‏1 إِ ؤُمقّْرَانْ ن إِمغْنَاجنْ.

‏2 شكْ ثَارْضِيذْ خْ ثمُّورْثْ، أَ سِيذِي،

ثسّنْقڒْبذْ ثَامحْبَاسْثْ ن يَاعْقُوبْ.

‏3 ثكّْسذْ ڒْْمُوعْصِييّثْ خْ ڒْْڭنْسْ نّشْ،

ثذْڒِيذْ مَارَّا دّْنُوبْ نّسْ. سِيلَاهْ.

‏4 شكْ ثْمنْعذْ مَارَّا أَفُوڭمْ،

ثسّْثوّْجذْ ڒْْحَاذُوقْ ن وغْضَابْ نّشْ.

‏5 أَرّْ أَنغْ، أَ أَربِّي ن ؤُسنْجمْ نّغْ،

تُّو أَغْضَابْ نّشْ خَانغْ.

‏6 مَا ثخْسذْ أَذْ خَانغْ ثسْعَارذْ إِ ڒبْذَا؟

مَا أَذْ ثڭّذْ أَغْضَابْ نّشْ

أَذْ إِقِّيمْ زِي جِّيڒْ أَڒْ جِّيڒْ؟

‏7 مَا وَارْ ذ أَنغْ ثجِّيذْ أَذْ ندَّارْ عَاوذْ،

حِيمَا أَذْ أَشْ إِفَارْحْ ڒْْڭنْسْ نّشْ؟ ^▪  

‏8 سْشنْ أَنغْ-د

ثَامخْسِيوْثْ نّشْ إِشوَّارنْ، أَ سِيذِي،

أوْشْ أَنغْ أَسنْجمْ نّشْ.

‏9 نشّْ خْسغْ أَذْ سْڒغْ

مِينْ غَا إِسِّيوڒْ أَربِّي، سِيذِي،

مَاغَارْ نتَّا أَذْ إِسِّيوڒْ أَكْ-ذ ڒْْڭنْسْ نّسْ

ؤُ أَكْ-ذ إِمْثِيقَّانْ نّسْ خْ ڒهْنَا.

غَارْومْ، مَاڒَا نِيثْنِي أَذْ د-ذوْڒنْ

تّْشَاڒَانْ خْ يِيخفْ نْسنْ.

‏10 نِيشَانْ، أَقَا يُوذسْ-د ؤُسنْجمْ نّسْ

إِ يِينِّي زَّايسْ إِتّڭّْوذنْ،

حِيمَا أَعُودْجِي نّسْ

أَذْ إِزْذغْ ذِي ثمُّورْثْ نّغْ.

‏11 ثَامخْسِيوْثْ إِشوَّارنْ ذ ڒَْامَانْ

أَذْ مّْسَاڭَارنْ،

ثَاسڭْذَا ذ ڒهْنَا أَذْ مّْسُوذُومنْ. ^▪  

‏12 ثِيذتّْ أَذْ ثغْمِي زِي ثمُّورْثْ،

ثَاسڭْذَا أَذْ ثسِّيجّْ غَارْ سْوَادَّايْ

زڭْ ؤُجنَّا.

‏13 سِيذِي أَذْ إِوْشْ ؤُڒَا ذ مِينْ إِصبْحنْ،

ثَامُّورْثْ نّغْ أَذْ ثوْشْ ڒْْغِيدْجثْ نّسْ. ^▪  

‏14 ثَاسڭْذَا أَذْ أَسْ ثِيزْوَارْ

زَّاثْ إِ وُوذمْ نّسْ،

أَذْ ثحْضَا جُّورّثْ ن إِصُورَافْ نّسْ.