ذِي ڒخْڒَا
لْعَاذَاذْ ن ڒْْعسْكَارْ ن إِسْرَائِيل
1 إِسِّيوڒْ سِيذِي أَكْ-ذ مُوسَا ذِي ڒخْڒَا ن سِينَا، ذڭْ ؤُقِيضُونْ ن ؤُمْسَاڭَارْ، ذڭْ وَاسّْ أَمزْوَارُو ن ؤُيُورْ وِيسّْ ثْنَاينْ، ذڭْ ؤُسڭّْوَاسْ وِيسّْ ثْنَاينْ أَوَارْنِي ڒَْامِي د-فّْغنْ زِي ثمُّورْثْ ن مِيصْرَا، إِنَّا:
2 ”كْسِيمْ ڒْْقدّْ ن إِسْمَاونْ ن مَارَّا إِرْيَازنْ ن مَارَّا ثَامسْمُونْثْ ن أَيْثْ ن إِسْرَائِيل، أَزدْجِيفْ أَزدْجِيفْ، أَمْ تّْوَاستّْفنْ نِيثْنِي عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ. ▪ 3 إِتّْخصَّا شكْ ذ هَارُونْ أَذْ ثْحسْبمْ كُوڒْ إِجّْ ذِي إِسْرَائِيل زِي عِيشْرِينْ ن إِسڭّْوُوسَا سنّجْ، مَارَّا إِنِّي د-إِفّْغنْ أَكْ-ذ ڒْْعسْكَارْ، عْلَاحْسَابْ ثِيرْبِيعِينْ ن ڒْْعسْكَارْ نْسنْ. 4 أَذْ أَومْ إِوْشْ أَفُوسْ إِجّْ ن ورْيَازْ زِي كُوڒْ ثَاقْبِيتْشْ، أَرْيَازْ إِ إِدْجَانْ ذ أَزدْجِيفْ ن ثَادَّارْثْ ن بَابَاسْ. 5 أَقَا ذ إِنَا ذ إِسْمَاونْ ن يرْيَازنْ نِّي ذ أَومْ غَا إِوْشنْ أَفُوسْ:
إِ رُوبِينْ، إِلِيصُورْ مِّيسْ ن شَاذَايُورْ،
6 إِ شِيمْعُونْ، شَالُومِييِيلْ، مِّيسْ ن صُورِييْشَادَّايْ،
7 إِ يَاهُوذَا، نَاحْشُونْ، مِّيسْ ن عَامِّينَاذَابْ،
8 إِ إِسَّاكَارْ، نَاثَانَايِيلْ، مِّيسْ ن صُوغَارْ.
9 إِ زابُولُونْ، إِلِييَابْ، مِّيسْ ن حِيلُونْ،
10 إِ أَيْثْ ن يُوسُوفْ:
إِ إِفْرَايِيمْ، إِلِيشَامَاعْ، مِّيسْ ن أَمِّيهُوذْ،
إِ مَانَاسَّا، جَامْلِييِيلْ، مِّيسْ ن فَاذَاهْصُورْ،
11 إِ بِينْيَامِينْ، أَبِيذَانْ مِّيسْ ن جِيذْعُونِي،
12 إِ ذَانْ، أَخِيعَازَارْ، مِّيسْ ن عَامِّيشَادَّايْ،
13 إِ أَشِيرْ، فَاجْعِييِيلْ، مِّيسْ ن عُوكْرَانْ،
14 إِ جَاذْ، إِلِييَاسَافْ، مِّيسْ ن ذَاعُويِيلْ،
15 إِ نَافْثَالِي، أَخِيرَاعْ، مِّيسْ ن عِينَانْ.“
16 إِنَا ثُوغَا ذ إِنِّي إِتّْوَاڒَاغَانْ زِي ثْمسْمُونْثْ، نِيثْنِي ذ ڒْْحُوكَّامْ ن ثْقبَّاڒْ ن إِبَابَاثنْ نْسنْ، إِزدْجِيفنْ خْ ڒُْوڒُوفْ ن إِسْرَائِيل. 17 كْسِينْ مُوسَا ذ هَارُونْ إِرْيَازنْ نِّي ثُوغَا إِتّْوَارشْمنْ س إِسْمَاونْ نْسنْ 18 ؤُشَا سّْمُوننْ ثَامسْمُونْثْ مَارَّا ذڭْ وَاسّْ أَمزْوَارُو ن ؤُيُورْ وِيسّْ ثْنَاينْ ؤُشَا نِيثْنِي خبَّارنْ جّْذِيرَا نْسنْ، عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، أَمْ تّْوَازمّمنْ إِسْمَاونْ ن يِينِّي غَارْ إِدْجَا عِيشْرِينْ ن إِسڭّْوُوسَا سنّجْ، أَزدْجِيفْ أَزدْجِيفْ.
19 أَمْ مَامّشْ ذ أَسْ يُومُورْ سِيذِي إِ مُوسَا، أَقَا إِحْسبْ إِ-ثنْ ذِي ڒخْڒَا ن سِينَا.
20 أَيْثْ ن رُوبِينْ، أَمنْزُو ن إِسْرَائِيل: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ نْسنْ أَزدْجِيفْ أَزدْجِيفْ، كُوڒْ أَرْيَازْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 21 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن رُوبِينْ، ثُوغَا أَثنْ ذِي ستَّا ؤُ-ربْعِينْ-أَڒفْ ؤُ-خمْسَا مْيَا.
22 أَيْثْ ن شِيمْعُونْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْسَابْ لْعَاذَاذْ ن إِسْمَاونْ نْسنْ، أَزدْجِيفْ أَزدْجِيفْ، كُوڒْ أَرْيَازْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 23 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن شِيمْعُونْ ثُوغَا أَثنْ ذِي ثسْعَا ؤُ-خمْسِينْ-أَڒفْ ؤُ-ثڒْثْ-مْيَا.
24 أَيْثْ ن جَاذْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 25 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن جَاذْ ثُوغَا أَثنْ ذِي خمْسَا ؤُ-ربْعِينْ-أَڒفْ ؤُ-ستَّا-مْيَا ؤُ-خمْسِينْ.
26 أَيْثْ ن يَاهُوذَا: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، كُوڒْ إِجّنْ إِ د-إِتّفّْغنْ أَكْ-ذ ڒْْعسْكَارْ، 27 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن يَاهُوذَا ثُوغَا أَثنْ ذِي أَربْعَا ؤُ-سبْعِينْ-أَڒفْ ؤُ-ستَّا-مْيَا.
28 أَيْثْ ن إِسَّاكَارْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْصَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 29 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن إِسَّاكَارْ ثُوغَا أَثنْ ذِي أَربْعَا ؤُ-خمْسِينْ-أَڒفْ ؤُ-أَربْعَا-مْيَا.
30 أَيْثْ ن زابُولُونْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ - إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 31 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن زابُولُونْ ثُوغَا أَثنْ ذِي سبْعَا ؤُ-خمْسِينْ-أَڒفْ ؤُ-أَربْعَا-مْيَا.
32 أَيْثْ ن يُوسُوفْ:
أَيْثْ ن إِفْرَايِيمْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 33 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن إِفْرَايِيمْ ثُوغَا أَثنْ ذِي أَربْعِينْ-أَڒفْ ؤُ-خمْسَا-مْيَا.
34 أَيْثْ ن مَانَاسَّا: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 35 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن مَانَاسَّا ثُوغَا أَثنْ ذِي ثْنَاينْ ؤُ-ثْڒَاثِينْ-أَڒفْ ؤُ-مِيثَاينْ.
36 أَيْثْ ن بِينْيَامِينْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 37 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن بِينْيَامِينْ ثُوغَا أَثنْ ذِي خمْسَا ؤُ-ثْڒَاثِينْ-أَڒفْ ؤُ-أَربْعَا-مْيَا.
38 أَيْثْ ن ذَانْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 39 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن ذَانْ ثُوغَا ثنْ ذِي ثْنَاينْ ؤُ-ستِّينْ-أَڒفْ ؤُ-سبْعَا-مْيَا.
40 أَيْثْ ن أَشِيرْ: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 41 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن أَشِيرْ ثُوغَا ثنْ ذِي وَاحِيثْ ؤُ-ربْعِينْ-أَڒفْ ؤُ-خمْسَا-مْيَا.
42 أَيْثْ ن نَافْثَالِي: ثَارْوَا نْسنْ - تّْوَاستّْفنْ عْلَاحْسَابْ ڒَْادْجَاثْ نْسنْ، عْلَاحْسَابْ ثُوذْرِينْ ن إِبَابَاثنْ نْسنْ، إِنِّي زَّايسْ إِتّْوَاحسْبنْ عْلَاحْسَابْ إِسْمَاونْ ن مَارَّا إِرْيَازنْ زِي عِيشْرِينْ إِسڭّْوُوسَا سنّجْ، مَارَّا ونِّي إِ غَا إِفّْغنْ أَكْ-ذ ڒْْعسْكَارْ، 43 وَاهْ، إِنِّي إِتّْوَاحسْبنْ أَمُّو إِ ثقْبِيتْشْ ن نَافْثَالِي ثُوغَا أَثنْ ذِي ثْڒَاثَا ؤُ-خمْسِينْ-أَڒفْ ؤُ-أَربْعَا-مْيَا.
44 إِنَا ذ إِنِّي إِتّْوَاحسْبنْ، إِنِّي تّْوَاحسْبنْ س ؤُفُوسْ ن مُوسَا ذ هَارُونْ ذ ڒْْحُوكَّامْ ن إِسْرَائِيل، ثنْعَاشْ ن يرْيَازنْ، إِجّنْ ورْيَازْ إِ ثَادَّارْثْ ن بَابَاسْ. ▫ 45 مَارَّا إِنِّي إِتّْوَاحسْبنْ زڭْ أَيْثْ ن إِسْرَائِيل - أَمْ تّْوَاستّْفنْ نِيثْنِي عْلَاحْسَابْ ثَادَّارْثْ ن إِبَابَاثنْ نْسنْ - مَارَّا إِنِّي غَارْ إِدْجَا عِيشْرِينْ ن إِسڭّْوُوسَا سنّجْ، كُوڒْ إِجّْ ونِّي د-إِتّفّْغنْ أَكْ-ذ ڒْْعسْكَارْ، 46 وَاهْ، مَارَّا إِنِّي إِتّْوَاحسْبنْ ثُوغَا أَثنْ ذِي ستَّا-مْيَا ؤُ-طڒْثْ-أَڒَافْ ؤُ-خمْسَا-مْيَا ؤُ-خمْسِينْ. ▪
47 إِلَاوِييّنْ وَارْ شَارْشنْ شَا جَارْ أَسنْ ذِي ڒحْسَابْ ذِي طّْوعْ ن ثقْبِيتْشْ ن إِبَابَاثنْ نْسنْ، 48 مِينْزِي سِيذِي ثُوغَا إِسِّيوڒْ أَكْ-ذ مُوسَا، إِنَّا: 49 ”مْغِيرْ ثَاقْبِيتْشْ ن لَاوِي وَارْ ت تّحْسبْ شَا ؤُ وَارْ ت زمِّي شَا أَزدْجِيفْ أَزدْجِيفْ جَارْ أَيْثْ ن إِسْرَائِيل. 50 مَاشَا إِتّْخصَّا شكْ س يِيخفْ نّشْ، أَذْ ثڭّذْ إِلَاوِييّنْ خْ ثْزذِّيغْثْ ن شّْهَاذثْ ؤُ خْ مَارَّا ڒقْشُوعْ نّسْ ؤُ خْ مَارَّا مِينْ ذ أَسْ د-يُوسِينْ. نِيثْنِي أَذْ أَرْبُونْ ثَازذِّيغْثْ أَكْ-ذ ڒقْشُوعْ نّسْ مَارَّا، ؤُشَا أَذْ ذَايسْ سخَّارنْ. إِتّْخصَّا أَذْ وْثنْ إِقِيضَانْ نْسنْ مِينْ د-إِنّْضنْ إِ ثْزذِّيغْثْ. 51 مَاڒَا أَذْ ثتّْوَافْسِي ثْزذِّيغْثْ، أَذْ ت هذْمنْ إِلَاوِييّنْ ؤُشَا مَاڒَا ثِيوضْ ثْزذِّيغْثْ غَارْ ڒْْمَارْڭهْ أَنضْفَارْ، خنِّي أَذْ ت سّْبدّنْ إِلَاوِييّنْ عَاوذْ. مَاڒَا د-إِقَارّبْ شَا ن ؤُبَارَّانِي، خنِّي نتَّا أَذْ إِتّْوَانغْ. 52 أَيْثْ ن إِسْرَائِيل أَذْ وْثنْ إِقِيضَانْ ن ڒْْمَارْڭحْ نْسنْ، كُوڒْ إِجّْ غَارْ ثْعدْجَانْثْ نّسْ، أَمْ تّْوَاستّْفنْ نِيثْنِي عْلَاحْسَابْ ثِيرْبِيعِينْ ن ڒْْعسْكَارْ نْسنْ. 53 إِلَاوِييّنْ أَذْ وْثنْ إِقِيضَانْ نْسنْ غَارْ كُوڒْ جِّيهثْ ن ثْزذِّيغْثْ ن شّْهَاذثْ، حِيمَا وَارْ إِتِّيڒِي ؤُذُوقّزْ ن وغْضَابْ خْ ثْمسْمُونْثْ ن أَيْثْ ن إِسْرَائِيل. إِتّْخصَّا إِ إِلَاوِييّنْ أَذْ حْضَانْ خْ ثْزذِّيغْثْ ن شّْهَاذثْ.“
54 ؤُشَا ڭِّينْ أَيْثْ ن إِسْرَائِيل س مَارَّا مِينْ يُومُورْ سِيذِي إِ مُوسَا، وَاهْ، أَمُّو إِ-ث ڭِّينْ.