1 ثِيغِيثْ ن ثمْغَارِينْ
ثْبنَّا ثَادَّارْثْ نّسْ،
مَاشَا ثُوبُّوهڒْيَا ثْهدّمْ إِ-ت
س إِفَاسّنْ نّسْ.
2 ونِّي إِڭُّورنْ ذِي ڒصْفَايثْ نّسْ،
إِتّڭّْوذْ سِيذِي،
مَاشَا ونِّي إِتّفّْغنْ زڭْ إِبْرِيذنْ نّسْ،
إِسّحْقَارَا إِ-ث. ▪
3 ذڭْ ؤُقمُّومْ ن ؤُبُوهَاڒِي
أَقَا ذِينْ ڒْْمشْعضْ إِ نّْفَاخثْ نّسْ،
مَاشَا إِينْشِيشنْ ن إِمِيغِيسنْ حطَّانْ ثنْ.
4 مَانِي وَارْ دْجِينْ إِفُونَاسنْ،
إِتّْغِيمَا ڒْْمذْوذْ إِخْوَا
مَاشَا س جّهْذْ ن ؤُفُونَاسْ
أَقَا ذِينْ صَّابثْ ثمْغَارْ.
5 أَشهَّاذْ ذ ثِيذتّْ وَارْ إِسّْخَارِّيقْ شَا،
مَاشَا أَشهَّاذْ إِسّْخَارِّيقنْ
إِتّْسُوضْ إِخَارِّيقنْ. ▪
6 إِ ؤُمسْثهْزِييْ وَارْ ذِينْ ثِيغِيثْ
خْمِي ت يَارزُّو،
مَاشَا إِ ؤُفهَّامْ إِهْونْ خَاسْ،
مَاحنْذْ أَذْ يَافْ ثُوسّْنَا.
7 أَڭّْوجْ خْ ورْيَازْ أَبُوهَاڒِي،
مَاغَارْ شكْ وَارْ غَارسْ ثتِّيفذْ شَا
إِينْشِيشنْ إِ إِسَّاوَاڒنْ ثُوسّْنَا.
8 ثِيغِيثْ ن ونِّي إِفتّْننْ
أَقَا-ت ذ ڒفْهَامثْ
ن وبْرِيذْ ن يِيخفْ نّسْ،
مَاشَا ثُوبُّوهڒْيَا ن إِبُوهَاڒِييّنْ ذ أَشْمَاثْ.
9 إِبُوهَاڒِييّنْ سْثهْزَانْ
س وعْذَاڒْ ن ؤُمَارْوَاسْ،
مَاشَا جَارْ إِنِّي إِڭُّورنْ نِيشَانْ
إِتّْوَافْ ڒْْخَاضَارْ.
10 ؤُڒْ إِسّنْ ثَارْزُوڭِي نّسْ،
ڒْْبَارَّانِي وَارْ إِزمَّارْ
أَذْ يَاشَا س ڒفْرَاحثْ نّسْ.
11 ثَادَّارْثْ ن إِعفَّاننْ أَذْ ثتّْوَاردّدْجْ،
مَاشَا ثَاقِيضُونْثْ ن إِنِّي إِڭُّورنْ نِيشَانْ
أَذْ ثنّوَّارْ.
12 أَذْ ثَاغْ إِتّْغِيڒْ أَسْ إِ شَا ن يِيجّنْ
أَقَا أَبْرِيذْ نِيشَانْ،
مَاشَا أَنڭَّارْ نّسْ مْغِيرْ إِبْرِيذنْ
إِتَّاوْينْ غَارْ ڒْْموْثْ. ▪
13 وَاخَّا غَارْ وضْحَاشْ ؤُڒْ إِتّڭّْ ڒحْرِيقْ،
وَاهْ، أَنڭَّارُو ن ڒفْرَاحثْ
ثتَّاكّْوَاضْ-د أَشْضَانْ. ▪
14 ونِّي غَارْ إِدْجَا وُوڒْ إِفّْغنْ زڭْ وبْرِيذْ،
أَذْ إِتّْوَاسّْجِيونْ س إِبْرِيذنْ نّسْ،
ؤُ أَرْيَازْ أَصبْحَانْ س يِيخفْ نّسْ. ▪
15 ونِّي إِدْجَانْ ذ أَحَافِي، إِتَّامنْ ذِي كُوڒْ أَوَاڒْ،
مَاشَا ونِّي إِفتّْننْ إِحطَّا أَصُورِيفْ نّسْ.
16 أَمِيغِيسْ إِتّڭّْوذْ ؤُ إِتّْحيَّاذْ خْ ڒْْغَارْ،
مَاشَا أَبُوهَاڒِي إِسعَّارْ،
ؤُمِي إِتّْغِيڒْ أَسْ أَقَا-ث ذِي ڒَامَانْ.
17 ونِّي إِتّْخيَّاقنْ ذغْيَا،
أَذْ إِڭّْ ثُوبُّوهڒْيَا،
ؤُ أَرْيَازْ إِنكّْوَانْ ثَاحْرَايْمشْثْ،
أَذْ إِتّْوَاشَارْهْ.
18 إِحَافِييّنْ أَذْ وَارْثنْ ثُوبُّوهڒْيَا،
مَاشَا إِنِّي إِفتّْننْ،
أَذْ أَسنْ قّْننْ س إِجّْ ن تَّاجْ ن ثُوسّْنَا.
19 إِغشَّاشنْ أَذْ أَضَارنْ
زَّاثْ إِ وُوذمْ ن إِصبْحَاننْ،
إِعفَّاننْ أَذْ أَضَارنْ
زَّاثْ إِ ثوُّورَا ن إِمْسڭَّاذنْ.
20 أَمزْڒُوضْ إِشَارّهْ إِ-ث عَاذْ
ؤُمدُّوكّڒْ نّسْ،
مَاشَا أَطَّاسْ ذ إِنِّي إِتّخْسنْ أَيْثْ ن بُو-وَاڭْڒَا. ▪
21 ونِّي إِسّحْقَارَانْ جَّارْ نّسْ،
إِتّڭّْ دّْنُوبْ،
مَاشَا سّعْذْ ن ونِّي إِتّْحِينَّانْ
خْ إِنِّي إِتّْوَاحْصَارنْ.
22 إِنِّي د-إِخدْجْقنْ ڒْْغَارْ،
مَا وَارْ تّْودَّارِينْ نِيثْنِي؟
ثَامخْسِيوْثْ إِشوَّارنْ ذ ڒَْامَانْ
أَقَا غَارْ يِينِّي إِتّْخَارَّاصنْ
ذِي مِينْ إِصبْحنْ. ▪
23 ذِي مَارَّا ڒْْوحْڒَانْ ن وَارْبرْ ذَايسْ ڒفْضڒْ،
مَاشَا ڒْْهَارْذْ ن إِينْشِيشنْ
إِندّهْ غَارْ وحْوَاجْ وَاهَا. ▫
24 تَّاجْ ن إِمِيغِيسنْ ذ أَڭْڒَا نْسنْ،
ثُوبُّوهڒْيَا ن إِبُوهَاڒِييّنْ
ذ ثُوبُّوهڒْيَا وَاهَا.
25 أَشهَّاذْ أَمْثِيقِّي إِسّنْجَامْ ڒعْمُورْ،
مَاشَا ونِّي يَارخُّونْ إِ إِخَارِّيقنْ،
إِشمّثْ.
26 ذِي ثِيڭّْوُوذِي ن سِيذِي ذَايسْ تِّيقثْ إِجهْذنْ،
نتَّا أَذْ يِيڒِي ذ أَمْشَانْ ن ثَاروْڒَا
إِ إِحنْجِيرنْ نّسْ.
27 ثِيڭّْوُوذِي ن سِيذِي ذ ڒْْعُونْصَارْ ن ثُوذَارْثْ،
إِ ؤُسنْجمْ زڭْ إِشذِّيينْ ن ڒْْموْثْ. ▪
28 ذڭْ وَاطَّاسْ ن ڒْْڭنْسْ
إِخمّڒْ ؤُشوَّارْ ن ؤُجدْجِيذْ،
مَاشَا ذِي ثِيكّسْثْ ن شّعْبْ
إِخمّڒْ ؤُهلّكْ نْ ڒْحَاكمْ.
29 ونِّي غَارْ إِدْجَا تَّاسِيعْ ن ڒْْخَاضَارْ،
غَارسْ ڒفْهَامثْ ثمْغَارْ،
مَاشَا ونِّي ذِي إِدْجَا بُوحْبڒْ إِحْصَارنْ
إِسّكَّارْ ثُوبُّوهڒْيَا.
30 ؤُڒْ إِصّحْ، أَقَا ذ ثُوذَارْثْ إِ أَرِّيمثْ،
مَاشَا ثُوسْمِي ذ أَرصُّوضْ ن يغْسَانْ.
31 ونِّي إِحصَّارنْ أَمحْذَاجْ،
إِسّحْقَارَا ونِّي ث إِ-د-إِخڒْقنْ،
مَاشَا ونِّي إِتّْحِينَّانْ خْ ؤُمزْڒُوضْ،
إِتّْشنّعْ إِ-ث. ▪
32 أَعفَّانْ إِتَّاژّڒْ خْ يِيخفْ نّسْ
س ڒْْغَارْ نّسْ إِ إِتّڭّْ،
مَاشَا أَمْسڭّذْ غَارسْ مَانِي إِ غَا يَارْوڒْ
عَاذْ ذِي ڒْْموْثْ نّسْ.
33 ثِيغِيثْ ثَارْسَا ذڭْ وُوڒْ ن إِفهَّامنْ،
مَاشَا مِينْ إِدْجَانْ
ذَاخڒْ ذڭْ إِبُوهَارِييّنْ
أَذْ إِتّْوَاسّْننْ. ▪
34 ثَاسڭْذَا ثسّْعُودْجْ ڒْْڭنْسْ،
مَاشَا ڒفْضِيحثْ ن شُّوعُوبْ ذ دّْنُوبْ.
35 ڒْْخَاضَارْ ن ؤُجدْجِيذْ
يَارْسَا خْ ؤُمْسخَّارْ إِفهّْمنْ
مَاشَا ونِّي إِفطّْحنْ
إِڒقّفْ إِ-ث ؤُذُوقّزْ نّسْ ن ؤُفُوڭمْ.