسْ إِسْحَاقْ حِيمَا وَارْ إِتّْمتِّي شَا. ذڭْ وذْلِيسْ إِقدّْسنْ ذِي ثبْرَاثْ إِ إِعْبْرَانِييّنْ 11:19 نتَّافْ بلِّي إِبْرَاهِيمْ ”ثُوغَا إِخَارّصْ بلِّي أَربِّي إِزمَّارْ عَاوذْ أَذْ ث-إِدّْ إِسّْنكَّارْ زڭْ إِمتِّيننْ، زِي مَانِيسْ ث-إِدّْ إِكْسِي غَارْسْ عَاوذْ أَمْ إِجّْ ن لْمَاثَالْ ." مَا وَارْ إِدْجِي مَانْ أَيَا ذ إِجّْ ن لْمَاثَالْ ذ أَمقّْرَانْ ن ثغْرَاصْثْ إِغْڒَانْ ذ ثَامقّْرَانْثْ خْ مَارَّا ثِيغَارْصِينْ (=دّْبَايحْ): يَاسُوع لْمَاسِيحْ ونِّي إِمُّوثنْ خْ صَّالِيبْ ذِي طّْوعْ نّغْ!

يَاسُوع لْمَاسِيحْ إِنَّا:

"أَمُّو إِخْسْ أَربِّي دُّونِّيثْ أَڒْ مَانِي إِوْشَا أَينِّي ن مِّيسْ

حِيمَا كُوڒْ إِجّنْ ونِّي زَّايسْ إِ غَا يَامْننْ، وَارْ إِتّْمتِّي شَا

مَاشَا أَذْ غَارْسْ ثِيڒِي ثُوذَارْثْ ن ڒبْذَا.

مِينْزِي أَربِّي وَارْ د-إِسّكّْ شَا مِّيسْ غَارْ دُّونِيثْ حِيمَا أَذْ إِحَاسبْ دُّونِّيثْ،

مَاشَا إِسّكّْ إِثْ-إِدّْ حِيمَا أَذْ زَّايسْ إِسّنْجمْ دُّونِيثْ.

ونِّي زَّايسْ إِ غَا يَامْننْ وَارْ إِتّثْوَاحَاسبْ شَا،

مَاشَا ونِّي وَارْ إِتِّيمْننْ شَا أَقَا إِثْوَاحَاسَابْ زِي ڒخُّو

مِينْزِي نتَّا وَارْ يُومِينْ شَا ذڭْ يِيسمْ ن ؤُينِّي ن مِّيسْ ن أَربِّي."

(لِينْجِيلْ س ؤُفُوسْ ن يُوحَانَّا 3:16-18)

وَاهْ، أَربِّي ثْبَابَاثْ إِتّخْسْ شكْ/شمْ أَڒَامِي إِوْشَا أَينِّي ن مِّيسْ إِ إِوعْذنْ زَّايسْ زِّيشْ، حِيمَا وَا - أَمْ ثُوغَا يَاربُّو صَّالِيبْ نّسْ - ثُوغَا إِرَاحْ غَارْ جُولْجُوثَا (إِشْثْ ن ثوْرِيرْثْ ثُوذسْ ن ؤُرْشَالِيمْ)، غَارْ ومْشَانْ إِنيّشْ إِثْ أَربِّي ذ أَمْشَانْ ن ثغْرَاصْثْ. أَقَا-ث ذ مِّيسْ ن أَربِّي إِكمّْرنْ قَاعْ، أَقَا إِثْوَاعَاقبْ ذِي سِّيبّثْ ن دّْنُوبْ نّغْ، وَاخَّا أَمنِّي وَارْ ذَايْسْ إِثْوَافْ ؤُڒَا ذ إِجّْ ن ؤُخطْثُو. أَمُّو ثُوغَا إِقدّمْ إِخفْ نّسْ ذ دّْبِيحثْ يَارْضَانْ إِ أَربِّي ؤُ خْ ؤُينِّي إِسّْنكَّارْ إِثْ-د أَربِّي زڭْ إِمتِّيننْ! أَقَا إِدَّارْ أَسّْ-أَ ؤُرَا زِي ڒبْذَا إِڒبْذَا قَاعْ! س وَانِيثَا إِمّوْشْ  أَنغْ أَغْفَارْ إِ دّْنُوبْ نّغْ ؤُڒَا ذ ثُوذَارْثْ ن ڒبْذَا س لِيمَانْ ذَايْسْ!

"خْ ؤُينِّي مَاڒَا حذْ ذِي لْمَاسِيحْ إِ إِدْجْ،

أَقَا نتَّا إِثْوَاخْڒقْ-د ذ جْذِيذْ،

خنِّي مِينْ إِدْجَانْ ذ أَقْذِيمْ إِعْذُو،

خْژَارْ، أَقَا مَارَّا إِذْوڒْ ذ جْذِيذْ.

(2 كُورْ. 5:17)