مِينْ إِقَّارْ وذْلِيسْ إِقدّْسنْ خْ ثْوَاسِيثْ ن لْمَاسِيحْ؟

ڒعْڒَامَاثْ ن ؤُنڭَّارْ ن ڒْْوقْثْ

(زِي ڒخْبَارْ أَصبْحَانْ س ؤُفُوسْ ن مَاتَّا - ؤُذمْ 24)

خنِّي إِفّغْ يَاسُوع زِي ثَادَّارْثْ إِقدّْسنْ ؤُشَا يُويُورْ. ؤُسِينْ-د غَارْسْ إِمحْضَارنْ نّسْ حِيمَا أَذْ أَسْ سّشْننْ ڒبْنِي ن ثَادَّارْثْ إِقدّْسنْ. إِنَّا أَسنْ يَاسُوع ”مَا وَارْ ثژْرِيمْ مَارَّا مَانْ أَيَا؟ س ثِيذتّْ أَذْ أَومْ إِنِيغْ، وَارْ ذَا إِتّْغِيمِي ؤُڒَا ذ إِجّْ ن وژْرُو خْ وژْرُو نّضْنِي إِ وَارْ إِتّْنهْذِيمْ شَا.“ ؤُمِي ثُوغَا إِقِّيمْ خْ وذْرَارْ ن زِّيثُونْ، ؤُسِينْ-د غَارْسْ إِمحْضَارنْ نّسْ وحْذْسنْ، قَّارنْ ”إِنِي أَنغْ، مڒْمِي إِ غَا إِمْسَارْ مَانْ أَيَا ؤُ مَانْ ڒعْڒَامثْ ن ثْوَاسِيثْ نّكْ ؤُ ن قطُّو ن دُّونِيثْ؟“

يَاسُوع يَارّْ-ذ، إِنَّا أَسنْ ”حْضَامْ إِخفْ نْومْ، وَارْ كنِّيوْ إِغكّْوِي حذْ. مِينْزِي أَطَّاسْ د إِ غَا يَاسنْ س يِيسمْ إِنُو، قَّارنْ ’نشّْ ذ لْمَاسِيحْ‘ ؤُشَا أَذْ غْوَانْ أَطَّاسْ. ؤُشَا أَذْ ثسْڒمْ خْ ڒْْبَارُوضْ ذ ڒخْبُورَاثْ ن ڭَارَّاثْ. غَارْومْ أَقَا أَذْ ثڭّْوذمْ، مِينْزِي س ؤُغِيڒْ أَذْ يِيڒِي مَانْ أَيَا، مَاشَا وَارْ إِتِّيڒِي عَاذْ ذ أَنڭَّارْ.

مِينْزِي ڒْْڭنْسْ أَذْ إِمّْنغْ أَكْ-ذ ڒْْڭنْسْ (نّضْنِي) ؤُشَا ثَاڭلْذِيثْ أَكْ-ذ ثْڭلْذِيثْ نّضْنِي، أَذْ يِيڒِي ڒَْاژْ ذ ڒهْڒَاشَاثْ يوْعَارنْ ذ إِنْهزَّانْ ن ثمُّورْثْ ذَا ذ ذِيهَا.

مَارَّا مَانْ أَيَا عَاذْ أَذْ يِيڒِي ذ بدُّو ن ؤُنزْبَارْ (أَمْ ن إِشْثْ ن ثمْغَارْثْ إِ غَا يَارْونْ) وَاهَا. خنِّي أَذْ كنِّيوْ د-أَوْينْ غَارْ ڒحْصَارثْ ؤُشَا أَذْ كنِّيوْ نْغنْ ؤُ مَارَّا ڒڭْنُوسْ أَذْ كنِّيوْ شَارْهنْ زِي سِّيبّثْ ن إِسمْ إِنُو. ڒخْذنِّي أَذْ وْضَانْ أَطَّاسْ، أَذْ سلّْمنْ إِجّنْ ونّضْنِي ؤُشَا أَذْ شَارْهنْ إِجّنْ ونّضْنِي.

أَذْ كَّارنْ وَاطَّاسْ ن إِنَابِييّنْ إِسّْخَارِّيقنْ ؤُشَا أَذْ سّغْوَانْ أَطَّاسْ. ؤُشَا زِي سِّيبّثْ ن ثْمَارْنِيوْثْ ن مِينْ إِدْجَانْ ضِيدّْ إِ شَّارِيعَا، أَذْ ثُوذْرُوسْ ثَايْرِي ن وَاطَّاسْ ن إِوْذَانْ. مَاشَا وِي إِ غَا إِصْبَارنْ غَارْ ؤُنڭَّارْ أَقَا نتَّا أَذْ إِثْوَاسّنْجمْ.

ؤُشَا ڒخْبَارْ أَصبْحَانْ ن ثْڭلْذِيثْ أَذْ زَّايسْ بَارّْحنْ ذ شّْهَاذثْ إِ مَارَّا ڒڭْنُوسْ ؤُشَا ڒخْذنِّي يُوسَا-د ؤُنڭَّارْ.

خْمِي إِ غَا ثْژَارمْ نّْعِي ن وَاريّبْ، مِينْ خفْ إِسِّيوڒْ ؤُنَابِي ذَانِييَالْ، ذڭْ ومْشَانْ إِقدّْسنْ - ونِّي ث إِ غَا إِغَارنْ أَذْ إِفْهمْ - ڒخْذنِّي جّمْ إِنِّي إِدْجَانْ ذِي يَاهُوذِييَّا أَذْ أَروْڒنْ غَارْ إِذُورَارْ، ونِّي إِدْجَانْ خْ ثْزقَّا وَارْ ذ إِهكّْوِي شَا حِيمَا أَذْ إِكْسِي شَا زِي ثَادَّارْثْ نّسْ ؤُ ونِّي إِدْجَانْ ذڭْ إِيَّارْ وَارْ د-إِذِيكّْوِيڒْ شَا حِيمَا أَذْ يَاوِي أَرُّوضْ نّسْ.

ؤُشْثْ خْ ثمْغَارِينْ ثِينِّي إِدْجَانْ س دّيْسثْ ذ ثِينِّي إِسُّوطُّوضنْ ذڭْ وُوسَّانْ نِّي. ژَتدْجمْ حِيمَا وَارْ ثتِّيڒِي ثَاروْڒَا نْومْ ذِي ڒْْمشْثَا نِيغْ ذِي سّبْثْ، مِينْزِي ڒخْذنِّي أَذْ ثِيڒِي ڒحْصَارثْ ثمْغَارْ إِ وَارْ إِمْسَارنْعمَّارْصْ زڭْ وَامِي ثدْجْ دُّونِيثْ أَڒْ إِ ڒخُّو ؤُعمَّارْصْ وَارْ ثتِّيڒِي عَاذْ. مْڒِي ؤُسَّانْ نِّي وَارْ ثْوَاسّْمژْينْ، خنِّي وَارْ إِثْوَاسّنْجمْ ؤُڒَا ذ إِجّْ ن ويْسُومْ، مَاشَا (ؤُسَّانْ نِّي) أَذْ ثْوَاسّْمژْينْ ذِي طّْوعْ ن ينِّي إِثْوَاخْضَارنْ.

مَاڒَا إِنَّا أَومْ حذْ ’خْژَارمْ، أَقَا ذَا لْمَاسِيحْ‘ نِيغْ ’أَقَا-ث ذِيهَا‘ وَارْ ث تِّيمْنمْ. مِينْزِي أَذْ إِڒِينْ إِمَاسِيحنْ إِسّْخَارِّيقنْ ذ إِنَابِييّنْ إِسّْخَارِّيقنْ، أَذْ ڭّنْ ڒعْڒَامَاثْ ذ لْمُوعْجِيزَاثْ حِيمَا، مْڒِي زمَّارنْ، أَذْ غْوَانْ عَاوذْ إِنِّي إِثْوَاخْضَارنْ. غَارْومْ، أَقَا نِّيغْ أَومْ ث قْبڒْ. مَاڒَا نَّانْ أَومْ ’خْژَارمْ، نتَّا أَقَا-ث ذِي ڒخْڒَا‘، وَارْ تّْرِيحمْ شَا ذِينْ، (نِيغْ) ’خْژَارمْ-د، نتَّا أَقَا-ث ذَاخڒْ إِ وخَّامْ‘، وَارْ ث تِّيمْنمْ. مِينْزِي أَمشْنَاوْ أَجَّاجْ إِ ذ إِتّفّْغنْ زِي شَّارْقْ ؤُشَا إِتّڭّْ ثِيفَاوْثْ أَڒْ ڒْْغَارْبْ، أَمُّو إِ غَا ثِيڒِي ثْوَاسِيثْ ن مِّيسْ ن بْنَاذمْ. مَانِي إِ غَا ثِيڒِي ڒْْخشْبثْ، ذِيهَا أَذْ مُوننْ إِنضِّيونْ.

ڒخْذنِّي، أَوَارْنِي ڒحْصَارثْ ن وُوسَّانْ نِّي، أَذْ ثْبَارْشنْ ثْفُوشْثْ ؤُ ثَازِيرِي وَارْ ثتِّيشّْ عَاذْ طّْيَا نّسْ ؤُ إِثْرَانْ أَذْ د-وْضَانْ زڭْ ؤُجنَّا ؤُ جّهْذْ ن ؤُجنَّا أَذْ إِثْوَاسّنْهزّْ. خنِّي أَذْ د-ثضْهَارْ ڒعْڒَامثْ ن مِّيسْ ن بْنَاذمْ ذڭْ ؤُجنَّا ؤُ مَارَّا ثِيقبَّاڒْ ن ثمُّورْثْ أَذْ وْثنْ أَڭجْذُورْ ؤُشَا أَذْ ژَترنْ مِّيسْ ن بْنَاذمْ يُوسَا-د خْ ؤُسيْنُو س جّهْذْ ذ ؤُعُودْجِي إِمْغَارنْ. ؤُ نتَّا أَذْ إِسّكّْ لْمَالَاكَاثْ نّسْ س ژَّامَارْ إِمْغَارْ ن ڒْْبُوقْ ؤُشَا نِيثنْثِي أَذْ د-سّْمُوننْثْ إِنِّي إِثْوَاخْضَارنْ زِي أَربْعَا ن إِغزْذِيسنْ ن ؤُسمِّيضْ، زِي طَّارْفْ أَنڭَّارُو ن ؤُجنَّا أَڒْ ونّضْنِي.

ڒمْذمْ زڭْ وَارْثُو أَمتِّيڒْ-أَ: خْمِي إِ غَا ذوْڒنْ ڒفْرُوعْ نّسْ ذ إِڒقَّاينْ، أَذْ د-سُّوفّْغنْ ثِيفْرَايْ، أَذْ ثسّْنمْ أَقَا أَنبْذُو يُوذسْ-د. أَمُّو عَاوذْ كنِّيوْ، خْمِي إِ غَا ثْژَارمْ مَارَّا مَانْ أَيَا، أَذْ ثسّْنمْ أَقَا يُوذسْ-د، غَارْ ثوَّارْثْ. س ثِيذتّْ أَذْ أَومْ إِنِيغْ، جِّيڒْ-أَ وَارْ إِعدُّو أَڒْ إِ غَا إِمْسَارْ مَارَّا مَانْ أَيَا. أَجنَّا ذ ثمُّورْثْ أَذْ عْذُونْ مَاشَا أَوَاڒنْ إِنُو وَارْعدُّونْعمَّارْصْ. مَاشَا خْ وَاسّْ نِّي نِيغْ ثَاسَاعّثْ نِّي وَارْ خَاسنْ إِسِّينْ ؤُڒَا ذ إِجّْ، ؤُڒَا ذ لْمَالَاكَاثْ ن ؤُجنَّا ؤُڒَا ذ ثَاممِّيثْ، مْغِيرْ بَابَا وحْذسْ.

أَمْ مَامّشْ ثُوغَا إِدْجْ ذڭْ وُوسَّانْ ن نُوحْ أَمُّو إِ غَا ثِيڒِي ثْوَاسِيثْ ن مِّيسْ ن بْنَاذمْ. مِينْزِي أَمْ مَامّشْ ثنْ ثُوغَا ذڭْ وُوسَّانْ قْبڒْ طُّوفَانْ، تّتّنْ، سسّنْ، مدْجْشنْ ؤُ سّْمدْجَاشنْ أَڒْ ذ أَسّْ إِ غَا يَاذفْ نُوحْ ذڭْ ؤُغَارَّابُو. وَارْ نْعِيمنْ أَڒَامِي ذ يُوسَا طُّوفَانْ ؤُشَا إِوْيِي ثنْ مَارَّا، أَمُّو إِ غَا ثِيڒِي ثْوَاسِيثْ ن مِّيسْ ن بْنَاذمْ. خنِّي ذِي ڒْْوقْثْ نِّي أَذْ إِڒِينْ ثْنَاينْ ذڭْ إِيَّارْ، إِجّنْ أَذْ ث كْسِينْ ؤُ ونّضْنِي أَذْ ث جّنْ. ثْنَاينْ ن ثمْغَارِينْ أَذْ حَارْينْثْ س ثْسِيرْثْ، إِشْثنْ أَذْ ت كْسِينْ ؤُ ثنّضْنِي أَذْ ت جّنْ.

خنِّي حْضَامْ مِينْزِي وَارْ ثسِّينمْ شَا ذِي مَانْ ثَاسَاعّثْ د إِ غَا يَاسْ سِيذِيثْومْ. مَاشَا سّْنمْ أَيَا: مَاڒَا بَابْ ن ثَادَّارْثْ إِسّنْ ثَاسَاعّثْ ن حطُّو ن دْجِيڒثْ نِّي ذِي د إِ غَا يَاسْ ؤُشفَّارْ، إِڒِي إِقِّيمْ إِحطَّا، وَارْ ث إِتّجِّي أَذْ يَاذفْ غَارْ ثَادَّارْثْ نّسْ. خْ ؤُينِّي ؤُڒَا ذ كنِّيوْ %عسّمْ!‘، مِينْزِي مِّيسْ ن بْنَاذمْ أَذْ د-يَاسْ ذڭْ إِشْثْ ن ڒْْوقْثْ وَارْ ث ثتّْرِيجِيمْ. وِي إِدْجَانْ خنِّي ذ إِسْمغْ أَصْذِيقْ ذ أَمِيغِيسْ إِ إِڭَّا بَابْ نّسْ حِيمَا أَذْ إِبْضَا خْ إِسمْغَانْ مِينْ إِ غَا شّنْ ذِي ڒْْوقْثْ نّسْ؟ سّعْذْ ن إِسْمغْ ونِّي إِ غَا يَافْ سِيذسْ إِڒْهَا إِخدّمْ خْمِي د إِ غَا يَاسْ. س ثِيذتّْ أَذْ أَومْ إِنِيغْ، أَذْ ث إِڭّْ خْ مَارَّا أَڭْرَا نّسْ. مَاشَا مَاڒَا إِسْمغْ أَعفَّانْ نِّي أَذْ إِنِي ذڭْ وُوڒْ نّسْ ’سِيذِي إِعطَّاڒْ‘ ؤُشَا إِبْذَا إِشَّاثْ إِسمْغَانْ إِنِّي أَكِيذسْ إِدْجَانْ، أَذْ إِشّْ أَذْ إِسُو أَكْ-ذ إِمسْكَارنْ، خنِّي أَذْ د-يَاسْ سِيذسْ ن إِسْمغْ نِّي ذڭْ وَاسّْ نِّي ذِي وَارْ ث إِتّْرِيجِي ؤُ ذِي ثْسَاعّثْ وَارْ ت إِسِّينْ، أَذْ ث إِقسّْ خْ ثْنَاينْ ؤُشَا أَذْ ثِيڒِي ثَاسْغَارْثْ نّسْ أَكْ-ذ لْمُونَافِيقِينْ. ذِينْ إِ غَا يِيڒِينْ إِمطَّاونْ ذ ؤُغزِّي ن ثغْمَاسْ.“

ثْوَاسِيثْ ن سِيذِي يَاسُوع لْمَاسِيحْ

(1 إِثِيسَّالُونِيكِييّنْ 4:13-18)

أَقَا وَارْ نخْسْ شَا أَذْ كنِّيوْ نجّْ ذِي طّْڒَامْ، أَ أَوْمَاثنْ، خْ ؤُمدُّورْ ن إِنِّي إِذوْڒنْ طّْصنْ، حِيمَا وَارْ ثتِّيڒِيمْ ثْشضْنمْ أَمْ إِنّضْنِي أَمْ ينِّي ؤُمِي إِقْضعْ ڒَْايَاسْ. مِينْزِي مَاڒَا نُومنْ بلِّي يَاسُوع ثُوغَا إِمُّوثْ ؤُشَا إِكَّارْ-د، خنِّي نُومنْ بلِّي أَمُّو عَاوذْ أَذْ يَاوِي أَربِّي إِنِّي إِذوْڒنْ طّْصنْ (ذڭْ ونْضڒْ) غَارْ إِخفْ نّسْ س يَاسُوع. مِينْزِي أَذْ أَومْ نِينِي مَانْ أَيَا س وَاوَاڒْ ن سِيذِي: نشِّينْ، إِنِّي إِدَّارنْ، إِنِّي إِ غَا إِقِّيمنْ أَڒْ د إِ غَا يَاسْ سِيذِي،عمَّارْصْ أَذْ نِيزَّارْ إِ ينِّي إِذوْڒنْ طّْصنْ. مِينْزِي سِيذِي س يِيخفْ نّسْ أَذْ د-إِهْوَا زڭْ ؤُجنَّا خْ مِينِّي د إِ غَا ثفّغْ إِشْثْ ن ثْغُويِّيثْ س ثْمِيجَّا ن يِيجّْ ن لْمَالَاكْ إِمْغَارْ س ڒْْبُوقْ ن أَربِّي ؤُشَا إِنِّي إِمُّوثنْ ذِي لْمَاسِيحْ أَذْ كَّارنْ ذ إِمزْوُورَا، أَوَارْنِي أَسنْ أَذْ نكَّارْ نشِّينْ، إِنِّي إِقِّيمنْ دَّارنْ، أَذْ كِيذْسنْ نثْوَاكّسْ ذڭْ إِسيْنُوثنْ حِيمَا أَذْ نمّْسڒْقَا أَكْ-ذ سِيذِي ذڭْ ؤُجنَّا ؤُشَا أَمُّو أَكِيذسْ إِ غَا نقِّيمْ إِ ڒبْذَا. خْ ؤُينِّي ڭّمْ ؤُڒْ ذڭْ وَايَاوْيَا س وَاوَاڒنْ-أَ.

ڒْحُوكْمْ ن أَربِّي خْ دُّونِّيثْ

(2 إِثِيسَّالُونِيكِييّنْ 1:6-10)

مِينْزِي أَربِّي ذ أَمْسڭَّاذْ ؤُمِي إِ غَا إِخدْجصْ س ڒحْصَارْثْ إِ ينِّي كنِّيوْ إِحصَّارنْ، ؤُشَا إِ كنِّيوْ، إِنِّي إِتّْوَاحْصَارنْ، س ؤُريّحْ غَارْ ؤُسَارْڭبْ ن سِيذِي يَاسُوع زڭْ ؤُجنَّا أَكْ-ذ لْمَالَاكَاثْ ن جّهْذْ نّسْ ذِي ثْمسِّي إِتّحْذُوذُوقنْ، خْ مِينِّي إِ غَا إِنْثَاقمْ إِنِّي وَارْ إِسِّيننْ شَا أَربِّي ذ ينِّي وَارْ إِطَّاعنْ ڒخْبَارْ أَصبْحَانْ ن سِيذِيثْنغْ يَاسُوع. إِنَا أَذْ كْسِينْ أَودّبْ ن ؤُهلّكْ إِ ڒبْذَا، أَذْ إِڒِينْ إِڭّْوجنْ خْ وُوذمْ ن سِيذِي ؤُ خْ ؤُعُودْجِي ن جّهْذْ نّسْ، خْمِي د إِ غَا يَاسْ نتَّا حِيمَا أَذْ إِثْوَاعُودْجِي ذڭْ وَاسّْ نِّي ذِي مَارَّا إِمْقدَّاسنْ نّسْ ؤُشَا أَذْ ذَايسْ ثْبهْثنْ مَارَّا إِنِّي ذَايسْ يُومْننْ، مِينْزِي شْهَاذثْ نّغْ إِ كنِّيوْ ثثْوَاقْبڒْ س لِيمَانْ.