أَوَاضعْ زَّاثْ إِ أَربِّي
1 مَانِيسْ د-إِكَّا ؤُمنْغِي ذ إِمْشُوبّشنْ جَارْ أَومْ؟ مَا زعْمَا زڭْ شّهْوَاثْ إِ إِمّنْغنْ ذڭْ إِغزْذِيسنْ نْومْ؟ ▪ 2 كنِّيوْ ثمّژْرمْ مَاشَا كنِّيوْ وَارْ غَارْومْ وَالُو. كنِّيوْ ثْنقّمْ ؤُ ثتَّاسْممْ ؤُشَا قَاعْ أَمنِّي وَارْ د أَومْ إِتِّيكّْوِيضْ وَالُو. كنِّيوْ ثتّمْشُوبُّوشمْ ؤُ ثتّْمنْغَامْ، مَاشَا وَارْ غَارْومْ وَالُو، مِينْزِي كنِّيوْ وَارْ ثتّتَّارَامْ. 3 نِيغْ كنِّيوْ ثتّتَّارَامْ، مَاشَا وَارْ ثكْسِيمْ شَا، مِينْزِي ثتّتَّارمْ مِينْ وَارْ إِحْڒِينْ، حِيمَا أَذْ ثڭّمْ غَارْ شّهْوَاثْ نْومْ. ▪ 4 أَ كنِّيوْ إِنِّي إِزنَّانْ! مَا وَارْ ثسِّينمْ شَا بلِّي ثَامخْسِيوْثْ ن دُّونشْثْ أَقَا-ت ذ ڒعْذَاوثْ خْ أَربِّي؟ أَحقَّا ونِّي إِتّخْسنْ أَذْ يِيڒِي ذ أَمدُّوكّڒْ ن دُّونشْثْ، أَذْ يِيڒِي ذ ڒعْذُو ن أَربِّي. ▪ 5 نِيغْ إِتّْغِيڒْ أَومْ بلِّي ثِيرَا إِقدّْسنْ وَارْ غَارْسنْثْ لْمعْنَا:
”أَرُّوحْ إِ ذَايْنغْ إِزدّْغنْ
إِتَّاسمْ س ثُوسْمِي!“؟ ▪
6 مَاشَا سِيذِيثْنغْ إِتِّيشْ أَنغْ أَرْضَا كْثَارْ، مَاغَارْ إِنَّا:
”أَربِّي إِسّْوَاضّعْ إِمْعفَّارنْ،
مَاشَا إِ إِمْوَاضْعنْ إِتِّيشْ أَسنْ أَرْضَا.“ ▪
7 س ؤُيَا مَارْسمْ إِخفْ نْومْ زَّاثْ إِ أَربِّي، مْعَاڒَامْ أَكْ-ذ شِّيطَانْ ؤُشَا نتَّا أَذْ زَّايْومْ يَارْوڒْ. ▪ 8 أَذْسمْ أَربِّي ؤُشَا نتَّا أَذْ كنِّيوْ د-يَاذسْ. سِيرْذمْ إِفَاسّنْ نْومْ، أَ إِمذْنَابْ، قدّْسمْ ؤُڒَاونْ نْومْ، أَ كنِّيوْ، إِنِّي غَارْ إِدْجَا ثْنَاينْ ن إِزدْجِيفنْ. 9 مَارْسمْ إِخفْ نْومْ، شضْنمْ! جّمْ ثَاضحَّاشْثْ نْومْ أَذْ ثذْوڒْ ذ أَشْضَانْ ؤُ ڒفْرَاحثْ نْومْ أَذْ ثذْوڒْ ذ ڒحْزنْ. ▪ 10 مَارْسمْ إِخفْ نْومْ زَّاثْ إِ سِيذِي ؤُشَا نتَّا أَذْ كنِّيوْ إِسّْعُودْجْ. ▪
11 أَ أَيْثْمَا، وَارْ تّْشقَّافمْ شَا ذڭْ وَايَاوْيَا! ونِّي إِشقَّافنْ ذڭْ ؤُمَاسْ نِيغْ إِحكّمْ خْ ؤُمَاسْ، أَقَا وَا إِتّْشقَّافْ ذِي شَّارِيعَا ؤُشَا إِحكّمْ خْ شَّارِيعَا. ؤُشَا مَاڒَا ثْحكْمذْ خْ شَّارِيعَا، أَقَا وَارْ ثدْجِيذْ شَا ذ ونِّي إِتّڭّنْ شَّارِيعَا، مَاشَا ثَارِّيذْ إِخفْ نّشْ ذ ڒْْقَاضِي ن شَّارِيعَا. 12 إِجّنْ وَاهَا إِ إِدْجَانْ ذ بَابْ ن شَّارِيعَا، نتَّا ذ ونِّي غَارْ ثدْجَا ثْزمَّارْ، حِيمَا أَذْ إِوْشْ ثُوذَارْثْ نِيغْ أَذْ ت يَاريّبْ. مَاشَا مِينْ ثعْنِيذْ شكْ ؤُمِي ثْحكّْمذْ خْ جَّارْ نْومْ؟
13 مَا خنِّي إِ غَا نِينِي خْ يِينِّي إِقَّارنْ: ”أَسّْ-أَ نِيغْ ثِيوشَّا أَذْ نْرَاحْ غَارْ ثنْذِينْثْ-أَ غَارْ ثنْذِينْثْ-إِنْ، أَذْ ذِينْ نڭّْ ثَاسبَّابْثْ ڒْْمِيجَاڒْ ن إِجّْ ن ؤُسڭّْوَاسْ، أَذْ نْسغْ أَذْ نزّنْزْ أَذْ نَارْبحْ!“؟ ▪ 14 نِيثْنِي وَارْ سِّيننْ مَامّشْ غَا ثِيڒِي ثِيوشَّا. مِينْ ثعْنَا ثُوذَارْثْ نّغْ؟ أَقَا-ت مْغِيرْ ذ إِجّْ ن ڒفْوَارْ إِ غَا د-إِضْهَارْ، أَذْ إِذُورّقْ، أَذْ ثفْسِي ڒخْذنِّي. ▪ 15 س ؤُيَا إِتّْخصَّا أَذْ إِنِينْ: ”مَاڒَا إِخْسْ سِيذِي، أَذْ ندَّارْ، أَذْ نڭّْ ثَا ذ ثِينْ.“ ▪ 16 إِوَا نِيثْنِي تّْفيّْشنْ ذڭْ ؤُعفَّارْ نْسنْ، مَاشَا قَاعْ أَفيّشْ-أَ ذ أَعفَّانْ. 17 ونِّي إِسّْننْ مَامّشْ إِ غَا إِڭّْ ڒْْخَارْ ؤُشَا وَارْ ث إِتّڭّْ، أَذْ أَسْ د-إِتّْوَاحْسبْ ذ دّنْبْ. ▪