مِينْ إِسّڒْمَاذْ وذْلِيسْ إِقدّْسنْ خْ مَامّشْ إِتّْخصَّا أَذْ إِدَّارْ ؤُمَاسِيحِي زِي جِّيهثْ ن أَرُّوحْ ذ زِي جِّيهثْ ن ثُوذَارْثْ نّسْ ن كُوڒْ أَسّْ أَمْ ؤُمَاسِيحِي؟
لْ'إِنْجِيلْ إِسّڒْمَاذْ أَنغْ أَقَا ؤُڒَا ذ إِجّنْ مَّا إِزمَّارْ أَذْ غَارسْ ثِيڒِي ثُوذَارْثْ زَّاثْ إِ أَربِّي، معْلِيكْ نتَّا وَارْ د-إِتّْوَاخْڒقْ شَا زِي جْذِيذْ ڒَْامِي إِسَّارْسْ أَثِيقِّي نّسْ ذِي يَاسُوع لْمَاسِيحْ حِيمَا أَذْ إِمّثْ أَكْ-ذ ڒْْموْثْ نّسْ إِ دّنْبْ إِ إِڭَّا ؤُ مَاحنْذْ أَذْ د-إِتّْوَاسْنكَّارْ عَاوذْ أَكْ-ذ لْمَاسِيحْ زَّاثْ إِ أَربِّي أَمْ يِيجّْ ن بْنَاذمْ ذ جْذِيذْ س ثْنُوكْرَا ن لْمَاسِيحْ ؤُ س وغْفَارْ ن دّْنُوبْ نّسْ س إِذَامّنْ ن يَاسُوع لْمَاسِيحْ ؤُ س ؤُفَارّغْ ن ثَايْرِي ن أَربِّي س أَرُّوحْ إِقدّْسنْ ذڭْ وُوڒْ ن ونِّي زَّايسْ إِتَّامْننْ.
ذِي ثُوذَارْثْ نّغْ إِتّْبَاننْ نثْوَاخْڒقْ-د ذ أَمزْوَارْ. س مَانْ أَيَا أَقَا ندْجْ ؤُ ندَّارْ ذِي دُّونِيثْ-أَ. عَاوذْ كِيفْكِيفْ زِي جِّيهثْ ن أَرُّوحْ. نحْذَاجْ أَذْ د-نخْڒقْ زِي جْذِيذْ ذِي ثُوذَارْثْ ثَارُوحَانشْثْ مَاحنْذْ أَذْ نزْمَارْ أَذْ ندَّارْ قِيبَاتْشْ إِ أَربِّي أَمشْنَاوْ أَذَامْ ذ حَاوَا دَّارنْ قِيبَاتْشْ إِ أَربِّي، ؤُمِي عَاذْ وَارْ ڭِّينْ دّنْبْ.
أجّْ أَنغْ ڒخُّو أَذْ نْژَارْ مَامّشْ ثدْجْ ثُوذَارْثْ ؤُمَاسِيحِي ذِي ڒْْوقْثْ ڒَْامِي د-إِتّْوَاخْڒقْ زِي جْذِيذْ. ڭُّورْ أَذْ ثْفكَّارذْ إِلَّا إِتّْخصَّا أَسْ أَذْ يڭّْ أَطَّاسْ ن ثْمسْڒَايِينْ ثِيسبْحَانِينْ ؤُ أَذْ يِيڒِي ذ إِجّْ ن بْنَاذمْ بْڒَا خطُّو قِيبَاتْشْ إِ أَربِّي؟! مَا زعْمَا أَمُّو إِ ثْخَارّْصذْ؟ إِوَا خْژَارْ، أَمُورْ أَمزْوَارُو أَقَا وَارْ إِدْجِي أَمُّو إِ إِقَّارْ لْ'إِنْجِيلْ. لْ'إِنْجِيلْ إِنَّا أَمُّو إِ ينِّي إِتَّامْننْ ذِي لْمَاسِيحْ:
"مَاڒَا نقَّارْ ’نشِّينْ وَارْ خَانغْ بُو دّْنُوبْ‘، أَقَّا نسّْخَارِّيقْ خْ يِيخفْ نّغْ ؤُشَا ثِيذتّْ وَارْ ذَايْنغْ ثدْجِي. مَاشَا مَاڒَا ننْعمْ س دّْنُوبْ نّغْ، أَقَا أَربِّي ذ أَصْذِيقْ ذ أَمْسڭَّاذْ حِيمَا أَذْ أَنغْ إِغْفَارْ دّْنُوبْ نّغْ ؤُشَا أَذْ أَنغْ إِسِّيزْذڭْ زِي مَارَّا مِينْ وَارْ إِسڭّْذنْ. مَاڒَا نقَّارْ ’نشِّينْ وَارْ ذَايْنغْ بُو دّْنُوبْ‘، نتَّارَّا ث ذ بُو-إِخَارِّيقنْ ؤُشَا أَوَاڒْ نّسْ وَارْ ذَايْنغْ إِدْجِي." (1 يُوحَانَّا 1:8-10)
أجّْ أَنغْ ڒخُّو أَذْ نْژَارْ مِينْ إِحْذَاجْ ؤُسڭْمِي إِ د-إِتّْوَاخڒْقنْ قَاعْ غَارْ ؤُمزْوَارْ؟ إِحْذَاجْ أَغِي ذ مَاشَّا ذ ؤُمْسَاوَاضْ أَكْ ذ بَابَاسْ ذ يمَّاسْ ذ إِحنْجِيرنْ نّضْنِي! زِي جِّيهثْ ثَارُوحَانشْثْ أَقَا ذ إِشْثنْ. يَاسُوع يَارّْ-د ڒَْامِي ث إِغْوَا شِّيطَانْ ذِي ڒخْڒَا:
”يَارَّا-د خَاسْ إِنَّا ”أَقَا ثُورَا ’بْنَاذمْ وَارْ إِدَّارْ س وغْرُومْ وَاهَا، مَاشَا زِي كُوڒْ أَوَاڒْ إِ ذ إِتّكّنْ زڭْ ؤُقمُّومْ ن أَربِّي.‘“ (مَاتَّا 4:4)
أَمَازَانْ (=رَّاسُولْ) بُولُوسْ أَقَا يُورَا إِ ڒْْمُومِينِينْ ذِي ثنْذِينْثْ ن كُولُوسِّي:
"مَاشَا مَاڒَا ثتّْوَاسّْنكَّارمْ-د أَكْ-ذ لْمَاسِيحْ، خنِّي أَرْزُومْ مِينْ إِدْجَانْ سنّجْ، مَانِي إِقِّيمْ لْمَاسِيحْ خْ ؤُفُوسِي ن أَربِّي.عقْڒمْ مِينْ إِدْجَانْ سنّجْ، وَارْ إِدْجِي مِينْ إِدْجَانْ ذِي ثْمُورْثْ، مِينْزِي كنِّيوْ أَقَّا ثمُّوثمْ ؤُشَا ثُوذَارْثْ نْومْ ثنُّوفَّارْ أَكْ-ذ لْمَاسِيحْ ذِي أَربِّي. خْمِي د إِ غَا إِضْهَارْ لْمَاسِيحْ، ونِّي إِدْجَانْ ذ ثُوذَارْثْ نّغْ، ڒخْذنِّي ؤُڒَا ذ كنِّيوْ أَذْ كِيذسْ د-ثضْهَارمْ ذڭْ ؤُعُودْجِي. " (إِكُولُوسِّييّنْ. 3:1-4)
أَضْبِيبْ لُوقَا ونِّي يُورَانْ 'لِينْجِيلْ س ؤُفُوسْ ن لُوقَا' ذ 'ڒخْذَايمْ ن إِمَازَاننْ' (=رُّوسُولْ) إِنَّا خْ ڒْْمُومِينِينْ إِمزْوُورَا ذِي ؤُرْشَالِيمْ أَمُّو:
"نِيثْنِي قِّيمنْ صْبَارنْ ذِي ثْغُورِي ن إِمَازَاننْ ذ ثْمُونْثْ ذ ثَارزِّيثْ ن وغْرُومْ ؤُ ذِي ثْژَادْجِيثِينْ." (ڒخْذَايمْ 2:42)
ثَابْرَاثْ إِ إِعِيبْرَانِييّنْ ثعْڒمْ إِ ڒْْمُومِينِينْ س وَاوَاڒنْ-أَ:
"ؤُشَا أَذْ نحْضَا إِجّنْ ونّضْنِي حِيمَا أَذْ نڭّْ ؤُڒْ ذڭْ وَايَاوْيَا غَارْ ثَايْرِي ؤُ غَارْ ڒخْذَايمْ ثِيصبْحَانِينْ، وَارْ نتّجِّي شَا ثَامسْمُونْثْ نّغْ أَمْ مَامّشْ نُّومنْ شَا زَّايْنغْ، مَاشَا أَذْ نسّمْحضْ إِجّنْ ونّضْنِي، مَاهُو عَاذْ خْمِي إِ غَا ثْژَارمْ أَقَا أَسّْ نِّي يِيوضْ-د." (إِعْبْرَانِييّنْ 10:24،25)
خنِّي دَّارْ أَكْ-ذ وَاوَاڒْ ن أَربِّي ؤُ س أَرُّوحْ ن أَربِّي ! ذِي ثِيشْرِي ن ڒبْذَا ذ ؤُثِيقِّي أَكْ-ذ يَاسُوع لْمَاسِيحْ ڭُّورْ أَذْ ثفّغْ ڒْْغِيدْجثْ ثَارُوحَانشْثْ. س ؤُسْحسِّي ذ ثْغُورِي ن وَاوَاڒنْ ن لْ'إِنْجِيلْ ذ ؤُثِيقِّي ذَايْسنْ ؤُ س ثْژَادْجِيثْ إِ أَربِّي س لْمَاسِيحْ، أَذْ ذَايكْ ثثْوَاڭّْ ثْزمَّارْ مَاحنْذْ أَذْ ثطَّاعذْ إِ وَاوَاڒنْ ن أَربِّي. خْ مَانْ أَيَا مَارَّا نقَّارْ ذِي لْ'إِنْجِيلْ أَمُّو:
"س ؤُينِّي نْغمْ إِغزْذِيسنْ ن أَرِّيمثْ نْومْ إِنِّي خْ ثمُّورْثْ: ثُوقحْبِيثْ، ڒخْمجْ، أَشَاهِي، نّشْوَاثْ ثِيعفَّانِينْ، طّْمعْ ذ ونِّي ذ أَعْبَاذْ إِ لَاصْنَامْ. خْ سِّيبّثْ ن ؤُيَا أَذْ د-يَاسْ لْغَاضَابْ ن أَربِّي خْ أَيْثْ ن ڒْْمُوعْصِييّثْ. ؤُڒَا ذ كنِّيوْ ثُوغَا ثڭُّورمْ أَمُّو زِيشْ، ؤُمِي كنِّيوْ ثُوغَا ثدَّارمْ عَاذْ ذِي ثْمسْڒَايِينْ نِّي. مَاشَا ڒخُّو عَاوذْ كنِّيوْ ثسَّارْسمْ مَانْ أَيَا مَارَّا خْ ؤُغزْذِيسْ: أَخيّقْ ذ ثفْقحْثْ ذ ثُوعفّْنَا، أَشقّفْ ذ وَاوَاڒنْ إِخمْجنْ زڭْ ؤُقمُّومْ نْومْ. وَارْ سْخَارِّيقمْ شَا خْ وَايَاوْيَا ؤُمِي ثسَّارْسمْ غَارْ ؤُغزْذِيسْ بْنَاذمْ أَقْذِيمْ أَكْ-ذ ڒخْذَايمْ نّسْ ؤُ يَارّْضمْ س ونِّي ذ جْذِيذْ ، ونِّي إِتّْبدَّاڒنْ غَارْ ثُوسّْنَا ثْمُونْ عْلَاحْسَابْ صِّيفثْ ن ونِّي إِثْ-إِدّْ إِخڒْقنْ. ذَايْسْ وَارْ إِدْجِي أَيُونَانِي نِيغْ ؤُذَايْ ؤُڒَا ذ أَخْثَانْ نِيغْ بْڒَا أَخْثَانْ ؤُڒَا ذ أَبَارَّانِي نِيغْ أَسْكِيثْ، ؤُڒَا ذ إِسْمغْ نِيغْ حُورّْ، مَاشَا لْمَاسِيحْ ذ كُوڒْشِي ذِي مَارَّا. خنِّي، أَمْ كنِّيوْ إِخْضَارْ أَربِّي ذ إِمْقدَّاسنْ ذ إِمْعِيزّنْ، أَرْضمْ س ثحْنُونشْثْ ذِي ذَاخڒْ ؤُڒَا س ڒضْرَافثْ ذ ؤُوَاضعْ ذ ثمْهِينْثْ ذ تَّاسِيعْ ن ڒْْخَاضَارْ، ؤُشَا مَاڒَا شَا ن يِيجّنْ غَارْسْ أَشثْشِي خْ ونّضْنِي، قبْڒمْ ؤُ سَامْحمْ إِ وَايَاوْيَا. أَمْ مَامّشْ ذ أَومْ إِغْفَارْ لْمَاسِيحْ، ڭّمْ كنِّيوْ أَمنِّي عَاوذْ. سنّجْ إِ مَارَّا ثِيمسْڒَايِينْ-أَ، أَرْضمْ ثَايْرِي ثنِّي ذ ثْخَاذنْثْ ن ڒكْمَاڒثْ." (إِكُولُوسِّييّنْ: 3:5-13)
أَربِّي ذ ثَافَاوْثْ ؤُشَا إِتّْخصَّا إِ ؤُمَاسِيحِي أَذْ يُويُورْ ذِي ثْفَاوْثْ!
"ذ وَا ذ أَبَارّحْ إِ زِي نسْڒَا ؤُشَا أَذْ أَومْ-د نْبَارّحْ: أَربِّي ذ ثَافَاوْثْ، نتَّا وَارْ ذَايْسْ بُو جُّورّثْ ن ثَادْجسْثْ. مَاڒَا نقَّارْ ’نشِّينْ غَارْنغْ أَمُونِي أَكِيذسْ‘ ؤُشَا نڭُّورْ ذِي ثَادْجسْثْ، أَقَا نسّْخَارِّيقْ، وَارْ نتّڭّْ شَا ثِيذتّْ. مَاشَا مَاڒَا نُويُورْ ذِي ثْفَاوْثْ، أَمْ نتَّا ذِي ثْفَاوْثْ، غَارْنغْ أَمُونِي أَكْ-ذ وَايَاوْيَا، ؤُشَا إِذَامّنْ ن يَاسُوع لْمَاسِيحْ مِّيسْ أَذْ أَنغْ سِّيزذْڭنْ زِي قَاعْ دّْنُوبْ." (1 يُوحَانَّا 1:5-7)
"مِينْزِي أَوَاڒْ ن أَربِّي إِدَّارْ، إِجْهذْ، إِقْضعْ كْثَارْ زِي كُوڒْ سِّيفْ س ثْنَاينْ ن وُوذْمَاونْ، إِتَّاكّْوَاضْ أَڒْ أَبطُّو ن ڒعْمَارْ ذ أَرُّوحْ ذ ڒمْفَاصڒْ ذ وَاذُوفْ، إِفَارّزْ إِخَارِّيصنْ ذ ثْنَاوِي ن وُوڒْ. وَارْ ذِينْ ؤُڒَا ذ إِجّْ ن ؤُمدَّارْ وَارْ د أَسْ إِبِينْ، مَاشَا مَارَّا ثِيمسْڒَايِينْ أَقَا-ثنْثْ ثْوَاعَارّْينْثْ، ثْوَارزْمنْثْ غَارْ ثِيطَّاوِينْ ن ونِّي ؤُمِي إِكْ-د إِ غَا نڭّْ ڒحْسَابْ." (إِعِيبْرَانِييّنْ 4: 12،13)
أَطَّاسْ إِڭُّورْ أَذْ نِينِي خْ ثْمسْڒَايِينِي ن كُوڒْ أَسّْ إِ نتّدَّارْ. مَامّشْ إِ ذ أَنغْ إِتّْخصَّا أَذْ غَارْسنْثْ نخْژَارْ س ثْفَاوْثْ ن وَاوَاڒنْ إِقدّْسنْ ن أَربِّي، أَمشْنَاوْ غَارْ مَارَّا مَارْكَاثْ ن لْعَالَاقَاثْ، غَارْ ڒمْڒَاشْ، إِحنْجِيرنْ، ڒْْوَاشُونْ، ڒْْخذْمثْ، مَاشَّا، ڒْْوقْثْ، أَرُّوضْ، ثِينْعَاشِينْ ذ إِقَارِّيضنْ، غَارْ ؤُمْعَاملْ نّغْ أَكْ-ذ ڒْْمخْزنْ ؤُ مَامّشْ إِتّْخصَّا أَذْ نڭّْ مَاڒَا غَارْنغْ صُّولْطَا خْ إِوْذَانْ نّضْنِي ؤُ مَامّشْ ذ أَنغْ إِتّْخصَّا أَذْ نُويُورْ أَكْ-ذ يِيخفْ نّغْ، مَامّشْ إِتّْخصَّا أَذْ نسِّيوڒْ، مَامّشْ إِتّْخصَّا أَذْ نِيڒِي أَكْ-ذ إِوْذَانْ إِ وَارْ إِتِّيمْننْ ذِي لْمَاسِيحْ نِيغْ مَامّشْ إِتّْخصَّا أَذْ نڭّْ ذِي مَارَّا ثِيمسْڒَايِينْ ن ثُوذَارْثْ نّغْ!
مَاڒَا غَاركْ شَا ن ؤُسقْسِي، عَافَاكْ بْڒَا أَبْرَايْ مْسَاوَاضْ-د أَكِيذْنغْ س أ-مَا إِلْ إِ غَا ثَافذْ غَارْ سنّجْ! ڭُّورْ أَذْ نڭّْ ثِيزمَّارْ أَذْ خَاكْ د-نَارّْ س ؤُسْذَاهدْجْ ذغْيَا!