1 Adlis n umezruy n wexřaq n Yasuɛ Lmasiḥ, Mmis n Dawud, mmis n Ibrahim.   

2 Ibrahim ijja-dd Isḥaq, Isḥaq ijja-dd Yaɛqub, Yaɛqub ijja-dd Yahuda d aytmas.    3 Yahuda ijja-dd Fariṣ d Zaraḥ ak-d Tamar, Fariṣ ijja-dd Ḥaṣrun, Ḥaṣrun ijja-dd Aram,    4 Aram ijja-dd Ɛamminadab, Ɛamminadab ijja-dd Naḥcun, Naḥcun ijja-dd Salmun, 5 Salmun ijja-dd Buɛaz zi Raḥab, Buɛaz ijja-dd Ɛubid ak-d Raɛut, Ɛubid ijja-dd Yassa, 6 Yassa ijja-dd Dawud, ajeǧid, uca Dawud ijja-dd Suliman ak-d temɣart n Uriya.   

7 Suliman ijja-dd Raḥabɛam, Raḥabɛam ijja-dd Abiya, Abiya ijja-dd Asa,    8 Asa ijja-dd Yahucafaṭ, Yahucafaṭ ijja-dd Yuram, Yuram ijja-dd Ɛuzziya, 9 Ɛuzziya ijja-dd Yutam, Yutam ijja-dd Aḥaz, Aḥaz ijja-dd Ḥizqiya, 10 Ḥizqiya ijja-dd Manassa, Manassa ijja-dd Amun, Amun ijja-dd Yuciya, 11 Yuciya ijja-dd Yakunya d aytmas deg wussan n lmenfa n Babil.   

12 Awarni i lmenfa di Babil, Yakunya ijja-dd Caɛaltiyil, Caɛaltiyil ijja-dd Zarubbabil.    13 Zarubbabil ijja-dd Abihud, Abihud ijja-dd Alyaqim, Alyaqim ijja-dd Ɛazur, 14 Ɛazur ijja-dd Ṣaduq, Ṣaduq ijja-dd Axim, Axim ijja-dd Aliyud, 15 Aliyud ijja-dd Aliɛazar, Aliɛazar ijja-dd Mattan, Mattan ijja-dd Yaɛqub, 16 Yaɛqub ijja-dd Yusuf, aryaz n Maryam, tenni i dd-ijjin Yasuɛ umi qqaren Lmasiḥ.

17 S uyenni marra arrawen zi Ibrahim ař Dawud iwḍen arbeɛṭac n warrawen. Zi Dawud ař lmenfa di Babil arbeɛtac n warrawen uca zi lmenfa di Babil ař Lmasiḥ arbeɛtac n warrawen.

18 Ammu i yemsar wexřaq n Yasuɛ Lmasiḥ. Umi yemmas Maryam tuɣa-tt d tanexḍebt n Yusuf, iḍhar-dd belli nettat teksi aɛeddis zi Arruḥ Iqeddsen qbeř i ɣa meřcen.    19 Umi aryaz nnes Yusuf tuɣa iggur nican, war ixs ca ad tt issbehdeř, tuɣa yarezzu ad as iǧef s tnuffra. 20 Am tuɣa ittxarraṣ di man aya, iḍhar as-dd lmalak n SIDI di tarjit, inna:

“A Yusuf, a mmis n Dawud,

war tteggʷed ad dd-tawyed

Maryam d tamɣart nnec,

minzi wenni i dayes dd-ixeřqen,

aqa Netta zi Arruḥ Iqeddsen.”

21 Nettat ad dd-taruw Aḥenjir,

nettat ad t tsemma Yasuɛ,

minzi Netta ad issenjem řgens nnes

zi ddnub nsen.”   

22 Marra aya imsar, ḥima ad ittwakemmeř min inna SIDI s uqemmum n unabi, umi inna:

23 “Xẓar, taɛzarect ad teksi ddeyset,

uca ad dd-taruw Aḥenjir,

ad as ggen ‘Ɛimmanu-Il’

min ixs ad yini:

‘AREBBI nneɣ aqa-t akidneɣ.’ ”   

24 Řami dd-ifaq Yusuf zeg iḍeṣ, igga am mammec tt yumur lmalak n SIDI, uca yiwyi-dd tamɣart nnes ɣares. 25 Uca netta war ɣares dd-iqarreb ca ařami dd-turuw Mmis amenzu, uca tsemma t ‘Yeccu’.