1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ڒْْموْثْ ن مِّيسْ‘. أَزهّذْ ن ذَاوُوذْ.
2 أَلِيفْ. أَذْ قَاذِيغْ سِيذِي س مَارَّا ؤُڒْ إِنُو،
أَذْ بَارّْحغْ مَارَّا لْمُوعْجِيزَاثْ نّشْ.
3 أَذْ زَّايكْ فَارْحغْ أَذْ زَّايكْ سْڒِيوْڒِيوغْ.
نشّْ أَذْ زهّْذغْ إِ يِيسمْ نّشْ،
أَ شكْ، أَمْعُودْجِي خْ كُوڒْشِي!
4 بِيثْ. ؤُمِي ڒْْعذْيَانْ إِنُو ذوْڒنْ
غَارْ ضفَّارْ،
وْضَانْ ؤُغڒْينْ زَّاثْ إِ وُوذمْ نّشْ.
5 مَاغَارْ شكْ ثْونِّيذْ أَيِي ثَاسْغَارْثْ إِنُو
ؤُ ثْبلّْعذْ دّعْوثْ إِنُو،
ثقِّيمذْ خْ ڒْْعَارْشْ،
أَ شكْ، ذ ڒْْقَاضِي أَمْسڭّذْ.
6 ڭِيملْ. شكْ ثْوبّْخذْ ڒڭْنُوسْ،
ثْهلّْكذْ أَعفَّانْ،
ثمْحِيذْ إِسمْ نْسنْ إِ ڒبْذَا قَاعْ.
7 هِي. ڒعْذُو، أَقَا نِيثْنِي تّْوَاقْضَانْ،
أَقَا أَثنْ ذ ڒْْخِيرْبَاثْ إِ ڒبْذَا.
ثْغضْڒذْ إِغْرِيمنْ نْسنْ،
ڒِْيذَارثْ نْسنْ ثفْنَا.
8 وَاوْ. سِيذِي إِتّْغِيمَا إِ ڒبْذَا،
أَقَا إِسّْبدّْ ڒْْعَارْشْ نّسْ إِ ڒحْكَامْ.
9 نتَّا أَذْ إِشَارّعْ دُّونشْثْ س ثْسڭْذَا،
أَذْ إِحْكمْ شُّوعُوبْ س ڒْْحقّْ. ▪
10 سِيذِي ذ لْبُورْجْ يُوعْڒَانْ إِ ونِّي إِحْصَارنْ،
إِجّْ ن لْبُورْجْ يُوعْڒَانْ ذِي ڒْْوقْثْ ن ڒحْصَارثْ. ▪
11 إِنِّي إِسّْننْ إِسمْ نّشْ، أَذْ خَاكْ تّشْڒنْ،
مَاغَارْ إِنِّي خَاكْ يَارزُّونْ،
وَارْ ذَايْسنْ ثْسمّْحذْ، أَ سِيذِي.
12 زَايِينْ. زهّْذمْ إِ سِيذِي،
ونِّي إِزدّْغنْ ذِي صِيهْيُونْ،
بَارّْحمْ س ثْمڭَّا نّسْ جَارْ ڒڭْنُوسْ.
13 مِينْزِي نتَّا يَارزُّو
خْ ؤُسِيزّڒْ ن إِذَامّنْ،
إِتّْخَارَّاصْ ذَايْسنْ.
وَارْ إِتُّو شَا إِغُويَّانْ
ن يِينِّي إِتّْوَاحصَّارنْ.
14 خِيثْ. حِينّْ خَافِي، أَ سِيذِي،
خْزَارْ غَارْ ڒغْبنْ إِنُو
إِ د-يُوسِينْ زڭْ إِنِّي ذ أَيِي إِشَارّْهنْ،
شكْ ذ ونِّي ذ أَيِي غَا إِسّْڭعّْذنْ
زِي ثوُّورَا ن ڒْْموْثْ،
15 حِيمَا أَذْ بَارّْحغْ س مَارَّا شَّانْ نّشْ،
ذِي ثوُّورَا ن يدْجِيسْ ن صِيهْيُونْ.
نشّْ فَارّْحغْ خْ ؤُسنْجمْ نّشْ.
16 ثِيث. ڒڭْنُوسْ وْضَانْ ذڭْ وحْفُورْ ن ثُورْصُوضِي
إِ ڭِّينْ نِيثْنِي س يِيخفْ نْسنْ،
إِضَارنْ نْسنْ تّْوَاشدّنْ ذِي ثْرَاشَّا
نِّي سّْنُوفَّارنْ نِيثْنِي س يِيخفْ نْسنْ،. ▪
17 سِيذِي إِڭَّا إِخفْ نّسْ أَذْ ث سّْننْ،
نتَّا يُوغَا ثَاسْغَارْثْ.
أَعفَّانْ إِنُّوغْ ذِي ثْمڭَّا ن إِفَاسّنْ نّسْ.
أجّْ إِفِيڒَانْ أَذْ دّنْذْننْ. سِيلَاهْ.
18 يُوذْ. إِعفَّاننْ أَذْ د-ذوْڒنْ غَارْ ڒَْاخَارْثْ،
مَارَّا ڒڭْنُوسْ نِّي إِتُّونْ أَربِّي.
19 مَاشَا أَمزْڒُوضْ وَارْ إِتّْوَاتُّو إِ ڒبْذَا،
وَارْ إِتّْوَاقطّعْ ڒَْايَاسْ
ن يِينِّي إِتّْوَاحْصَارنْ إِ ڒبْذَا.
20 قُوفْ. كَّارْ، أَ سِيذِي،
حِيمَا وَارْ إِذِّيكّْوِيڒْ بْنَاذمْ إِجْهذْ كْثَارْ.
أجّْ ڒڭْنُوسْ أَذْ تّْوَاشَارّْعنْ
زَّاثْ إِ وُوذمْ نّشْ.
21 سِيڭّْوذْ إِ-ثنْ، أَ سِيذِي،
أجّْ ڒڭْنُوسْ أَذْ سّْننْ أَقَا أَثنْ ذ إِوْذَانْ! سِيلَاهْ.