‏1 س ؤُيَا نشِّينْ عَاوذْ، ؤُمِي ذ أَنغْ د-نّْضنْ مَارَّا ڒشْهُوذْ-أَ أَمْ إِسيْنُوثنْ، أَذْ ننْضَارْ مَارَّا دّْقڒْ ن دّنْبْ إِ ذ أَنغْ د-إِسّْوجْذنْ إِ ڒبْذَا. أجّْ أَنغْ أَذْ نُويُورْ س صّْبَارْ أَمْحِيزْوَارْ نِّي خَانغْ د-إِمَّارْسنْ. ^▪   ‏2 أجّْ أَنغْ أَذْ ننْضَارْ ثِيطَّاوِينْ ذِي يَاسُوع، أَمْڭوَّاذْ ذ ؤُمْكمّڒْ ن لْ-إِيمَانْ نّغْ، ونِّي، زِي سِّيبّثْ ن ڒفْرَاحثْ إِ غَارسْ، يَارْبُو صَّالِيبْ، وَارْ ث إِشْقِي ؤُبهْذڒْ، ؤُشَا إِقِّيمْ خْ يفُوسْ ن ڒْْعَارْشْ ن أَربِّي. ^▫  ▪   ‏3 خْزَارمْ مْلِيحْ، مشْحَاڒْ إِ إِكْسِي نتَّا زڭْ إِمذْنَابْ، إِنِّي ذ إِغْرِيمنْ ن ڒعْمَارْ ن يِيخفْ نْسنْ، حِيمَا وَارْ ثتِّيحْڒمْ ؤُ وَارْ ثَارخُّومْ شَا ذِي ڒعْمَارْ نْومْ. ‏4 أَقَا كنِّيوْ، وَارْ ثْرُوحمْ شَا ثِيڭّْوجمْ أَكْ-ذ دّنْبْ، وَارْ ثمّْعَاڒِيمْ شَا أَڒْ ؤُسِيزّڒْ ن إِذَامّنْ نْومْ. ^▪   ‏5 ثتُّومْ ثَاغُورِي إِ خَاومْ إِسَّاوَاڒنْ أَمْ إِحنْجِيرنْ:

”مِّي إِنُو، وَارْ تّڭّْ شَا س وعْرُورْ

خْ تَّارْبِييّثْ ن سِيذِي،

وَارْ تِّيڒِي شَا ذ أَمَارْخُو ذِي ڒعْمَارْ نّشْ،

خْمِي غَا ثتّْوَاوبّْخذْ زَّايسْ. ^▪  

‏6 مِينْزِي ونِّي إِتّخْسْ سِيذِي،

يَاربَّا إِ-ث س ؤُقسَّاحْ،

ؤُشَا إِحنْجِيرنْ نّسْ إِ خَاسْ إِعِيزّنْ،

إِكْسِي ثنْ كُوڒْ إِجّْ زَّايْسنْ غَارْ ؤُغزْذِيسْ.“ ^▪  

‏7 خْ ؤُيَا، كْسِيمْ تَّارْبِييّثْ، مِينْزِي أَربِّي إِتّڭّْ أَومْ أَمْ إِحنْجِيرنْ نّسْ. مِينْزِي مَانْ مِّيسْ ونِّي بَابَاسْ وَارْ ث يَاربِّي شَا س ؤُقسَّاحْ؟ ‏8 مَاڒَا أَقَا كنِّيوْ بْڒَا تَّارْبِييّثْ إِ ذِي شَارْشنْ مَارَّا، ڒخْذنِّي كنِّيوْ أَمْ إِبَارَّانِييّنْ إِ ثدْجَامْ، وَارْ إِدْجِي ذ أَرَّاونْ. ‏9 مَاڒَا نكْسِي تَّارْبِييّثْ زِي بَابَاثْنغْ عْلَاحْسَابْ أَرِّيمثْ ؤُشَا نْوقَّارْ إِ-ثنْ، مشْحَاڒْ ذ أَنغْ إِتّْخصَّا أَذْ نْطَاعْ إِ بَابَاثْنغْ ن أَرُّوحَاثْ، حِيمَا أَذْ ندَّارْ! ‏10 مِينْزِي نِيثْنِي وبّْخنْ أَنغْ شَا ن وُوسَّانْ أَمْ مَامّشْ ذ أَسنْ إِتّْغِيڒْ مْلِيحْ، مَاشَا أَربِّي إِڭَّا إِ-ت إِ ثِيزِي نّغْ، حِيمَا أَذْ نْشَارْشْ ذِي ثْقدَّاسْثْ نّسْ. ‏11 أَقَا وَارْ ذِينْ ؤُڒَا ذ إِشْثْ ن تَّارْبِييّثْ س ؤُقسَّاحْ إِ إِتّْبَاننْ ذ ڒفْرَاحثْ ذغْيَا، مَاشَا ذ ڒحْرِيقْ، مَاشَا أَوَارْنِي أَسْ ثِيوِي-د ڒْْغِيدْجثْ ن ڒهْنَا ذ ثْسڭْذَا إِ يِينِّي زَّايسْ إِتّْوَاذَارّْبنْ.

‏12 س ؤُينِّي، سْجهْذمْ إِفَاسّنْ نْومْ يَارْخُونْ ذ إِفَادّنْ نْومْ يَارهْفنْ، ^▪   ‏13 ؤُشَا ڭّمْ نِيشَانْ إِصُورَافْ ن إِضَارنْ نْومْ، حِيمَا مِينْ إِدْجَانْ ذ أَقجْذَاحْ وَارْ إِتّفْرِيغْ شَا، مَاشَا أَذْ إِڭّنْفَا.

‏14 ضْفَارمْ-د ڒهْنَا ذ ثُوقدّْسِي أَكْ-ذ مَارَّا، ثنِّي بْڒَا زَّايسْ وَارْ إِژَارْ حذْ سِيذِيثْنغْ. ^▪   ‏15 غَارْومْ أَقَا ؤُڒَا ذ إِجّْ جَارْ أَومْ أَذْ إِتّْوَافْ إِنْقصْ أَسْ أَرْضَا ن أَربِّي، نِيغْ أَقَا أَذْ إِغْمِي وژْوَارْ ن ثَارْزُوڭِي، أَذْ كنِّيوْ إِضَارّْ ؤُشَا خنِّي أَذْ زَّايسْ تّْوَاخمْجنْ أَطَّاسْ، ^▪   ‏16 ؤُشَا حْضَامْ، أَقَا وَارْ إِتّْوِيفِّي حذْ جَارْ أَومْ ونِّي ذ بُو-فَارْقْ-شّْغڒْ نِيغْ ذ أَمقْجُوحْ أَمْ عِيسُو نِّي إِزّنْزنْ ڒْْحقّْ ن ؤُمنْزُو نّسْ خْ إِجّْ ن مَاشَّا. ^▪   ‏17 مِينْزِي أَقَا ثسّْنمْ، بلِّي أَوَارْنِي مَانْ أَيَا ثُوغَا يَارزُّو عَاذْ أَذْ إِوَارْثْ لْبَارَاكَا، مَاشَا يُوڭِي أَسْ، مَاغَارْ وَارْ يُوفِي شَا تَّاسِيعْ إِ وعْذَاڒْ، وَاخَّا يَارزُّو ث س إِمطَّاونْ. ^▪  

‏18 مِينْزِي كنِّيوْ وَارْ ثِيوِيضمْ شَا غَارْ ثْمسِّي يَارْغِينْ نِيغْ غَارْ وذْرَارْ إِ نْزمَّارْ أَذْ نْحَاذَا، ؤُڒَا غَارْ ثَايُّوثْ ثْبَارْشَانْثْ ذ ثْحَارْيَاضْثْ، ^▪   ‏19 نِيغْ غَارْ زّْهِيرْ ن ؤُصُوذِي ذڭْ ؤُيِيشّْ ن إِشَارِّي ؤُڒَا غَارْ ڒْْحسّْ ن وَاوَاڒنْ ذِي سِّيبّثْ نْسنْ زَاوْڭنْ إِنِّي ذ أَسْ إِسْڒِينْ، مَاحنْذْ وَارْ ثنْ كِيسنْ إِسِّيوِيڒْ عَاذْ. ^▪   ‏20 س مِينْزِي وَارْ زمَّارنْ خْ دّْقڒْ ن ثْوصَّا، مِينْزِي مَاڒَا إِقَارّبْ-د مْغِيرْ إِجّْ ن ؤُمُودَّارْ أَذْرَارْ، أَذْ إِتّْوَارْجمْ نتَّا. ^▫  ▪   ‏21 مِينْ ژْرِينْ ثُوغَا إِسَّاڭّْوَاذْ أَطَّاسْ، أَڒَامِي إِنَّا مُوسَا: ”أَقَا ڭّْوذغْ ؤُ تَّارْجِيجِيغْ!“ ^▪  

‏22 مَاشَا كنِّيوْ ثِيوْضمْ غَارْ وذْرَارْ ن صِيهْيُونْ، غَارْ ثنْذِينْثْ ن أَربِّي إِدَّارنْ، غَارْ ؤُرْشَالِيمْ نِّي إِدْجَانْ ذڭْ إِجنْوَانْ ؤُ غَارْ ثْمسْمُونْثْ نعشْرَا ن ڒُْوڒُوفَاثْ ن لْمَالَاكَاثْ، ^▪   ‏23 غَارْ ثْمسْمُونْثْ ن إِمنْزَا، إِنِّي إِتّْوَازمّمنْ ذڭْ إِجنْوَانْ، ؤُ غَارْ أَربِّي، ڒْْقَاضِي خْ مَارَّا ؤُ غَارْ أَرُّوحَاثْ ن إِمْسڭَّاذنْ نِّي إِوْضنْ غَارْ ڒكْمَارثْ، ^▪   ‏24 ؤُ غَارْ يَاسُوع، لْوَاسِيثْ ن ڒْْعَاهْذْ ن جْذِيذْ، ؤُ غَارْ ؤُرُوشِّي س إِذَامّنْ نّسْ، إِنِّي إِسَّاوَاڒنْ حْسنْ زڭْ إِنِّي ن هَابِيلْ. ^▪  

‏25 غَارْومْ وَارْ ثَاڭِيمْ شَا خْ ونِّي أَكِيذْومْ إِسَّاوَاڒنْ، مِينْزِي مَاڒَا إِنِّي وَارْ إِتّْوَاسّْنجْمنْ ؤُڭِينْ ونِّي كِيذْسنْ إِسَّاوَاڒنْ ذِي ثمُّورْثْ، مَاهُو عَاذْ نشِّينْ، مَاڒَا نْحيّذْ خْ ونِّي أَكِيذْنغْ إِسَّاوَاڒنْ زڭْ إِجنْوَانْ، ^▪   ‏26 ونِّي ثُوغَا ثْمِيجَّا نّسْ ثسّنْهزَّا ثَامُّورْثْ، مَاشَا ونِّي ڒخُّو إِوَاعْذْ، إِنَّا:

”أَذْ سّنْهزّغْ عَاوذْ إِشْثْ ن ثْوَاڒَا،

وَارْ إِدْجِي ثَامُّورْثْ وَاهَا، أَقَا ؤُڒَا ذ أَجنَّا.“ ^▪  

‏27 أَوَاڒْ-أَ: ’إِشْثْ ن ثْوَاڒَا!‘، أَقَا إِمْڒَا بلِّي أَذْ إِتّْوَاكّسْ مِينْ إِتّنْهزَّانْ، مِينْزِي مَانْ أَيَا إِتّْوَاڭّْ، حِيمَا أَذْ قِّيمنْثْ ثْمسْڒَايِينْ وَارْ تّنْهزِّينْثْ. ‏28 س ؤُيَا، مِينْزِي أَذْ نطّفْ ثَاڭلْذِيثْ يَاركّْننْ، أجّْ أَنغْ أَذْ نقِّيمْ نتّطّفْ ذِي أَرْضَا إِ زِي نتّْسخَّارْ إِ أَربِّي ؤُ نسَّارْضَا إِ-ث س ؤُوقَّارْ ذ ثِيڭّْوُوذِي، ^▪   ‏29 مِينْزِي أَربِّي نّغْ ذ إِشْثْ ن ثِيمسِّي إِتّتّنْ. ^▪