أَسِيزْذڭْ ذ ؤُرقّعْ ن إِسْرَائِيل
1 ”شكْ، أَ مِّيسْ ن بْنَاذمْ، نَابّْ إِ إِذُورَارْ ن إِسْرَائِيل، إِنِي: ’إِذُورَارْ ن إِسْرَائِيل، سْڒمْ إِ وَاوَاڒْ ن سِيذِي!▪ 2 أَمُّو إِ إِقَّارْ سِيذِي إِنُو، سِيذِي: مِينْزِي ڒعْذُو إِنَّا خَاومْ: إِيَا، أَقَا ڒڭْعُوذِي نْ ڒبْذَا ذوْڒنْثْ أَنغْ ذ ثَاسْغَارْثْ! ... ▪
3 ... س ؤُيَا نَابّْ، إِنِي: أَمُّو إِ إِقَّارْ سِيذِي إِنُو، سِيذِي: مِينْزِي أَردّْدْجنْ ؤُ صَارْضنْ كنِّيوْ زِي مَارَّا إِغزْذِيسنْ، حِيمَا أَذْ ثْذوْڒمْ ذ ثَاسْغَارْثْ ن مِينْ إِقِّيمنْ نْ ڒڭْنُوسْ ؤُ مِينْزِي ثتّْوَاسّكَّارنْ خَاومْ أَوَاڒنْ ؤُشَا ثْذوْڒمْ إِ ؤُشقَّافْ جَارْ ڒْْڭنْسْ،
4 ... س ؤُيَا، إِذُورَارْ ن إِسْرَائِيل، سْڒمْ إِ وَاوَاڒْ ن سِيذِي إِنُو، سِيذِي! أَمُّو إِ إِقَّارْ سِيذِي إِنُو، سِيذِي، إِ إِذُورَارْ ذ ثوْرِيرِينْ، إِ ثْغزْرَاثِينْ ذ ڒْْوَاطَاثْ، إِ ڒْْخِيرْبَاثْ تّْوَاردّْدْجنْثْ ؤُ إِ ثْندَّامْ إِ إِجِّينْ، ثِينِّي إِذوْڒنْ إِ ثْكشَّاضْثْ ذ ڒْْحڭْرَا إِ مِينْ إِقِّيمنْ ن ڒڭْنُوسْ نِّي د أَومْ د-إِنّْضنْ،
5 ... س ؤُيَا، أَمُّو إِ إِقَّارْ سِيذِي إِنُو، سِيذِي: س ثِيذتّْ، أَقَا ذِي ثْمسِّي ن ثُوسْمِي إِنُو إِقدّْسنْ سِّيوْڒغْ ضِيدّْ إِ مِينْ إِقِّيمنْ ن ڒڭْنُوسْ ؤُ ضِيدّْ إِ مَارَّا ثَامُّورْثْ ن إِذُومْ، إِنِّي إِوْشِينْ ثَامُّورْثْ إِنُو ذ ثَاسْغَارْثْ إِ يِيخفْ نْسنْ، س ڒفْرَاحثْ ن وُوڒْ مَارَّا، س ڒعْمَارْ إِشُّورنْ س ؤُسحْقَارْ، مَاحنْذْ دّْمَانِي ن ثَاروْسَا أَذْ أَسنْ إِڒِينْثْ ذ ثَاكشَّاضْثْ!
6 ... س ؤُيَا، نَابّْ ضِيدّْ إِ ثمُّورْثْ ن إِسْرَائِيل ؤُشَا إِنِي إِ إِذُورَارْ ذ ثوْرِيرِينْ ؤُ إِ ثْغزْرَاثِينْ ذ ڒْْوَاطَاثْ: أَمُّو إِ إِقَّارْ سِيذِي إِنُو، سِيذِي، خْزَارْ، نشّْ سِيوْڒغْ ذِي ثُوسْمِي إِنُو إِقدّْسنْ ؤُ ذڭْ وسْعَارْ إِنُو، مِينْزِي كنِّيوْ أَقَا ثَارْبُومْ ڒْْحڭْرَا ن ڒڭْنُوسْ. ▪
7 ... س ؤُيَا، أَمُّو إِ إِقَّارْ سِيذِي إِنُو، سِيذِي، نشّْ سّْڭعّْذغْ أَفُوسْ إِنُو، ژُودْجغْ: س ثِيذتّْ، ڒڭْنُوسْ إِ ذ أَومْ د-إِنّْضنْ أَذْ أَرْبُونْ ڒْْحڭْرَا س يِيخفْ نْسنْ! 8 مَاشَا كنِّيوْ، إِذُورَارْ ن إِسْرَائِيل، أَذْ ثوْشمْ عَاوذْ ڒفْرُوعْ نْومْ ؤُشَا أَذْ د-ثَاوْيمْ ڒْْغِيدْجثْ نْومْ إِ ڒْْڭنْسْ إِنُو إِسْرَائِيل، مِينْزِي عْڒَاحَاڒْ أَذْ د-أَسنْ. 9 مَاغَارْ خْزَارْ، نشّْ أَذْ إِڒِيغْ أَكِيذْومْ ؤُشَا نشّْ أَذْ غَارْومْ نْقڒْبغْ ؤُ كنِّيوْ، أَ إِذُورَارْ، أَذْ خَاومْ شَارْزنْ عَاوذْ ؤُ أَذْ خَاومْ زَارّْعنْ. 10 نشّْ أَذْ أَرْنِيغْ إِوْذَانْ خَاومْ، مَارَّا ثَادَّارْثْ ن إِسْرَائِيل، وَاهْ، مَارَّا نتَّاثْ، ؤُشَا أَذْ سّْزذْغنْ ثِيندَّامْ ؤُ أَذْ بْنَانْ ڒْْخِيرْبَاثْ عَاوذْ. 11 أَذْ خَاومْ أَرْنِيغْ إِوْذَانْ ذ ڒْْمَاڒْ ؤُ نِيثْنِي أَذْ أَرْنِينْ ذڭْ يِيخفْ نْسنْ ؤُ أَذْ د-جّنْ ڒْْغِيدْجثْ ؤُ نشّْ أَذْ كنِّيوْ سّْزذْغغْ ذِينْ عَاوذْ، أَمْ ذڭْ وُوسَّانْ ن وشْحَاڒْ ؤُيَا، وَاهْ، نشّْ أَذْ أَرّغْ ڒْْحَاڒْ حْسنْ خْ ؤُمزْوَارْ نْومْ ؤُ كنِّيوْ أَذْ ثسّْنمْ بلِّي نشّْ ذ سِيذِي. 12 أَذْ جّغْ إِوْذَانْ أَذْ خَاومْ ؤُيُورنْ: ڒْْڭنْسْ إِنُو إِسْرَائِيل. نِيثْنِي أَذْ شكْ طّْفنْ ذ ڒْْوَارْثْ، أَ ڒْْڭنْسْ إِنُو، ؤُ كنِّيوْ، أَ إِذُورَارْ ن إِسْرَائِيل، أَذْ أَسنْ ثِيڒِيمْ ذ ڒْْوَارْثْ، ؤُ كنِّيوْ وَارْ ثتّْكشَّاضمْ عَاذْ أَرَّاوْ نْسنْ. 13 أَمُّو إِ إِقَّارْ سِيذِي إِنُو، سِيذِي: مِينْزِي قَّارنْ أَومْ: شمْ ثتّذْ إِوْذَانْ ؤُ شمْ ذ إِشْثْ ن ثمُّورْثْ إِ إِتّْكشَّاضنْ أَرَّاوْ ن ڒْْڭنْسْ نّمْ! ...
14 ... س ؤُيَا وَارْ ثشّذْ عَاذْ إِوْذَانْ ؤُ وَارْ ثسّْنقْرَاضذْ عَاذْ ڒْْڭنْسْ نّمْ!، أَمُّو إِ إِقَّارْ سِيذِي إِنُو، سِيذِي. 15 نشّْ أَذْ ڭّغْعمَّارْصْ أَذْ ثتّْوَاسڒْ عَاذْ ڒْْحڭْرَا نْ ڒڭْنُوسْ خَامْ ؤُ وَارْ ثْكسِّيذْ عَاذْ أَسْثهْزِي ن ڒڭْنُوسْ ؤُ وَارْ ثسّْنقْرَاضذْ عَاذْ ڒْْڭنْسْ نّمْ!، أَمُّو إِ إِقَّارْ سِيذِي إِنُو، سِيذِي.‘ “
16 يُوسَا-د غَارِي وَاوَاڒْ ن سِيذِي، إِنَّا: 17 ”أَ مِّيسْ ن بْنَاذمْ، ؤُمِي ثُوغَا ثَادَّارْثْ ن إِسْرَائِيل ثْزدّغْ ذِي ثمُّورْثْ نّسْ، أَقَا سّْخمّْجنْ ت س وبْرِيذْ نْسنْ ذ ثْمڭَّا نْسنْ. أَبْرِيذْ نْسنْ ثُوغَا-ث أَمْ ڒخْمجْ ن ثمْغَارْثْ إِ خْ دْجَانْ إِذَامّنْ ذڭْ وُوسَّانْ ن وعْزَاڒْ نّسْ. 18 نشّْ سّْفَارّْغغْ خَاسنْ أَسْعَارْ إِنُو زِي سِّيبّثْ ن إِذَامّنْ نِّي سِّيزّْڒنْ خْ ثمُّورْثْ ؤُ زِي سِّيبّثْ ن إِميْضَا ن لْ-أَصْنَامْ نْسمْ إِ زِي ت سّْخمْجنْ. 19 نخّْ سّْبزّْعغْ ثنْ جَارْ ڒڭْنُوسْ ؤُ نِيثْنِي تّْوَاسُّويْسنْ ذِي ثمُّورَا. نشّْ حكْمغْ خَاسنْ عْلَاحْسَابْ ثُويُورْثْ نْسنْ ؤُ عْلَاحْسَابْ ڒخْذَايمْ نْسنْ. 20 ؤُمِي إِوْضنْ غَارْ ڒڭْنُوسْ مَانِي ثُوغَا ؤُيُورنْ، سّْفضْحنْ إِسمْ إِقدّْسنْ إِنُو، مِينْزِي إِتّْوَانَّا خَاسنْ: ’إِنَا ذ ڒْْڭنْسْ ن سِيذِي، مَاشَا ثُوغَا إِتّْخصَّا أَذْ فّْغنْ زِي ثمُّورْثْ نّسْ.‘ ▪ 21 مَاشَا نشّْ سّْعِيزّغْ ثنْ ذِي طّْوعْ ن يِيسمْ إِنُو إِقدّْسنْ نِّي ثسّفْضحْ ثَادَّارْثْ ن إِسْرَائِيل جَارْ ڒڭْنُوسْ مَانِي ثُوغَا ؤُيُورنْ نِيثْنِي ...
22 ... س ؤُيَا، إِنِي إِ ثَادَّارْثْ ن إِسْرَائِيل: أَمُّو إِ إِقَّارْ سِيذِي إِنُو، سِيذِي: وَارْ ت تّڭّغْ ذِي طّْوعْ نْومْ، أَ ثَادَّارْثْ ن إِسْرَائِيل، مَاشَا ذِي طّْوعْ ن يِيسمْ إِنُو إِقدّْسنْ نِّي ثسّْفضْحمْ كنِّيوْ جَارْ ڒڭْنُوسْ مَانِي ثُوغَا ثُويُورمْ. 23 مَاغَارْ أَذْ سّْقدّْسغْ إِسمْ إِنُو إِمْغَارنْ نِّي ثسّْفضْحمْ ذِي ڒْوسْثْ نْسنْ، ؤُشَا ڒڭْنُوسْ أَذْ سّْننْ أَقَا نشّْ ذ سِيذِي، أَمُّو إِ إِقَّارْ سِيذِي إِنُو، سِيذِي، خْمِي غَا تّْوَاقدّْسغْ ذَايْومْ زَّاثْ إِ ثِيطَّاوِينْ نْسنْ. 24 مِينْزِي أَذْ كنِّيوْ كْسِيغْ زِي ڒڭْنُوسْ، أَذْ كنِّيوْ سّْمُونغْ زِي مَارَّا ثِيمُّورَا ؤُشَا أَذْ كنِّيوْ أَوْيغْ غَارْ ثمُّورْثْ نْومْ. 25 أَذْ خَاومْ زدْجْعغْ أَمَانْ إِزْذِيڭنْ ؤُشَا أَذْ تّْوَاسِّيزْذڭمْ. نشّْ أَذْ كنِّيوْ سِّيزْذڭغْ زِي مَارَّا ڒخْمُوجَاثْ نْومْ ؤُ زِي مَارَّا إِميْضَا نْومْ ن لْ-أَصْنَامْ. 26 أَذْ أَومْ وْشغْ ؤُڒْ ن جْذِيذْ ؤُ أَذْ ڭّغْ بُوحْبڒْ أَمَايْنُو ذِي ذَاخڒْ نْومْ ؤُشَا أَذْ كّْسغْ زِي أَرِّيمثْ نْومْ ؤُڒْ ن وژْرُو ؤُشَا أَذْ أَومْ وْشغْ ؤُڒْ ن ويْسُومْ. ▫ ▪ 27 أَذْ ڭّغْ أَرُّوحْ إِنُو ذِي ذَاخڒْ نْومْ ؤُ أَذْ أَرّغْ كنِّيوْ أَذْ ثڭّمْ ثِيوصَّا إِنُو ؤُ أَذْ ثحْضَامْ لْفَارَايِيضْ إِنُو ؤُ أَذْ زَّايْسنْثْ ثڭّمْ. 28 أَذْ ثْزذْغمْ ذِي ثمُّورْثْ نِّي وْشِيغْ إِ ڒجْذُوذْ نْومْ، ؤُشَا كنِّيوْ أَذْ ثِيڒِيمْ ذ ڒْْڭنْسْ إِنُو ؤُشَا نشّْ أَذْ إِڒِيغْ ذ أَربِّي نْومْ. 29 نشّْ أَذْ كنِّيوْ سّْنجْمغْ زِي مَارَّا ڒخْمُوجَاثْ نْومْ. أَذْ ڒَْاغِيغْ إِ إِمنْذِي ؤُشَا أَذْ ذَايسْ أَرْنِيغْ أَطَّاسْ ؤُ وَارْ ذ أَومْ تِّيشغْ ڒَْاژْ. ▪ 30 أَذْ أَرْنِيغْ أَمنِّي ڒْْغِيدْجثْ ن ثْشجِّيرَا ؤُ ن ييَّارْ، حِيمَا وَارْ خَاومْ ثكّْ عَاذْ ڒْْحڭْرَا ن ڒَْاژْ جَارْ ڒڭْنُوسْ. 31 خنِّي أَذْ ثِيذَارمْ ذڭْ إِبْرِيذنْ نْومْ إِعفّْننْ ذ ثْمڭَّا نْومْ وَارْ إِصبْحنْ ؤُ كنِّيوْ أَذْ ثْعِيفّمْ زڭْ يِيخفْ نْومْ ؤُ زِي جّْعَايفْ نْومْ. ▪ 32 مَاشَا وَارْ ت تّڭّغْ ذِي طّْوعْ نْومْ، أَمُّو إِ إِقَّارْ سِيذِي إِنُو، سِيذِي، سْنمْ ت مْلِيحْ! سضْحَامْ ؤُ سّْنمْ ڒفْضِيحثْ ن إِبْرِيذنْ نْومْ، أَ ثَادَّارْثْ ن إِسْرَائِيل.“
33 ”أَمُّو إِ إِقَّارْ سِيذِي إِنُو، سِيذِي: ’ذڭْ وَاسّْ نِّي أَذْ سِّيزذْڭغْ مَارَّا ڒْْمُوعْصِييَّاثْ نْومْ، أَذْ سّْزذْغغْ ثِيندَّامْ عَاوذْ ؤُشَا أَذْ بْنِيغْ عَاوذْ ڒْْخِيرْبَاثْ. 34 ثَامُّورْثْ إِتّْوَاردّْدْجنْ أَذْ ثتّْوَاشَارْزْ ذڭْ ومْشَانْ إِ غَا ثِيڒِي ثتّْوَاردّدْجْ زَّاثْ إِ ثِيطَّاوِينْ ن مَارَّا إِنِّي ت إِژكّْوَانْ. 35 أَذْ إِنِينْ: ثَامُّورْثْ نِّي ثُوغَا ثتّْوَاردّدْجْ، ثذْوڒْ أَمْ جّنّثْ ن عَاذْنْ ؤُ ثِيندَّامْ تّْوَاخَارَّابنْثْ ذ تّْوَاردّْدْجنْثْ ذ تّْوَاهذْمنْثْ، أَقَا تّْوَاسّْجهْذنْثْ ؤُ زدّْغنْ ذَايْسنْثْ إِمزْذَاغْ عَاوذْ. ▪ 36 خنِّي أَذْ سّْننْ ڒڭْنُوسْ نِّي إِقِّيمنْ ذڭْ ونّضْ نْومْ، أَقَا نشّْ، سِيذِي، أَذْ بْنِيغْ مِينْ إِتّْوَاهذْمنْ عَاوذْ ؤُ أَذْ ژُّوغْ خْ مِينْ إِتّْوَاردّْدْجنْ. نشّْ، سِيذِي، سِّيوْڒغْ ؤُ نشّْ أَذْ ث ڭّغْ.‘ “ ▪
37 ”أَمُّو إِ إِقَّارْ سِيذِي إِنُو، سِيذِي: ’أَذْ أَيِي ثتَّارْ ثَادَّارْثْ ن إِسْرَائِيل ؤُڒَا ذ مَانْ أَيَا حِيمَا أَذْ أَسنْ ث ڭّغْ. نشّْ أَذْ ذَايْسنْ أَرْنِيغْ إِوْذَانْ، أَڒَامِي أَذْ ذِينْ إِڒِينْ أَنشْثْ ن إِوْذَانْ أَمْ وُودْجِي. 38 أَنشْثْ إِدْجَانْ ن وُودْجِي إِقدّْسنْ أَمْ وُودْجِي إِ شُّورنْ ثَانْذِينْثْ ن ؤُرْشَالِيمْ ذِي ڒعْيُوذَاثْ نّسْ إِتّْوَاڭّنْ، أَمُّو إِ غَا إِڒِينْثْ ثْندَّامْ إِتّْوَاردّْدْجنْ شُّورنْثْ س وُودْجِي ذ إِوْذَانْ ؤُ نِيثْنِي أَذْ سّْننْ أَقَا نشّْ ذ سِيذِي.‘ “