مَا إِقَّارْ وذْلِيسْ إِقدّْسنْ س ثِيذتّْ بلِّي يَاسُوع لْمَاسِيحْ إِمُّوثْ خْ صَّالِيبْ؟

مَا ڭُّورْ أَذْ أَشْ ث ثَاذفْ ذڭْ ؤُزدْجِيفْ خْمِي ذ أَشْ إِ غَا يِينِي ونِّي غَارْ إِدْجَانْ 33 إِسڭّْوُوسَّا، ونِّي إِ خَافكْ إِعِيزّنْ أَطَّاسْ، ذ ونِّي أَمقّْرَانْ نّشْ، أَقَا ڭُّورْ أَذْ كِيكْ إِسِّيوڒْ س ثْحبَّا بلِّي ڭُّورْ أَذْ إِثْوَاعدّبْ زِي بْنَاذمْ ؤُ ڭُّورْ أَذْ إِمّثْ ذغْيَا خْ صَّالِيبْ ؤُ ڭُّورْ أَذْ د-إِثْوَاسْنكَّارْ أَوَارْنِي ثْڒَاثَا ن وُوسَّانْ؟

ذْ مَانْ أَيَا إِ إِمْسَارنْ إِ إِمحْضَارنْ ن يَاسُوع لْمَاسِيحْ ڒَْامِي ث ثُوغَا أَكِيذْسنْ.

 

يَاسُوع ثُوغَا إِسّنْ قْبڒْ خْ ڒْْموْثْ نّسْ خْ صَّالِيبْ ؤُ ثُوغَا إِسّنْ بلِّي إِتّْخصَّا أَذْ ثِيڒِي إِ ؤُسنْجمْ ن بْنَاذمْ ؤُ ثُوغَا إِنْوَا نِيشَانْ ؤُ إِعمّذْ مَاحنْذْ أَذْ خَاسْ يكّْ ؤُعدّبْ ن ؤُصلّبْ (لْعِيقَابْ ن إِرُومَانِييّنْ إِ إِقْطَاطْعِييّنْ) ؤُ نتَّا ثُوغَا إِعمّذْ أَذْ إِكْسِي مِينْ إِوْعَارنْ بْڒَا قطُّو خْ مَانْ أَيَا، زعْمَا أَمْسبْضَا إِكمّْڒنْ خْ بَابَاسْ ذڭْ إِجنْوَانْ ذِي ثْسَاعَاثِينْ نِّي خْ صَّالِيبْ، أَمْسبْضَا ونِّي ذ ڒْْعِيقَابْ (=أَودّبْ) ن أَربِّي إِ دّنْبْ إِ إِتّْخصَّانْ أَذْ د-يَاسْ خْ أَذَامْ، إِخْسْ أَذْ يِينِي خْ مَارَّا إِوْذَانْ. أَمُّو ڭُّورْ أَذْ كمّْڒنْ نُّوبُووَاثْ خَاسْ ؤُ أَمُّو إِذْوڒْ نتَّا ذ إِزْمَارْ ن أَربِّي إِصْفَانْ بْڒَا ڒْْعِيبْ (ڒَْامِي وَارْ إِتّْوِيفْ ذَايْسْ ؤُڒَا ذ إِجّْ ن دّنْبْ) مَاحنْذْ أَذْ إِكّسْ دّنْبْ خْ دُّونِيثْ.

 

لْ'إِنْجِيلْ إِسَّاوَاڒْ خْ ثْڒَاثَا ن ثْوَاڒَاوِينْ مِينْ ذِي إِبَارّحْ يَاسُوع لْمَاسِيحْ س صّْفَايثْ   إِ إِمحْضَارنْ نّسْ خْ ؤُعدّبْ ؤُ خْ ڒْْموْثْ نّسْ. أَذْ أَشْ نسّْشنْ سْوَادَّايْ مِينْ إِنَّا. ثْڒَاثَا ن ثْوَاڒَاوِينْ-أَ ثْوَاسجّْلنْ س ؤُفُوسْ ن ثْڒَاثَا ن إِمحْضَارنْ نّسْ ذِي لْ'إِنْجِيلْ! أَذْ أَشْ ثنْ-د نْقدّمْ ڒخُّو سْوَادَّايْ ...

 

يَاسُوع لْمَاسِيحْ إِسَّاوَاڒْ خْ ؤُعدّبْ ذ ڒْْموْثْ نّسْ إِ ثْوَاڒَاثْ ثَامزْوَارُوثْ

زِي سّنِّي إِبْذَا يَاسُوع أَذْ إِسّْشنْ إِ إِمحْضَارنْ نّسْ بلِّي إِتّْخصَّا أَسْ أَذْ إِرَاحْ غَارْ ؤُرْشَالِيمْ، أَذْ إِودّبْ أَطَّاسْ زڭْ إِمْغَارنْ ن ڒْْڭنْسْ ذ أَرُّويَاسْ ن إِكهَّاننْ ذ إِمْسڒْمَاذنْ ن إِذْلِيسنْ، أَذْ إِثْوَانغْ ؤُشَا أَذْ د-إِثْوَاسّْنكَّارْ ذڭْ وَاسّْ وِيسّْ ثْڒَاثَا. بُوطْرُوسْ خنِّي إِكْسِي ث غَارْسْ، إِبْذَا إِتّْمنْغَا أَكِيسْ، إِنَّا ”سِيذِي أَربِّي أَذْ شكْ يَارْحمْ، أَ سِيذِي، مَانْ أَيَا وَارْ ذ أَشْ إِتّمْسَارْعمَّارْصْ.“ مَاشَا نتَّا إِنّقْڒبْ، إِنَّا إِ بُوطْرُوسْ ”فّغْ خَافِي، أَ شِّيطَانْ، شكْ ذ إِشْثْ ن ثْعنْكْرِيفْثْ إِ نشّْ، مِينْزِي شكْ وَارْ ذ أَشْ إِشْقِي مِينْ إِدْجَانْ ن أَربِّي، مَاشَا مِينْ إِدْجَانْ ن إِوْذَانْ.“ (لِينْجِيلْ س ؤُفُوسْ ن مَاتَّا 16:21-23)

 

إِبْذَا إِسّڒْمَاذْ أَقَا مِّيسْ ن بْنَاذمْ إِتّْخصَّا أَسْ أَذْ إِودّبْ أَطَّاسْ ؤُشَا أَذْ إِثْوَاسّحْقَارْ زڭْ إِمْغَارنْ ن ڒْْڭنْسْ ذ أَرُّويَاسْ ن إِكهَّاننْ ذ إِمْسڒْمَاذنْ ن إِذْلِيسنْ، أَذْ ث نْغنْ ؤُشَا أَوَارْنِي ثْڒَاثَا ن وُوسَّانْ أَذْ د-إِكَّارْ عَاوذْ. إِنَّا أَوَاڒْ-أَ س بْطَايْطَايْ. خنِّي إِكْسِي ث بُوطْرُوسْ غَارْسْ غَارْ ؤُغزْذِيسْ ؤُشَا إِبْذَا إِتّْوبّخْ إِثْ. مَاشَا إِنّقْڒبْ، إِخْژَارْ ذڭْ إِمحْضَارنْ نّسْ ؤُشَا إِوبّخْ بُوطْرُوسْ، إِقَّارْ ”أَڭّْوجْ خَافِي أَوَارْنِي أَيِي، أَ شِّيطَانْ، مِينْزِي شكْ وَارْ ذ أَشْ إِشْقِي مِينْ إِدْجَانْ ن أَربِّي، مَاشَا مِينْ إِدْجَانْ ن إِوْذَانْ.“ (لِينْجِيلْ س ؤُفُوسْ ن مَارْكُو 8:31-32)

 

إِنَّا ”إِتّْخصَّا إِ مِّيسْ ن بْنَاذمْ أَذْ إِودّبْ أَطَّاسْ ؤُشَا أَذْ إِمّنْضَارْ زڭْ إِمْغَارنْ ن ڒْْڭنْسْ ذ أَرُّويَاسْ ن إِكهَّاننْ ذ إِمْسڒْمَاذنْ ن إِذْلِيسنْ، أَذْ إِثْوَانغْ ؤُشَا ذڭْ وَاسّْ وِيسّْ ثْڒَاثَا أَذْ د-إِكَّارْ.“ (لِينْجِيلْ س ؤُفُوسْ ن لُوقَا 9:22)

 

يَاسُوع لْمَاسِيحْ إِسَّاوَاڒْ خْ ؤُعدّبْ ذ ڒْْموْثْ نّسْ إِ ثْوَاڒَاثْ وِيسّْ ثْنَاينْ

 

ڒَامِي ثنْ ثُوغَا جْمِيعْ ذِي لْجَالِيلْ، إِنَّا يَاسُوع إِ إِمحْضَارنْ نّسْ ”مِّيسْ ن بْنَاذمْ أَذْ إِثْوَاسلّمْ ذڭْ إِفَاسّنْ ن إِوْذَانْ أَذْ ث نْغنْ ؤُشَا أَذْ د-إِثْوَاسّْنكَّارْ ذڭْ وَاسّْ وِيسّْ ثْڒَاثَا.“ خنِّي شضْننْ أَطَّاسْ. (لِينْجِيلْ س ؤُفُوسْ ن مَاتَّا 17:22-23)

 

فّْغنْ-د سّنِّي ؤُشَا شُوقنْ ذِي لْجَالِيلْ ؤُ نتَّا ثُوغَا وَارْ إِخْسْ أَذْ إِسّنْ مَانْ أَيَا ؤُڒَا ذ إِجّْ. مِينْزِي ثُوغَا إِسّڒْمَاذْ إِمحْضَارنْ نّسْ، إِقَّارْ أَسنْ ”أَقَا مِّيسْ ن بْنَاذمْ أَذْ إِثْوَاسلّمْ ذڭْ إِفَاسّنْ ن إِوْذَانْ، أَذْ ث نْغنْ ؤُشَا أَوَارْنِي ڒَْامِي ث إِ غَا نْغنْ، أَذْ د-إِكَّارْ أَوَارْنِي ثْڒَاثَا ن وُوسَّانْ.“ مَاشَا نِيثْنِي وَارْ فْهِيمنْ إِ وَاوَاڒْ-أَ ؤُشَا ڭّْوذنْ أَذْ ث سّقْسَانْ خْ ؤُيَا. (لِينْجِيلْ س ؤُفُوسْ ن مَارْكُو 9:30-32)

 

مَارَّا تّْعجْبنْ ذِي ڒمْغَارثْ ن أَربِّي. ؤُمِي تّْبهْثنْ مَارَّا ذِي مَارَّا مِينْ إِڭَّا، إِنَّا إِ إِمحْضَارنْ نّسْ ”ڭّمْ ؤُڒَا ذ كنِّيوْ أَوَاڒنْ-أَ ذڭْ إِمزُّوغنْ نْومْ، مِينْزِي مِّيسْ ن بْنَاذمْ أَذْ إِثْوَاسلّمْ غَارْ إِفَاسّنْ ن إِوْذَانْ.“ مَاشَا نِيثْنِي وَارْ فْهِيمنْ إِ وَاوَاڒْ-أَ، ثُوغَا إِثْوَاسّْنُوفَّارْ خَاسنْ مَاحنْذْ وَارْ ذ أَسْ فهّْمنْ. ؤُشَا نِيثْنِي ڭّْوذنْ أَذْ ث سّقْسَانْ خْ وَاوَاڒْ-أَ. (لِينْجِيلْ س ؤُفُوسْ ن لُوقَا 9:43-45)

 

يَاسُوع لْمَاسِيحْ إِسَّاوَاڒْ خْ ؤُعدّبْ ذ ڒْْموْثْ نّسْ إِ ثْوَاڒَاثْ وِيسّْ ثْڒَاثَا

 

ڒَامِي إِڭَاعّذْ يَاسُوع غَارْ ؤُرْشَالِيمْ، يِيوِي ثنْعَاشْ ن إِمحْضَارنْ نّسْ غَارْ ؤُغزْذِيسْ ذڭْ وبْرِيذْ، إِنَّا أَسنْ ”خْژَارْ، أَذْ نْڭَاعّذْ غَارْ ؤُرْشَالِيمْ ؤُشَا أَذْ سلّْمنْ مِّيسْ ن بْنَاذمْ إِ أَرُّويَاسْ ن إِكهَّاننْ ذ إِمْسڒْمَاذنْ ن إِذْلِيسنْ ؤُ نِيثْنِي أَذْ خَاسْ حكْمنْ س ڒْْموْثْ. نِيثْنِي أَذْ ث سلّْمنْ إِ ڒڭْنُوسْ مَاحنْذْ أَذْ زَّايسْ سْثهْزَانْ، أَذْ ث هتّْكنْ س ؤُركُّوضْ ؤُشَا أَذْ ث صلّْبنْ، خنِّي ذڭْ وَاسّْ وِيسّْ ثْڒَاثَا أَذْ د-إِثْوَاسّْنكَّارْ.“ (لِينْجِيلْ س ؤُفُوسْ ن مَاتَّا 20:17-19)

 

ثُوغَا-ثنْ ذڭْ وبْرِيذْ غَارْ ؤُرْشَالِيمْ. يَاسُوع ثُوغَا إِزَّارْ أَسنْ ؤُشَا ثُوغَا نِيثْنِي تّْبهْثنْ ؤُ إِنِّي ث-إِدّْ إِضْفَارنْ، ڭّْوذنْ. إِكْسِي عَاوذْ ثنْعَاشْ غَارْ ؤُغزْذِيسْ ؤُشَا إِبْذَا إِقَّارْ أَسنْ خْ مِينْ ذ أَسْ إِ غَا إِمْسَارنْ ”أَقَا نشِّينْ أَذْ نْڭَاعّذْ غَارْ ؤُرْشَالِيمْ ؤُ مِّيسْ ن بْنَاذمْ أَذْ إِثْوَاسلّمْ إِ أَرُّويَاسْ ن إِكهَّاننْ ذ إِمْسڒْمَاذنْ ن إِذْلِيسنْ ؤُ نِيثْنِي أَذْ خَاسْ حكْمنْ س ڒْْموْثْ، أَذْ ث سلّْمنْ إِ ڒڭْنُوسْ، أَذْ ث سّْحقَارنْ، أَذْ ث هتّْكنْ س ؤُركُّوضْ، أَذْ خَاسْ سُّوسْفنْ، أَذْ ث نْغنْ ؤُشَا ذڭْ وَاسّْ وِيسّْ ثْڒَاثَا أَذْ د-إِكَّارْ.“ (لِينْجِيلْ س ؤُفُوسْ ن مَارْكُو 10:32-34)

 

إِكْسِي غَارسْ ثنْعَاشْ، إِنَّا أَسنْ ”أَذْ نْڭَاعّذْ غَارْ ؤُرْشَالِيمْ ؤُشَا أَذْ إِثْوَاقْفڒْ إِ مِّيسْ ن بْنَاذمْ مَارَّا مِينْ يُورَانْ زڭْ إِنَابِييّنْ. مِينْزِي نتَّا أَذْ إِثْوَاسلّمْ إِ ڒڭْنُوسْ، أَذْ ث سّحْقَارنْ، أَذْ زَّايسْ سّْبهْثْڒنْ، أَذْ ث ثكّْوَارنْ ؤُشَا أَذْ خَاسْ سُّوسْفنْ، أَذْ ث هتّْكنْ س ؤُركُّوضْ، أَذْ ث نْغنْ ؤُشَا ذڭْ وَاسّْ وِيسّْ ثْڒَاثَا أَذْ د-إِكَّارْ.“ نِيثْنِي وَارْ فْهِيمنْ وَالُو زِي مَانْ أَيَا. ثُوغَا أَوَاڒْ-أَ إِفَّارْ خَاسنْ ؤُشَا وَارْ فْهِيمنْ مِينْ إِثْوَانَّانْ. (لِينْجِيلْ س ؤُفُوسْ ن لُوقَا 18:31-34)

 

مَا ثْحكَّارذْ أَوَاڒْ-أَ ن إِمحْضَارنْ نّسْ: "نِيثْنِي وَارْ فْهِيمنْ وَالُو زِي مَانْ أَيَا. ثُوغَا أَوَاڒْ-أَ إِفَّارْ خَاسنْ ؤُشَا وَارْ فْهِيمنْ مِينْ إِثْوَانَّانْ."  ثْڒَاثَا ن إِمُورنْ إِشَارّحْ يَاسُوع لْمسِيحْ ڒْْخَاضَارْ نّسْ إِ بْنَاذمْ ؤُشَا إِڭَّا إِثْ إِ ؤُسنْجمْ نّغْ، إِڭَّا إِثْ إِ نشِّينْ مَاحنْذْ أَذْ نفْهمْ نِيشَانْ بلِّي أَقَا نتَّا إِسَّاوَاڒْ-د غَارْنغْ. مَاغَارْ نشِّينْ نْفهّمْ مْغِيرْ س شْوَايْثْ شْوَايْثْ ثِيمسْڒَايِينْ ن أَربِّي زِي سِّيبّثْ ن دّنْبْ ذڭْ وُوڒْ نّغْ ذ ؤُمْعَارِّي نّغْ أَكْ-ذ مِينْ إِخْسْ نتَّا. مشْحَاڒْ ن إِوْذَانْ ذِي دُّونِّيثْ نكَّارنْ نِيغْ وَارْ تِّيمْننْ بلِّي يَاسُوع إِثْوَاصلّبْ ؤُ مشْحَاڒْ وَارْ ث فْهِيمنْ قَاعْ، وَاخَّا زمَّارنْ أَذْ غَارنْ لْ'إِنْجِيلْ ؤُ وَاخَّا سْڒِينْ إِ مَانْ أَيَا مَارَّا!

 

أجّْ أَنغْ أَذْ نِيڒِي نسّنْ إِلَّا دّنْبْ إِتَّاوِي غَارْ ڒْْموْثْ. أَمنْ ذِي يَاسُوع لْمَاسِيحْ ونِّي إِ ذ أَنغْ إِتِّيشنْ ثُوذَارْثْ، مَاغَارْ مَاڒَا نْشَارْشْ ذِي ڒْْموْثْ نّسْ س لِيمَانْ أَذْ نْشَارْشْ ؤُڒَا ذِي ثْنُوكْرَا نّسْ لِيمَانْ.

 

أَربِّي وَارْ إِسِّيوڒْ شَا مْغِيرْ ثْڒَاثَا ن إِمُورنْ وَاهَا س ؤُقمُّومْ ن يَاسُوع لْمَاسِيحْ ڒَْامِي إِدَّارْ جَارَانغْ ؤُ ثُوغَا إِسَّاوَاڒْ أَكْ-ذ إِمحْضَارنْ نّسْ، مَاشَا أَربِّي ثُوغَا إِنبَّا مَانْ أَيَا س وَاطَّاسْ ن إِبْرِيذنْ ذڭْ إِذْلِيسنْ ن مُوسَا ذ إِنَابِييّنْ قْبڒْ مَّا د-يُوسَا لْمَاسِيحْ غَارْ ثمُّورْثْ ذِي صْسِيفثْ ن يِيجّْ ن بْنَاذمْ.

 

بَالَاكْ أَذْ ثِينِيذْ أَمشْنَاوْ إِمحْضَارنْ أَقَا وَارْ ثفْهِيمذْ مَانْ أَيَا. مَا نِيشَانْ؟

مَامّشْ ثْخَارَّاصذْ أَذْ ثسّْنذْ أَذْ ثْفهْمذْ ونِّي شكْ د-إِخڒْقنْ؟ مَا وَارْ يدْجِي نتَّا بْڒَا ڒعْبَارْ ذ أَمقّْرَانْ خَانغْ؟ إِتّْخصَّا أَنغْ أَذْ نقْبڒْ مِينْ إِقَّارْ أَربِّي ؤُ أَذْ نَارْزمْ ؤُڒْ نّغْ ؤُ أَذْ نْخَارّصْ ذِي مِينْ إِقَّارْ. إِتّْخصَّا أَذْ نَامنْ ذِي أَربِّي ؤُ ذِي رِيخْضَارثْ نّسْ مَاحنْذْ أَذْ يجّْ مِّيسْ أَذْ إِثْوَاسمَّارْ خْ صَّالِيبْ ذِي طّْوعْ ن إِمذْنَابْ! وَارْ ذِينِّي مِينْ إِ غَا إِقْبڒْ ؤُخَارّصْ ن بْنَاذمْ ذِي مَانْ أَيَا، أَقَا-ث ذ ثِيمڭَّا ن أَربِّي زِي ثَايْرِي نّسْ وَارْ إِتّنْحذِّينْ. مڒْمِي مَّا نبْذَا ذغْيَا أَذْ ث نقْبڒْ، ڭُّورْ أَذْ نسّنْ بعْذَا شْوَايْثْ كْثَارْ.

 

أجّْ أَنغْ أَذْ نْغَارْ إِجّْ زِي أَربْعَا ن إِسَاوْضنْ ذِي لِينْجِيلْ س ؤُفُوسْ ن مَاتَّا 27 ذ 28 خْ ؤُصلّبْ مَاغَارْ ذ ونِّي ذ ثْوَارِيثْ خْ ؤُسقْسِي إِ إِدْجَانْ سنّجْ إِ ثوْرِيقْثْ.

 

يَاسُوع قِيبَاتْشْ إِ لْعمِيلْ بِيلَاطُوسْ (مَارْ. 15:2-5؛ لُوكْ. 23:3-5؛ يُوحْ. 18:33-38)

يَاسُوع ثُوغَا إِبدّْ قِيبَاتْشْ إِ لْعمِيلْ. لْعمِيلْ إِسّقْسَا أَسْ، إِنَّا ”مَا شكْ ذ أَجدْجِيذْ ن وُوذَاينْ؟“ يَاسُوع إِنَّا أَسْ ”شكْ ثنِّيذْ ث.“ ؤُشَا ڒَْامِي ث ثهْمنْ أَرُّويَاسْ ن إِكهَّاننْ ذ إِمْغَارنْ ن ويْذُوذْ، يَارّْ-د س وَالُو. خنِّي إِنَّا أَسْ بِيلَاطُوسْ ”مَا وَارْ ثسْڒِيذْ مشْحَاڒْ خَاكْ شهْذنْ؟“ نتَّا وَارْ د خَاسْ يَارِّي ؤُڒَا خْ إِجّْ ن وَاوَاڒْ، أَڒَامِي إِقِّيمْ لْعمِيلْ إِتّبْهثْ.

 

بِيلَاطُوسْ يَارزُّو أَذْ إِضْڒقْ إِ يَاسُوع (مَارْ. 15:6-15؛ لُوكْ. 23:13-25؛ يُوحْ. 18:39-19:16)

ثُوغَا لْعمِيلْ إِنُّومْ يَارخُّو ذِي كُوڒْ ڒْْعِيذْ إِ يِيجّْ ن ؤُمحْبُوسْ إِ ڒْْغَاشِي، ونِّي إِخْسنْ نِيثْنِي. ثُوغَا غَارْسنْ ذڭْ وُوسَّانْ نِّي إِجّْ ن ؤُمحْبُوسْ إِثْوَاسّنْ، قَّارنْ أَسْ بَارَابَّاسْ. خنِّي ڒَْامِي مُوننْ، إِنَّا أَسنْ بِيلَاطُوسْ ”وِي ثخْسمْ أَذْ أَومْ أَرْخُوغْ، بَارَابَّاسْ نِيغْ يَاسُوع ونِّي ؤُمِي قَّارنْ لْمَاسِيحْ؟“ مِينْزِي نتَّا إِسّنْ أَقَا نِيثْنِي سلّْمنْ ث زِي ڒحْسذْ. أَمْ ثُوغَا إِقِّيمْ خْ ڒْْكُورْسِي ن ڒْْحُوكْمْ، ثسّكّْ-د غَارْسْ ثمْغَارْثْ نّسْ، ثنَّا ”بَارَّا إِخفْ نّكْ زڭْ ؤُمْسڭَّاذْ نِّي، مِينْزِي أَقَا أَسّْ-أَ ثْوَاعدّْبغْ أَطَّاسْ ذِي ثَارْجِيثْ ذِي سِّيبّثْ نّسْ.“ مَاشَا أَرُّويَاسْ ن إِكهَّاننْ ذ إِمْغَارنْ ن ڒْْڭنْسْ سّْقنْعنْ ڒْْغَاشِي حِيمَا أَذْ تَّارنْ بَارَابَّاسْ ؤُشَا أَذْ نْغنْ يَاسُوع. لْعمِيلْ يَارَّا-د، إِنَّا أَسنْ ”مَانْ ونْ زِي ثْنَاينْ-أَ إِ ثخْسمْ أَذْ أَرْخُوغْ؟“ نَّانْ ”بَارَابَّاسْ“. بِيلَاطُوسْ إِنَّا أَسنْ ”مِينْ إِ غَا ڭّغْ خنِّي أَكْ-ذ يَاسُوع ؤُمِي قَّارنْ لْمَاسِيحْ؟“ نَّانْ أَسْ مَارَّا ”أجّْ إِثْ أَذْ إِثْوَاصلّبْ!“ مَاشَا لْعمِيلْ إِنَّا ”مَانْ ثُوعفّْنَا إِ إِڭَّا؟“ سْغُويّنْ س جّهْذْ كْثَارْ، نَّانْ ”أجّْ إِثْ أَذْ إِثْوَاصلّبْ.“ ڒَْامِي إِژْرَا بِيلَاطُوسْ بلِّي نتَّا وَارْ يِيوضْ غَارْ وَالُو، مَاهُو أَذْ إِكَّارْ ؤُغُووّغْ، إِكْسِي أَمَانْ، إِسِّيرْذْ إِفَاسّنْ نّسْ قِيبَاتْشْ إِ ڒْْغَاشِي، إِنَّا”نشّْ وَارْ تُّورْسغْ شَا ذڭْ إِذَامّنْ ن ؤُمْسڭَّاذْ-أَ، خْژَارمْ كنِّيوْ!“ ڒْْڭنْسْ يَارّْ-د، إِنَّا ”إِذَامّنْ نّسْ أَذْ خَانغْ إِڒِينْ ؤُ خْ ثَارْوَا نّغْ.“ خنِّي يَارْخُو أَسنْ-د إِ بَارَابَّاسْ، مَاشَا أَوَارْنِي ڒَْامِي إِهتّكْ يَاسُوع س ؤُركُّوضْ، إِسلّمْ إِثْ حِيمَا أَذْ إِثْوَاصلّبْ.

 

أَسحْقَارْ ن يَاسُوع زِي ڒْْعسْكَارْ (مَارْ. 15:16-20؛ يُوحْ. 19:2-3)

ڭوّْذنْ ث إِعسْكَارِييّنْ غَارْ ذَاخڒْ ن ڒمْرَاحْ ن ثَادَّارْثْ ن شّْرَاعْ ؤُشَا سّْمُوننْ مَارَّا ڒْْعسْكَارْ.  سّْيَارْضنْ أَسْ (إِجّْ ن ورُّوضْ) ذ أَزڭّْوَاغْ، مُوذنْ أَسْ إِشْثْ ن ثمْرِيسْثْ س إِسنَّاننْ ؤُشَا قّْننْ أَسْ-ت، بْذَانْ تّْسدْجَامنْ خَاسْ، قَّارنْ أَسْ ”أَزُولْ خَاكْ، أَ أَجدْجِيذْ ن وُوذَاينْ!“ ثُوغَا شَّاثنْ ث غَارْ ؤُزدْجِيفْ س يِيجّْ ن وعْمُوذْ ن ؤُغَانِيمْ، سُّوسُوفنْ خَاسْ ؤُشَا، ؤُمِي أَضَارنْ خْ إِفَادّنْ نْسنْ،عبْذنْ ث. أَوَارْنِي ڒَْامِي ث سّحْقَارَانْ، سڒْخنْ خَاسْ أَسڒْهَامْ أَزڭّْوَّاغْ ؤُشَا سّْيَارْضنْ أَسْ أَرُّوضْ نّسْ، خنِّي ڭّوْذنْ ث بَارَّا حِيمَا أَذْ ث صلّْبنْ.

 

غَارْ صَّالِيبْ  (مَارْ. 15:21-32؛ لُوكْ. 23:26-39؛ يُوحْ. 19:17-19)

أَمْ فّْغنْ غَارْ بَارَّا ن ثنْذِينْثْ، ؤُفِينْ إِجّنْ زِي قَايْرَاوَانْ قَّارنْ أَسْ سِيمْعَانْ ؤُشَا زِييَّارنْ خَاسْ حِيمَا أَذْ يَارْبُو صَّالِيبْ نّسْ. أَڒَامِي إِوْضنْ غَارْ يِيجّْ ن ومْشَانْ قَّارنْ أَسْ جُولْجُوثَا، مِينْ إِخْسْ أَذْ يِينِي ’أَمْشَانْ ن ثْشقُّوفْثْ ن ؤُزدْجِيفْ‘، وْشِينْ أَسْ بِينُو يَارْزڭِيخدْجْضنْ س ’خُولّْ‘ (=أَحْرِيرْ أَمَارْزَاڭْ أَطَّاسْ). أَڒَامِي ث إِقَّاسْ، يُوڭِي أَذْ إِسُو. أَوَارْنِي ڒَْامِي ث صلّْبنْ، بْضَانْ أَرُّوضْ نّسْ جَارَاسنْ ؤُشَا ڭِّينْ خَاسْ أَكشُّوضْ حِيمَا أَذْ إِثْوَاكمّڒْ مِينْ إِنَّا ؤُنَابِي ”فَارْقنْ أَرُّوضْ إِنُو جَارَاسنْ ؤُشَا ڭِّينْ أَكشُّوضْ خْ وَارُّوضْ إِنُو.“ ؤُشَا، أَمْ قِّيمنْ نِيثْنِي،عسّنْ خَاسْ. ڭِّينْ أَسْ سنّجْ إِ ؤُزدْجِيفْ نّسْ إِشْثْ ن ثِيرَا، ؤُرِينْ خَاسْ تُّوهْمثْ نّسْ ”وَا ذ يَاسُوع، أَجدْجِيذْ ن وُوذَاينْ.“ خنِّي صلّْبنْ أَكِيسْ ثْنَاينْ ن إِخوَّاننْ، إِجّنْ غَارْ ؤُفُوسِي نّسْ ؤُ إِجّنْ غَارْ ؤُزڒْمَاضْ نّسْ. ؤُ إِنِّي ثُوغَا إِتّكَّانْ، تّْشقَّافنْ ذَايسْ، تّْهزَّانْ أَزدْجِيفْ نْسنْ، قَّارنْ ”أَ شكْ ونِّي إِهذْمنْ ثَادَّارْثْ إِقدّْسنْ ؤُ ذِي ثْڒَاثَا ن وُوسَّانْ أَذْ ت ثبْنِيذْ عَاوذْ، سنْجمْ إِخفْ نّكْ مَاڒَا شكْ ذ مِّيسْ ن أَربِّي، هْوَا-د خنِّي زِي صَّالِيبْ.“ ؤُڒَا ذ أَرُّويَاسْ ن إِكهَّاننْ أَكْ-ذ إِمْسڒْمَاذنْ ن إِذْلِيسنْ ذ إِمْغَارنْ ن ڒْْڭنْسْ سْثهزَّانْ زَّايسْ أَمنِّي، نَّانْ ”إِسّنْجمْ إِنّضْنِي مَاشَا وَارْ إِزمَّارْ أَذْ إِسّنْجمْ إِخفْ نّسْ. مَاڒَا نتَّا ذ أَجدْجِيذْ ن إِسْرَايِيلْ، أجّْ إِثْ أَذْ د-إِهْوَا زِي صَّالِيبْ، نشِّينْ أَذْ زَّايسْ نَامنْ. إِتّْشڒْ خْ أَربِّي، أجّْ إِثْ نتَّا أَذْ ث إِسّنْجمْ مَاڒَا يَارْضَا خَاسْ أَربِّي، مِينْزِي إِنَّا ’نشّْ ذ مِّيسْ ن أَربِّي‘.“ ؤُڒَا ذ إِخوَّاننْ، إِنِّي ثُوغَا إِثْوَاصلّْبنْ أَكِيسْ، ثُوغَا سّْفضَاهنْ زَّايسْ أَمنِّي.

 

ڒْموْثْ ن يَاسُوع (مَارْ. 15:33-41؛ لُوكْ. 23:44-49؛ يُوحْ. 19:28-30)

زِي ثْسَاعّثْ وِيسّْ ستَّا ثوْضَا-د ثَادْجسْثْ خْ مَارَّا ثَامُّورْثْ أَڒْ ثَاسَاعّثْ وِيسّْ ثسْعَا. جْوَايهْ ن ثْسَاعّثْ وِيسّْ ثسْعَا إِسْغُويّْ يَاسُوع س ثْمِيجَّا إِجهْذنْ، إِنَّا س يِيڒسْ ن ثَارَامِيثْ ”إِلِي، إِلِي، لِيمَا شَابَاقْثَانِي؟“ مِينْ إِخْسْ أَذْ يِينِي”أَ أَربِّي، أَ أَربِّي، مَايمِّي ذ أَيِي ثْسمْحذْ؟“ سْڒِينْ أَسْ ينِّي ذِينْ إِبدّنْ، نَّانْ ”إِتّْڒَاغَا خْ إِلِييَا.“ ذغْيَا يُوزّڒْ-د غَارسْ إِجّنْ زَّايْسنْ، إِكْسِي سْبُونْخَا، إِسُّوفّْ إِتّْ س ڒْْخدْجْ (=بِينُو أَسمَّامْ)، إِڭَّا إِتّْ خْ يِيجّْ ن ؤُغَانِيمْ ؤُشَا إِوْشْ أَسْ أَذْ إِسُو. إِنّضْنِي نَّانْ ”جّمْ أَذْ نْژَارْ، مَا أَذْ د-يَاسْ إِلِييَا حِيمَا أَذْ ث إِسّنْجمْ.“ أَوَارْنِي ڒَْامِي إِسْغُويّْ عَاوذْ س ثْمِيجَّا إِجهْذنْ، إِسَّارْخُو يَاسُوع أَرُّوحْ. خْژَارْ، أَرْوَاقْ ن ثَادَّارْثْ إِقدّْسنْ إِشَارّڭْ خْ ثْنَاينْ زِي سنّجْ أَڒْ سْوَادَّايْ، ثَامُّورْثْ ثنْهزّْ، ثِيصُوضَارْ فدْجْقنْثْ، إِمضْڒَانْ ثْوَارزْمنْ ؤُشَا أَطَّاسْ ن ڒْْخشْبَاثْ ن إِمْقدَّاسنْ إِنِّي ثُوغَا إِطّْصنْ، ثْوَاسّْنكَّارنْثْ-د. فّْغنْ نِيثْنِي زڭْ إِمضْڒَانْ أَوَارْنِي ثْنُوكْرَا نّسْ، ؤُذْفنْ غَارْ ثنْذِينْثْ إِقدّْسنْ ؤُ بَاننْ-د إِ وَاطَّاسْ. ڒَْامِي ڒْْقبْطَانْ خْ مْيَا ذ ينِّي ثُوغَا أَكِيذسْ إِحطَّانْ يَاسُوع، ژْرِينْ أَنْهزِّي ن ثمُّورْثْ ذ مِينْ إِمْسَارنْ، ڭّْوذنْ نِيثْنِي أَطَّاسْ، نَّانْ ”س ثِيذتّْ، وَا ذ مِّيسْ ن أَربِّي.“

ثُوغَا ذِينْ أَطَّاسْ ن ثمْغَارِينْ ثِينِّي ثُوغَا إِخژَّارنْ زِي ڒَْاڭّْوَاجْ، نِيثنْثِي ضْفَارنْثْ يَاسُوع زِي لْجَالِيلْ حِيمَا أَذْ زَّايسْ خذْمنْثْ. جَارَاسنْثْ مَارْيَامْ ن مَاجْذَالَا ذ مَارْيَامْ، يمَّاسْ ن يَاعْقُوبْ ذ يُوسِيسْ، ؤُڒَا ذ أَيْثْ ن زَابَاذِي.

 

أَنْضڒْ ن يَاسُوع (مَارْ. 15:42-47؛ لُوكْ. 23:50-56؛ يُوحْ. 19:38-42)

 

ڒَامِي د-ثِيوضْ ثْمذِّيثْ، يُوسَا-د غَارْسْ يِيجّْ ن ورْيَازْ زِي أَرِيمَاثِييَا، قَّارنْ أَسْ يُوسُوفْ، ونِّي ثُوغَا إِذوْڒنْ عَاوذْ ذ أَمحْضَارْ ن يَاسُوع. إِرُوحْ غَارْ بِيلَاطُوسْ، إِتَّارْ أَسْ أَرِّيمثْ ن يَاسُوع. ڒخْذنِّي إِوصَّا بِيلَاطُوسْ مَاحنْذْ أَذْ أَسْ ثمّوْشْ. يُوسُوفْ إِكْسِي أَرِّيمثْ، إِنّضْ إِتّْ ذِي ڒشْفنْ ن قَاطِيفَا إِصْفَانْ، إِسَّارْسْ إِتّْ ذڭْ إِجّْ ن ونْضڒْ ذ جْذِيذْ إِ ثُوغَا إِغْزَا ؤُشَا أَوَارْنِي ڒَْامِي إِسّقْنُونِّي إِشْثْ ن ثصْضَارْثْ حِيمَا أَذْ إِقْفڒْ ثَاوَّارْثْ ن ونْضڒْ، إِرُوحْ. ثُوغَا ذِينْ مَارْيَامْ ن مَاجْذَالَا ذ مَارْيَامْ نّضْنِيثْ قِّيمنْثْ قِيبَاتْشْ إِ ونْضڒْ.

 

إِمْخَازْنِييّنْ إِتّْعسَّانْ خْ ونْضڒْ ن يَاسُوع

 

ثِيوشَّا نّسْ أَوَارْنِي أَسّْ ن ؤُسوْجذْ، مُوننْ أَرُّويَاسْ ن إِكهَّاننْ ذ إِفَارِيسِييّنْ غَارْ بِيلَاطُوسْ، نَّانْ ”أَ سِيذِي، نعْقڒْ بلِّي أَغشَّاشْ-أَ، أَمْ ثُوغَا عَاذْ إِدَّارْ، إِنَّا ’أَوَارْنِي ثْڒَاثَا ن وُوسَّانْ أَذْ كَّارغْ.‘ خنِّي ؤُمُورْ حِيمَا أَذْ ضمْننْ أَنْضڒْ أَڒْ أَسّْ وِيسّْ ثْڒَاثَا حِيمَا أَذْ ثَاغْ إِمحْضَارنْ نّسْ وَارْ د-تِّيسنْ س دْجِيڒثْ أَذْ ث أَشَارنْ، خنِّي أَذْ خبَّارنْ ڒْْڭنْسْ، أَقَا إِكَّارْ-د زڭْ إِمتِّيننْ. أَمُّو إِ غَا يِيڒِي ؤُخطُّو أَنڭَّارُو كْثَارْ خْ ؤُمزْوَارْ. إِنَّا أَسنْ بِيلَاطُوسْ ”أَقَا غَارْومْ ثَارْبِيعْثْ ن إِعسَّاسنْ، رُوحمْ، ضمْننْ ث أَمْ ثسّْنمْ.“ رُوحنْ نِيثْنِي ؤُشَا ضمْننْ أَنْضڒْ س إِشْثْ ن ثرْبِيعْثْ ن إِعسَّاسنْ أَوَارْنِي ڒَْامِي بلّْعنْ أَنْضڒْ س يِيجّْ ن ثَاصْضَارْثْ.

 

ثَانُوكْرَا ن يَاسُوع (مَارْ. 16:1-8؛ لُوكْ. 24:1-12؛ يُوحْ. 20:1-10)

 

ڒَامِي ثعْذُو سّبْثْ، غَارْ ڒفْجَارْ ن وَاسّْ أَمزْوَارُو ن سِّيمَانَا، ثُوسَا-د مَارْيمْ ن مَاجْذَالَا ذ مَارْيمْ نّضْنِيثْ حِيمَا أَذْ سِّيجّنْثْ خْ ونْضڒْ. خْژَارْ، إِمْسَارْ يِيجّْ ن ونْهزِّي ن ثمُّورْثْ إِمْغَارْ مِينْزِي إِجّْ ن لْمَالَاكْ ن أَربِّي إِهْوَا-د زڭْ ؤُجنَّا، إِقَارّبْ-د ؤُشَا إِسّقْنُونِّي ثَاصْضَارْثْ زِي ثوَّارْثْ ؤُشَا إِقِّيمْ خَاسْ. ثُوغَا صِّيفثْ نّسْ أَمْ وَاجَّاجْ ؤُ أَرُّوضْ نّسْ أَمْ وذْفڒْ. إِعسَّاسنْ ڭّْوذنْ زَّايسْ، ذوْڒنْ أَمْ إِمتِّيننْ. مَاشَا لْمَالَاكْ يَارّْ-د، إِنَّا إِ ثمْغَارِينْ ”وَارْ تّڭّْوذنْثْ شَا، مِينْزِي سّْنغْ أَقَا كنِّينْثْ تَّارزُّونْثْ خْ يَاسُوع ونِّي ثُوغَا إِثْوَاصلّْبنْ. وَارْ ذَا إِدْجِي، مِينْزِي نتَّا إِكَّارْ-د أَمْ مَامّشْ إِنَّا. أَسنْثْ-إِدّْ ذَا، خْژَارنْثْ أَمْشَانْ مَانِي ثُوغَا إِمَّارْسْ سِيذِي. رُوحنْثْ ذغْيَا، إِنِينْثْ إِ إِمحْضَارنْ نّسْ، أَقَا إِثْوَاسّْنكَّارْ-د زڭْ إِمتِّيننْ، ؤُشَا خْژَارْ، نتَّا ذ أَومْ إِ غَا إِزْوَارنْ غَارْ لْجَالِيلْ. ذِينْ أَذْ ث ثْژَارمْ. خْژَارْ، أَقَا نِّيغْ أَومْ ث.“ فّْغنْثْ نِيثنْثِي ذغْيَا زڭْ ونْضڒْ س ثِيڭّْوُوذِي ذ ڒفْرَاحثْ إِمْغَارنْ، تَّازّْڒنْثْ حِيمَا أَذْ ت خبَّارنْثْ إِمحْضَارنْ. ؤُشَا أَمْ رُوحنْثْ حِيمَا أَذْ ث خبَّارنْثْ إِمحْضَارنْ، خْژَارْ، يَاسُوع إِڒْقَا ثنْثْ، إِقَّارْ ”سْڒَامْ خَاكنْثْ!“ نِيثنْثِي ؤُسِينْثْ-إِدّْ غَارسْ، طّْفنْثْ ذڭْ إِضَارنْ نّسْ ؤُشَا سجْذنْثْ أَسْ. ڒخْذنِّي إِنَّا أَسنْثْ يَاسُوع ”وَارْ تّڭّْوذنْثْ شَا، سِّيوْضنْثْ ڒخْبَارْ-أَ إِ أَيْثْمَا، حِيمَا أَذْ رَاحنْ غَارْ لْجَالِيلْ، ذِيهَا أَذْ أَيِي ژَترنْ.“

 

شْهَاذثْ ن ژُّورْ ن إِمْخَازْنِييّنْ ذ أَرُّويَاسْ ن إِكهَّاننْ

أَمْ رُوحنْثْ، خْژَارْ، أَقَا شَا زڭْ إِعسَّاسنْ ؤُسِينْ-د غَارْ ثنْذِينْثْ حِيمَا أَذْ خبَّارنْ أَرُّويَاسْ ن إِكهَّاننْ خْ مَارَّا مِينْ إِمْسَارنْ. ؤُشَا ڒَْامِي مُوننْ أَكْ-ذ إِمْغَارنْ ن ڒْْڭنْسْ ؤُشَا مْشَاوَارنْ أَكِيذْسنْ، وْشِينْ أَسنْ إِ إِعسْكَارِييّنْ أَطَّاسْ ن ثنْعَاشِينْ، نَّانْ ”إِنِيمْ ’إِمحْضَارنْ نّسْ ؤُسِينْ-د س دْجِيڒثْ ؤُشَا ؤُشَارنْ ث أَمْ ثُوغَا نطّصْ‘، ؤُ مَاڒَا لْعمِيلْ أَذْ ث إِسڒْ، نشِّينْ أَذْ ث نسّقْنعْ ؤُشَا وَارْ كنِّيوْ نتّجِّي شَا أَذْ ثِيڒِيمْ ذڭْ إِمُونَاسْ.“ طّْفنْ ثْمنْيَاثْ ؤُشَا ڭِّينْ أَمْ مَامّشْ ذ أَسنْعڒْمنْ. ڒخْبَارْ-أَ أَقَا إِفّغْ غَارْ وُوذَاينْ أَڒْ أَسّْ ن يِيضَا.

 

ڒخْبَارْ أَصبْحَانْ إِ مَارَّا دُّونِّيثْ (مَارْ. 16:14-18؛ لُوكْ. 24:36-49؛ يُوحْ. 20:19-23؛ ڒخ. 1:6-8)

حِيذْعَاشْ ن إِمحْضَارنْ نِّي رُوحنْ غَارْ لْجَالِيلْ، غَارْ وذْرَارْ مَانِي ثنْ يُومُورْ سِيذِي. أَڒَامِي ث ژْرِينْ، سجْذنْ أَسْ، مَاشَا شَا شكّنْ. يَاسُوع إِقَارّبْ-د غَارْسنْ إِسِّيوڒْ أَكِيسنْ، إِنَّا ”ثمّوْشْ أَيِي مَارَّا صُّولْطَا ذڭْ ؤُجنَّا ؤُ خْ ثمُّورْثْ. رُوحمْ، أَرّمْ مَارَّا ڒڭْنُوسْ ذ إِمحْضَارنْ إِنُو، سْغضْصمْ ثنْ س يِيسمْ ن ثْبَابَاثْ ذ ثْممِّيثْ ذ أَرُّوحْ إِقدّْسنْ ؤُ سْڒمْذمْ ثنْ أَذْ طّْفنْ ذِي مَارَّا مِينْ خفْ كنِّيوْ ؤُمُورغْ زَّايسْ، ؤُ خْژَارْ، نشّْ أَقَّا-يِي أَكِيذْومْ مَارَّا ؤُسَّانْ أَڒْ قطُّو ن دُّونِّيثْ.“