حِيزْقِييَالْ ذ أَعسَّاسْ خْ إِسْرَائِيل إِ ثْوَاڒَا وِيسّْ ثْنَاينْ
1 يُوسَا-د غَارِي وَاوَاڒْ ن سِيذِي، إِنَّا: 2 ”أَ مِّيسْ ن بْنَاذمْ، سِيوڒْ أَكْ-ذ ثَارْوَا ن ڒْْڭنْسْ نّشْ، إِنِي أَسنْ: ’خْمِي غَا يْأَوْيغْ سِّيفْ خْ ثمُّورْثْ ؤُشَا ڒْْڭنْسْ ن ثمُّورْثْ أَذْ إِكْسِي إِجّْ ن ورْيَازْ زِي طّْرُوفَا نّسْ ؤُشَا أَذْ ث ڭّنْ ذ أَعسَّاسْ إِ يِيخفْ نْسنْ 3 ؤُشَا وَانِيثَا إِثْوَاڒَا يُوسَا-د سِّيفْ خْ ثمُّورْثْ، خنِّي إِتّْسُوضْ ذڭْ ؤُيِيشّْ ن إِشَارِّي ؤُشَا إِعدْجمْ إِ ڒْْڭنْسْ، 4 ؤُشَا أَقَا ذِينْ إِجّنْ إِسْڒَا إِ ؤُسُوضِي ذڭْ ؤُيِيشّْ ن إِشَارِّي، مَاشَا وَارْ إِجِّي إِخفْ نّسْ أَذْ زَّايسْ إِتّْوَاعْڒمْ ؤُشَا يُوسَا-د سِّيفْ، إِكّسْ إِ-ث، خنِّي إِذَامّنْ نّسْ أَذْ إِڒِينْ خْ ؤُزدْجِيفْ نّسْ. 5 نتَّا إِسْڒَا إِ ڒْْحسّْ ن ؤُسُوضِي ذڭْ ؤُيِيشّْ ن إِشَارِّي، مَاشَا وَارْ إِجِّي إِخفْ نّسْ أَذْ إِتّْوَاعْڒمْ، إِذَامّنْ نّسْ أَقَا أَثنْ خَاسْ، مَاشَا ڒعْمَارْ ن ونِّي إِجِّينْ إِخفْ نّسْ أَذْ إِتّْوَاعْڒمْ، أَذْ إِنْجمْ.
6 مَاشَا مَاڒَا أَعسَّاسْ إِثْوَاڒَا سِّيفْ يُوسَا-د ؤُشَا وَارْ إِسُوضْ ذڭْ ؤُيِيشّْ ن إِشَارِّي، أَڒَامِي وَارْ إِتّْوَاعْڒمْ ڒْْڭنْسْ ؤُشَا سِّيفْ يُوسَا-د، إِكّسْ إِجّْ ن ڒعْمَارْ جَارْ أَسنْ، خنِّي أَقَا نتَّا إِمّكْسِي زِي سِّيبّثْ ن ڒْْمُوعْصِييّثْ ن يِيخفْ نّسْ، مَاشَا نشّْ أَذْ تَّارغْ إِذَامّنْ نّسْ زڭْ ؤُفُوسْ ن ؤُعسَّاسْ.‘ “
7 ”شكْ، أَ مِّيسْ ن بْنَاذمْ، نشّْ ڭِّيغْ شكْ ذ أَعسَّاسْ خْ ثَادَّارْثْ ن إِسْرَائِيل. أَذْ ثسْڒذْ إِجّْ ن وَاوَاڒْ زڭْ ؤُقمُّومْ إِنُو ؤُشَا أَذْ أَسنْ ثْعڒْمذْ زَّايِي. ▪ 8 ؤُمِي نشّْ نِّيغْ إِ ؤُعفَّانْ: ’أَ أَعفَّانْ، شكْ أَذْ ثمّْثذْ ڒْْموْثْ!‘، ؤُ شكْ وَارْ ثسِّيوِيڒذْ مَاحنْذْ أَذْ ثْعڒْمذْ إِ ؤُعفَّانْ خْ وبْرِيذْ نّسْ إِودَّارنْ، خنِّي أَذْ إِمّثْ ؤُعفَّانْ نِّي س ڒْْمُوعْصِييّثْ نّسْ، مَاشَا نشّْ أَذْ تَّارغْ إِذَامّنْ نّسْ زڭْ ؤُفُوسْ نّشْ. 9 مَاشَا مَاڒَا شكْ ثْعڒْمذْ إِ ؤُعفَّانْ خْ وبْرِيذْ نّسْ، مَاحنْذْ أَذْ أَسْ إِحيّذْ ؤُشَا نتَّا وَارْ إِحيّذْ خْ وبْرِيذْ نّسْ، خنِّي نتَّا أَذْ إِمّثْ س ڒْْمُوعْصِييّثْ نّسْ، مَاشَا شكْ ثسّْنجْمذْ ڒعْمَارْ نّشْ.“
10 ”شكْ، أَ مِّيسْ ن بْنَاذمْ، إِنِي إِ ثَادَّارْثْ ن إِسْرَائِيل: ’أَمُّو إِ ثسَّاوَاڒمْ، ثقَّارمْ: ’إِعذِّييّنْ نّغْ ذ دّْنُوبْ نّغْ أَقَا أَثنْ خَانغْ ؤُشَا نْهلّكْ ذَايْسنْ، خنِّي مَامّشْ غَا نقِّيمْ ندَّارْ؟‘ ▪ 11 إِنِي أَسنْ: ’س ثِيذتّْ أَمْ دَّارغْ نشّْ، إِقَّارْ سِيذِي إِنُو، سِيذِي،عمَّارْصْ وَارْ أَرطِّيغْ خْ ڒْْموْثْ ن ؤُعفَّانْ، مَاشَا أَذْ أَرْضغْ أَعفَّانْ خْمِي غَا إِثُوبْ زڭْ وبْرِيذْ نّسْ ؤُشَا أَذْ إِدَّارْ. ثُوبمْ، ثُوبمْ زڭْ وبْرِيذنْ نْومْ إِعفّْننْ، مَاغَارْ مَايمِّي غَا ثمّْثذْ، أَ ثَادَّارْثْ ن إِسْرَائِيل؟‘ “ ▪
12 ”شكْ، أَ مِّيسْ ن بْنَاذمْ، إِنِي إِ ثَارْوَا ن ڒْْڭنْسْ نّشْ: ’ثَاسڭْذَا ن ؤُمْسڭّذْ وَارْ ث إِسّْنجِّيمْ ذڭْ وَاسّْ نِّي ذِي غَا إِخْضَا ؤُشَا ثُوعفّْنَا ن ؤُعفَّانْ وَارْ زَّايسْ إِ غَا إِنْقَارضْ ذڭْ وَاسّْ نِّي ذِي غَا إِثُوبْ زِي ثُوعفّْنَا نّسْ. أَمْسڭّذْ وَارْ إِزمَّارْ أَذْ إِقِّيمْ إِدَّارْ س ثْسڭْذَا نّسْ ذڭْ وَاسّْ نِّي ذِي غَا إِخْضَا.▪ 13 ؤُمِي نِّيغْ نشّْ إِ ؤُمْسڭّذْ، أَقَا نتَّا أَذْ إِدَّارْ س ثِيذتّْ، مَاشَا نتَّا إِتِّيقّْ ذِي ثْسڭْذَا نّسْ ؤُشَا إِڭَّا ڒْْمُوعْصِييّثْ، خنِّي وَارْ ثتِّيڒِي عَاذْ ڒِْيذَارثْ ذِي ثْسڭْذَا نّسْ، مَاشَا ذِي ڒْْغشّْ نّسْ نِّي إِڭَّا، أَقَا أَذْ ذَايسْ إِمّثْ. 14 مَاڒَا نشّْ نِّيغْ إِ ؤُعفَّانْ: ڒْْموْثْ إِ غَا ثمّْثذْ!، ؤُشَا نتَّا إِثُوبْ خْ دّنْبْ نّسْ ؤُشَا أَذْ إِڭّْ ڒْْحقّْ ذ ثْسڭْذَا، 15 - أَقَا أَعفَّانْ أَذْ إِسّعْقبْ دِّييّثْ نّسْ، أَذْ إِخدْجصْ مِينْ إِتّْوَاشَارنْ، أَذْ يُويُورْ ذِي ثْوصَّا ن ثُوذَارْثْ بْڒَا مَا أَذْ إِڭّْ ڒْْغشّْ - خنِّي أَذْ إِدَّارْ س ثِيذتّْ، وَارْ إِتّْمتِّي شَا. 16 مَارَّا دّْنُوبْ نِّي إِڭَّا، وَارْ د أَسْ تّْوَاحسّْبنْ شَا. إِڭَّا ڒْْحقّْ ذ ثْسڭْذَا، أَذْ إِدَّارْ س ثِيذتّْ.‘ “
17 ”ثَارْوَا نْ ڒْڭنْسْ نّشْ قَّارنْ: ’أَبْرِيذْ ن سِيذِي إِنُو وَارْ إِدْجِي شَا نِيشَانْ!‘، ؤُمِي أَبْرِيذْ ن سِيمَانْثْ نْسنْ وَارْ إِدْجِي شَا نِيشَانْ. ▪ 18 مَاڒَا أَمْسڭّذْ إِحيّذْ خْ ثْسڭْذَا نّسْ ؤُشَا إِتّڭّْ ڒْْغشّْ، خنِّي أَذْ ذَايسْ إِمّثْ، 19 ؤُشَا خْمِي غَا إِثُوبْ ؤُعفَّانْ خْ ثُوعفّْنَا نّسْ ؤُشَا أَذْ إِڭّْ ڒْْحقّْ ذ ثْسڭْذَا، خنِّي أَذْ زَّايسْ إِدَّارْ. 20 عَاذْ ثقَّارمْ: ’أَبْرِيذْ ن سِيذِي وَارْ إِدْجِي شَا نِيشَانْ!‘ نشّْ أَذْ خَاومْ حكْمغْ، أَ ثَادَّارْثْ ن إِسْرَائِيل، كُوڒْ إِجّْ أَمْ يِيبْرِيذنْ نّسْ.“
ڒخْبَارْ خْ ؤُوطُّو ن ؤُرْشَالِيمْ
21 ذڭْ ؤُسڭّْوَاسْ وِيسّْ ثنْعَاشْ ن لْمنْفَا نّغْ، ذڭْ ؤُيُورْ وِيسّْعشْرَا، ذڭْ وَاسّْ وِيسّْ خمْسَا ن ؤُيُورْ إِمْسَارْ بلِّي يُوسَا-د غَارِي إِجّْ ن ؤُمَارْوَاڒْ زِي ؤُرْشَالِيمْ، إِنَّا: ”ثَانْذِينْثْ ثتّْوَاغلّبْ!“▪ 22 غَارْ دْجِيڒثْ ثُوغَا أَفُوسْ ن سِيذِي خَافِي، قْبڒْ د غَا يَاسْ ؤُمَارْوَاڒْ ؤُ نتَّا يَارْزمْ أَيِي أَقمُّومْ ؤُمِي د-يُوسَا ؤُمَارْوَاڒْ غَارِي ذِي ضّْبحْ. ثُوغَا أَقمُّومْ إِنُو إِتّْوَارْزمْ ؤُشَا وَارْ تِّيڒِيغْ عَاذْ ذ أَيْنَاوْ.
23 يُوسَا-د غَارِي وَاوَاڒْ ن سِيذِي، إِنَّا: 24 ”أَ مِّيسْ ن بْنَاذمْ، إِمزْذَاغْ ن ڒْْخِيرْبَاثْ-أَ ذِي ثمُّورْثْ ن إِسْرَائِيل سَّاوَاڒنْ، قَّارنْ: ’إِبْرَاهِيمْ ثُوغَا-ث ذ إِجّْ ؤُشَا إِوَارْثْ ثَامُّورْثْ-أَ. نشِّينْ ڒخُّو ذڭْ وَاطَّاسْ، ثمّوْشْ أَنغْ ثمُّورْثْ ذ ثَاسْغَارْثْ!‘ 25 س ؤُيَا، إِنِي أَسنْ: أَمُّو إِ إِقَّارْ سِيذِي إِنُو، سِيذِي: كنِّيوْ ثتّثمْ أَيْسُومْ أَكْ-ذ إِذَامّنْ ؤُشَا ثسّْڭعَّاذمْ ثِيطَّاوِينْ نْومْ غَارْ إِميْضَا ن لْ-أَصْنَامْ نْومْ ؤُشَا ثسِّيزَّاڒمْ إِذَامّنْ. مَا إِعدّڒْ أَذْ ثطّْفمْ كنِّيوْ ثَامُّورْثْ ذ ڒْْوَارْثْ؟ ▪ 26 ثتّْبدَّامْ خْ سِّيفْ نْومْ، ثتّڭّمْ جّْعِيفشْثْ ؤُ كُوڒْ أَرْيَازْ إِسّْخمَّاجْ ثَامْغَارْثْ ن جَّارْ نّسْ. مَا إِعدّڒْ أَذْ ثطّْفمْ كنِّيوْ ثَامُّورْثْ ذ ڒْْوَارْثْ؟‘ 27 أَمُّو إِ ذ أَسنْ غَا ثِينِيذْ: ’أَمُّو إِ إِقَّارْ سِيذِي إِنُو، سِيذِي: س ثِيذتّْ أَمْ دَّارغْ نشّْ، أَقَا إِنِّي إِدْجَانْ خْ ڒْْخِيرْبَاثْ أَذْ وْضَانْ س سِّيفْ، ؤُ ونِّي إِدْجَانْ خْ وُوذمْ ن ييَّارْ أَذْ ث وْشغْ إِ ڒوْحُوشْ ن ڒخْڒَا مَاحنْذْ أَذْ ث صَارْضنْ ؤُشَا إِنِّي إِدْجَانْ ذِي لْقلْعَاثْ ؤُ ذڭْ إِفْرَانْ أَذْ مّْثنْ س طَّاعُونْ! 28 مَاغَارْ نشّْ أَذْ أَرّغْ ثَامُّورْثْ ذ أَردّدْجْ ذ إِجّْ ن ؤُمذْيَا ن وَارْجفْ ؤُشَا نّْفَاخثْ ن صُّولْطَا نّسْ أَذْ ثتّْوَاسّْبدّْ. إِذُورَارْ ن إِسْرَائِيل أَذْ تّْوَاردّْدْجنْ أَڒَامِي وَارْ ذِينْ وِي خَاسنْ إِ غَا إِژْوَانْ. 29 خنِّي أَذْ سّْننْ بلِّي نشّْ ذ سِيذِي، خْمِي غَا أَرّغْ ثَامُّورْثْ ذ أَردّدْجْ ذ إِجّْ ن ؤُمذْيَا ن وَارْجفْ زِي سِّيبّثْ ن جّْعَايفْ نْسنْ نِّي ڭِّينْ.‘ “
30 ”شكْ، أَ مِّيسْ ن بْنَاذمْ، أَيْثْ ن ڒْْڭنْسْ نّشْ سَّاوَاڒنْ خَاكْ غَارْ ڒحْيُوضْ ؤُ غَارْ وَاذَافْ ن ثُوذْرِينْ. إِجّْ إِسَّاوَاڒْ أَكْ-ذ ونّغْنِي، كُوڒْ إِجّْ أَكْ-ذ ؤُمَاسْ، ؤُشَا إِقَّارْ: ’أَسمْ-د خنِّي ؤُشَا سْڒمْ مَانْ أَوَاڒْ إِ د إِفّغْ زڭْ ؤُقمُّومْ ن سِيذِي!‘ 31 نِيثْنِي أَذْ غَاركْ د-أَسنْ أَمْ مَامّشْ إِ د-يُوسَا إِجّْ ن ؤُبَارُّو ن ڒْْڭنْسْ، أَذْ قِّيمنْ زَّاثكْ أَمْ ڒْْڭنْسْ إِنُو ؤُشَا أَذْ سْڒنْ إِ وَاوَاڒنْ نّشْ، مَاشَا وَارْ زَّايْسنْ تّڭّنْ، مَاغَارْ س ؤُقمُّومْ نْسنْ سّْنِيعْمِيڒنْ ثَايْرِي، مَاشَا ؤُڒْ نْسنْ إِڭُّورْ أَوَارْنِي إِ ڒفْضڒْ ن يِيخفْ نْسنْ. ▪ 32 ؤُشَا خْزَارْ، أَقَا شكْ غَارْسنْ أَمْ ونِّي إِتّْغنَّاجنْ إِزْڒَانْ س ثْمِيجَّا ثصْبحْ، أَمشْنَاوْ ونِّي إِزمَّارنْ أَذْ إِڭَّا لْمُوسِيقَا مْلِيحْ. نِيثْنِي أَذْ سْڒنْ غَارْ وَاوَاڒنْ نّشْ، مَاشَا وَارْ زَّايْسنْ تّڭّنْ. 33 مَاشَا ڒَْامِي أَذْ د-يَاسْ أَيَا - خْزَارْ، أَذْ د-يَاسْ! - خنِّي أَذْ سّْننْ بلِّي ثُوغَا إِجّْ ن ؤُنَابِي ذِي ڒْْوسْطْ نْسنْ.“