أَذْلِيسْ وِيسّْ خمْسَا: إِزهِّيذنْ 107-150
1 قَاذَامْ سِيذِي،
مَاغَارْ نتَّا إِصْبحْ،
مَاغَارْ ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.
2 أجّْ إِنِّي إِتّْوَافكّنْ ن سِيذِي
أَذْ سِّيوْڒنْ أَمُّو،
إِنِّي إِفكّْ زڭْ ؤُفُوسْ
ن يِينِّي ثنْ إِحصَّارنْ، ▫ ▪
3 إِنِّي إِسّْمُونْ زِي ثمُّورَا،
زِي شَّارْقْ، زِي ڒْْغَارْبْ، زِي شَّامَالْ
ؤُ زِي ڒبْحَارْ. ▪
4 ثُوغَا ذِينْ إِنِّي إِودَّارنْ ذِي ڒخْڒَا،
أَبْرِيذْ نْسنْ إِكَّا خْ ثْنزْرُوفْثْ،
وَارْ ؤُفِينْ ثَانْذِينْثْ
مَاحنْذْ أَذْ ذَايسْ زذْغنْ.
5 ذَايْسنْ ڒَْاژْ ذ ؤُفَاذِي،
ڒعْمَارْ نْسنْ إِفْشڒْ ذَايْسنْ.
6 خنِّي سْغُوينْ غَارْ سِيذِي ذِي ڒحْصَارثْ نْسنْ،
ؤُ نتَّا إِفكّْ إِ-ثنْ زِي ثِيڭّْوُوذِي نْسنْ.
7 نتَّا إِنْذهْ إِ-ثنْ
ذڭْ إِجّْ ن وبْرِيذْ إِسڭّذْ،
مَاحنْذْ أَذْ ؤُيُورنْ غَارْ إِشْثْ ن ثنْذِينْثْ
حِيمَا أَذْ ذَايسْ زذْغنْ.
8 أجّْ إِ-ثنْ أَذْ قَاذَانْ سِيذِي
خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
9 مَاغَارْ نتَّا إِسّْجِّيونْ ڒعْمَارْ إِفُّوذنْ،
ڒعْمَارْ إِدْجُوژنْ إِشُّورْ إِ-ث س ڒْْخَارْ.
10 ثُوغَا ذِينْ إِنِّي إِقِّيمنْ
ذِي ثَادْجسْثْ ذ ثِيڒِي ن ڒْْموْثْ،
س إِشذِّيينْ ن دّدْجْ ذ وُوزَّاڒْ،
11 مَاغَارْغوّْغنْ
أَكْ-ذ وَاوَاڒنْ ن أَربِّي،
وَارْ سْڒِينْ غَارْ شّْوَارْ
ن ؤُمْعُودْجِي خْ كُوڒْشِي.
12 نتَّا إِسّقْنعْ ؤُڒْ نْسنْ س ثَامَارَا،
نّْذرْفنْ، وَارْ ؤُفِينْ وِي غَا إِوْشنْ أَفُوسْ.
13 خنِّي ڒَْاغَانْ إِ سِيذِي ذِي ڒحْصَارثْ نْسنْ
ؤُ نتَّا إِسّنْجمْ إِ-ثنْ
زِي ثِيڭّْوُوذِي نْسنْ،
14 نتَّا إِسُّوفّغْ إِ-ثنْ زِي ثَادْجسْثْ
ؤُ زِي ثِيڒِي ن ڒْْموْثْ،
يَارْژَا إِشذِّيينْ نْسنْ.
15 أجّْ إِ-ثنْ أَذْ قَاذَانْ سِيذِي
خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
16 مَاغَارْ نتَّا يَارْژَا ثِيوُّورَا ن نّْحَاسْ،
إِشَارّڭْ زّكْرُونَاثْ ن وُوزَّاڒْ.
17 ثُوغَا ذِينْ إِبُوهَاڒِييّنْ إِنِّي إِتّْوَاغزَّانْ
زِي سِّيبّثْ ن ؤُخطُّو نْسنْ ذ ڒْْمُوعْصِييّثْ نْسنْ.
18 إِعِيفّْ ڒعْمَارْ نْسنْ زِي مَارَّا مَاشَّا،
إِوْضنْ أَڒْ ثوُّورَا ن ڒْْموْثْ.
19 خنِّي ڒَْاغَانْ إِ سِيذِي ذِي ڒحْصَارثْ نْسنْ
ؤُ نتَّا إِسّنْجمْ إِ-ثنْ زِي ثِيڭّْوُوذِي نْسنْ.
20 نتَّا إِسّكّْ أَوَاڒْ نّسْ،
إِسّْڭنْفَا إِ-ثنْ ؤُ إِسّنْجمْ إِ-ثنْ
زڭْ إِحُوفَارْ نْسنْ.
21 أجّْ إِ-ثنْ أَذْ قَاذَانْ سِيذِي
خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
22 أجّْ إِ-ثنْ أَذْ أَوْينْ ثِيوْهِيبِينْ ن ؤُقَاذِي،
أَذْ بَارّْحنْ ثِيمڭَّا نّسْ س ؤُسْڒِيوْڒوْ. ▪
23 ثُوغَا ذِينْ إِنِّي إِهكّْوَانْ
غَارْ ڒبْحَارْ س إِغَارُّوبَا،
إِنِّي إِخدّْمنْ خْ وَامَانْ إِوسْعنْ. ▪
24 ژْرِينْ مِينْ إِڭَّا سِيذِي،
ؤُڒَا ذ لْمُوعْجِيزَاثْ نّسْ ذِي ڒَْادْجَاغْ ن ڒبْحَارْ.
25 مَاڒَا نتَّا إِسِّيوڒْ،
إِكَّارْ-د إِجّْ ن ؤُسمِّيضْ
نِّي إِسّْڭعّْذنْ ڒمْوَاجْ نّسْ.
26 ڭعّْذنْ غَارْ ؤُجنَّا
ؤُشَا هْوَانْ غَارْ ثِيسِي ن وَامَانْ إِهوْڒنْ.
إِفْسِي ڒعْمَارْ نْسنْ زِي ثِيڭّْوُوذِي.
27 ميّْڒنْ، ميّْڒمْ
زِي سَّا غَارْ ذَا أَمْ ؤُمسْشَارْ،
إِودَّارْ أَسنْ مَارَّا ڒعْقڒْ نْسنْ.
28 خنِّي ڒَْاغَانْ إِ سِيذِي ذِي ڒحْصَارثْ نْسنْ
ؤُ نتَّا إِسُّوفّغْ إِ-ثنْ-د
زِي ثِيڭّْوُوذِي نْسنْ.
29 نتَّا يَارَّا أَسمِّيضْ أَذْ يَارْسَا،
أَڒَامِي ذوْڒنْ ڒمْوَاجْ سّغْضنْ.
30 نِيثْنِي فَارْحنْ ؤُمِي أَرْسِينْ ڒمْوَاجْ
ؤُ ؤُمِي نتَّا إِنْذهْ إِ-ثنْ
غَارْ ڒْْمُويِّي إِ غَارسْ ثُوغَا تّْمژْرِيينْ.
31 أجّْ إِ-ثنْ أَذْ قَاذَانْ سِيذِي
خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ،
32 أجّْ إِ-ثنْ أَذْ ث سّْعُودْجنْ
ذڭْ وڭْرَاوْ ن ڒْْڭنْسْ،
أَذْ ث شنّْعنْ ذِي ڒْْحڒْقثْ ن إِمْغَارنْ.
33 نتَّا يَارَّا إِغزْرَانْ ذ ڒخْڒَا،
ڒْْعُونْصَارَاثْ يَارَّا إِ-ثنْثْ
ذ ثَامُّورْثْ إِفُّوذنْ،
34 ثَامُّورْثْ إِ إِتِّيشنْ ڒْْغِيدْجثْ
يَارَّا إِ-ت ذ ثَامدْجَاحْثْ،
زِي سِّيبّثْ ن ثُوعفّْنَا
ن يِينِّي ذَايسْ إِزدّْغنْ.
35 نتَّا يَارَّا ڒخْڒَا
ذ أَيڒْمَامْ ن وَامَانْ،
ثَامُّورْثْ يُوژْغنْ ذ ڒْْعُونْصَارَاثْ.▪
36 ذِينِّي إِ إِسّزْذغْ إِنِّي إِدْجُوژنْ
ؤُشَا ذِينْ سّْبدّنْ نِيثْنِي إِشْثْ ن ثنْذِينْثْ
مَاحنْذْ أَذْ ذَايسْ زذْغنْ.
37 نِيثْنِي زَارّْعنْ ذڭْ إِيَّارنْ،
تّژُّونْ ثِيزَايَارِينْ ذڭْ إِمَارْجَاعنْ،
ثِينِّي د-إِتَّاوْينْ إِڭُومَّا
ذ ڒْْغِيدْجثْ نْسنْ.
38 نتَّا إِبَاركْ إِ-ثنْ،
أَڒَامِي ذوْڒنْ ذڭْ وَاطَّاسْ،
أَڭْڒَا ن ڒْْمَاڒْ نْسنْ وَارْ إِتّْوَاسّمْژِي.
39 خنِّي مَاشَا ذَاكّْوَاڒنْ ذِي ذْرُوسْ عَاوذْ،
هكّْوَانْ غَارْ ڒَْادْجَاغْ
زِي سِّيبّثْ ن ڒحْصَارثْ
ذ ڒغْبنْ ذ وشْضَانْ.
40 نتَّا إِتّْكبَّا أَسحْقَارْ
خْ ثَارْوَا ن ثَاصِيڒثْ،
إِجَّا إِ-ثنْ تّثْلِيعنْ ذِي ڒخْڒَا
مَانِي وَارْ دْجِينْ إِبْرِيذنْ. ▪
41 إِسّْڭعّذْ-د أَمزْڒُوضْ زِي ڒغْبنْ
ؤُشَا يَارَّا ڒَْادْجَاثْ أَمْ ثْحِيمَارِينْ ن وُودْجِي. ▪
42 إِنِّي إِڭُّورنْ نِيشَانْ تّْوَاڒَانْ
ؤُشَا فَارّْحنْ،
مَاشَا مَارَّا أَيْثْ ن ڒْْمُوعْصِييّثْ
تّقّْننْ أَقمُّومْ نْسنْ. ▪
43 ونِّي ذ أَمِيغِيسْ، أجّْ إِ-ث أَذْ إِحْضَا،
أجّْ إِ-ثنْ أَذْ سّْننْ نِيشَانْ
ثِيمڭَّا ن ثْمخْسِيوْثْ ن سِيذِي.