‏1 وَا ذ أَوَاڒْ ذَايسْ ڒَْامَانْ: مَاڒَا إِخْسْ حذْ أَذْ يِيڒِي ذ أَمْغَارْ، أَقَا إِتّْمژْرِي ذڭْ إِشْثْ ن ڒْْخذْمثْ ثشْنَا. ‏2 مَاشَا إِتّْخصَّا إِ ؤُمْغَارْ أَذْ إِثْوَافْ بْڒَا ڒْْعِيبْ، أَذْ يِيڒِي ذ أَرْيَازْ ن إِشْثْ ن ثمْغَارْثْ، غَارسْ أَمكّنْ ن نّفْسْ، أَذْ يِيڒِي ذ أَسخَّايْ، أَذْ إِڭّْ س ؤُستّفْ، أَذْ يَارحّبْ س إِنوْجِيونْ، إِزمَّارْ أَذْ إِسّڒْمذْ. ^▪   ‏3 نتَّا وَارْ إِتِّيڒِي ذ أَمسْشَارْ نِيغْ إِوّثْ ذغْيَا س ؤُفُوسْ نّسْ، مَاشَا أَذْ يِيڒِي ذ أَمْوَاضعْ، وَارْ إِتّمْشُوبُّوشْ، وَارْ إِتِّيڒِي ذ أَقزَّازْ. ‏4 أَقَا نتَّا إِسّڭُّورْ ثَادَّارْثْ نّسْ مْلِيحْ ؤُشَا إِحكّمْ خْ إِحنْجِيرنْ نّسْ س مَارَّا ڒصْفَايثْ. ‏5 مَاشَا مَاڒَا نتَّا وَارْ إِزمَّارْ أَذْ إِسُّويُورْ ثَادَّارْثْ نّسْ، مَامّشْ غَا إِڭّْ أَذْ إِحْضَا ثَامسْمُونْثْ ن أَربِّي؟ ‏6 وَارْ إِتِّيڒِي ذ أَمحْضَارْ ن جْذِيذْ ذِي لْ-إِيمَانْ، حِيمَا وَارْ إِتُّوفّْ س ڒفْيُوشْ ؤُشَا أَذْ إِوْضَا ذِي شّْرعْ ن شِّيطَانْ. ‏7 عَاوذْ إِتّْخصَّا أَذْ غَارسْ ثِيڒِي صُّومْعثْ ثشْنَا غَارْ يِينِّي ذِي بَارَّا، حِيمَا وَارْ خَاسْ تّْعيِّيبنْ ؤُشَا وَارْ إِوطِّي شَا ذِي ڒفْخُوخْ ن شِّيطَانْ.

‏8 إِتّْخصَّا عَاوذْ إِ إِمْسخَّارنْ ذِي ثْمسْمُونْثْ أَذْ إِڒِينْ ذ إِمزْذَاڭنْ، وَارْ سِّيوِيڒنْ شَا س ثْنَاينْ ن إِڒْسَاونْ، وَارْ خزَّارنْ شَا غَارْ بِينُو أَطَّاسْ، وَارْ ضمّْعنْ ذِي أَرّْبحْ وَارْ إِحْڒِينْ. ^▪   ‏9 إِتّْخصَّا أَسنْ أَذْ طّْفنْ ذِي سِّيرّْ ن لْ-إِيمَانْ س ثْنفْسشْثْ ثصْفَا. ^▪   ‏10 أجّْ إِ-ثنْ أَذْ تّْوَاقدْجْبنْ ذ أَمزْوَارُو، ڒخْذنِّي، مَاڒَا إِبَانْ-د وَارْ ذَايْسنْ إِتِّيڒِي بُو ڒْْعِيبْ، أَذْ سخَّارنْ. ‏11 أَمُّو إِتّْخصَّا ؤُڒَا إِ ثِيمْغَارِينْ أَذْ أَرْسِينْثْ س ثْسخَّايْثْ، أَذْ حْضَانْثْ ذِي ڒعْقُوڒْ نْسنْثْ، أَذْ ذَايْسنْثْ ثِيڒِي ڒْْمَانثْ ذِي مَارَّا، وَارْ ذ تِّيڒِينْثْ ذ ثِيمْشقَّافِينْ. ‏12 إِتّْخصَّا إِ إِمْسخَّارنْ ذِي ثْمسْمُونْثْ، أَقَا كُوڒْ إِجّنْ زَّايْسنْ أَذْ يِيڒِي س إِشْثْ ن ثمْغَارْثْ، ؤُشَا إِتّْخسْصَا أَسْ أَذْ إِسُّويُورْ مْلِيحْ إِحنْجِيرنْ نّسْ ذ ثَادَّارْثْ نّسْ. ‏13 مِينْزِي إِنِّي إِتّڭّنْ ثَاسيَّارْثْ نْسنْ مْلِيحْ، أَذْ طّْفنْ إِ يِيخفْ نْسنْ إِجّْ ن ومْشَانْ إِشْنَا ذ وَاطَّاسْ ن ثرْيَاسْثْ ذِي لْ-إِيمَانْ ن يَاسُوع لْمَاسِيحْ. ^▪  

‏14 ؤُرِيغْ أَشْ-د مَانْ أَيَا ؤُشَا سِّيثِيمغْ أَذْ غَاركْ د-أَسغْ ذغْيَا. ‏15 مَاشَا مَاڒَاعطَّاڒغْ خَاكْ، أَذْ ثسّْنذْ مَامّشْ إِتّْخصَّا أَذْ نُويُورْ ذِي ثَادَّارْثْ ن أَربِّي، ثنِّي إِدْجَانْ ذ ثَامسْمُونْثْ ن أَربِّي إِدَّارنْ، أَپِيلَارْ ذ ذْسَاسْ ن ثِيذتّْ. ^▪   ‏16 سِّيرّْ وَانِيثَا ن ثْسڭْذَا ذ أَمقّْرَانْ س ثِيذتّْ!

”ذ ونِّي إِتّْوَاسَّارْڭْبنْ ذِي دَّاثْ،

إِتّْوَاسڭّْذنْ ذِي أَرُّوحْ،

إِضْحَارنْ-د إِ لْمَالَاكَاثْ،

إِتّْوَابَارّْحنْ زَّايسْ جَارْ ڒڭْنُوسْ،

ذ ونِّي زَّايسْ يُومْننْ ذِي دُّونشْثْ،

إِمّكْسِينْ ذڭْ ؤُعُودْجِي.“ ^▪