1 Am tuɣa ittẓaǧa deg ijj n wemcan, imsar, umi ikemmeř Netta taẓaǧit nnes, aqa ijjen zeg imeḥḍaren nnes inna as: “A Siditneɣ, seřmed aneɣ ad neẓẓaǧ am mammec tuɣa Yuḥanna isseřmad ɛawed imeḥḍaren nnes.”    2 Yasuɛ inna asen: “Meřmi ma teẓẓuǧem, inim:

‘Babatneɣ i iǧan deg ijenwan,

ad ittwaqeddes Isem nnec,

ad dd-tas Tgeldit nnec,

ad tᵉttwagg am mammec texsed Cek,

am deg ujenna, ammu ɛawed di temmurt.

4 uca ɣfar aneɣ ddnub nneɣ,

minzi uřa d neccin nsameḥ i marra

inni dayneɣ ittursen.

War d aneɣ ssidif ca deg ujarreb,

maca senjem aneɣ zeg umɛeffan.’ ”

5 Xenni inna asen: “Man wen zzaywem i ɣar iǧa ijj n umeddukkeř, ad ɣares iraḥ deg wezyen n ǧiřet uca ad as ini: ‘A ameddukkeř, arḍeř ayi třata n tecnifin,    6 minzi ijj n umeddukkeř inu, ixecc-dd ɣari zeg usafar, war ɣari min d as ɣa qeddmeɣ!’, 7 uca xenni ad xas dd-yarr umeddukkeř nnes zi daxeř, ad as yini: ‘War dd ayi ttṣeddaɛ, tawwart tbelleɛ u tarwa aqa-tt akidi di tassut, war zemmareɣ ad dd-kkareɣ maḥend ad ac wceɣ aɣrum.’ 8 Ad awem iniɣ, mařa war dd-ikkar ḥima ad as iwc umi netta d ameddukkeř nnes, iwa ad dd-ikkar ad as iwc mecḥař ma iḥdaj x ssibbet n řewɛaret n umeddukkeř nnes.

9 Ad awem iniɣ: Ttarem, xenni ad awem immewc, arzum, xenni ad tafem, ssqarqbem, xenni ad awem arezmen.    10 Minzi marra wi ɣa ittaren ad iksi, u wi ɣa yarzun ad yaf, u wi ɣa issqarqben ad as ittwarzem. 11 Niɣ din jar awem babas, wenni umi d as i ɣa ittar mmis aɣrum, ad as iwc aẓru? Niɣ umi ɣa ittar asřem, ad as iwc afiɣar deg wemcan n wesřem?    12 Niɣ mařa ittar zzayes tameǧač, ad as iwc taɣarḍent? 13 Mařa kenniw, inni iǧan d iɛeffanen, tessnem ad tewcem timewca tiṣebḥanin i tarwa nwem, mecḥař s waṭṭas ad iwc Babatwem i iǧan deg ijenwan Arruḥ Iqeddsen i yinni d as t ittaren!”

14 Umi issuffeɣ Netta ijj n cciṭan agnaw, imsar, awarni řami issuffeɣ cciṭan nni, aqa agnaw ibda issawař. Uca xenni itebhet řɣaci marra.    15 Maca ca zzaysen nnan: “Issuffuɣ ccwaṭen s Bᵉɛalzabub, ameqqran n ccwaṭen.”    16 Inneɣni jarrben t, ttaren zzayes ict n řeɛřamet zeg ujenna.

17 Maca Netta yargeb x ixarriṣen nsen, inna asen: “Kuř tageldit i ibḍan x yixef nnes ad tᵉttwareddeǧ u taddart i ibḍan x yixef nnes, ad tewḍa.    18 Mařa ibḍa cciṭan x yixef nnes, mammec ɣa teqqim tgeldit nnes? Minzi kenniw teqqarem belli Necc ssuffuɣeɣ ccwaṭen s Bᵉɛalzabub. 19 Mařa Necc ssuffuɣeɣ ccwaṭen s Bᵉɛalzabub, s minzi i ten ssuffuɣen tarwa nwem? S uyenni ad iřin nitni d lquḍat xawem. 20 Maca mařa tuɣa s uḍaḍ n AREBBI i zi ssuffuɣeɣ ccwaṭen, xenni aqa tqarreb-dd ɣarwem Tgeldit n AREBBI. 21 Min ɣa yekk weryaz ijehden iḥezzmen s řesnaḥ ittɛessa x řemraḥ nnes, ad yiři wagřa nnes di řaman. 22 Maca meřmi i dd ɣa yas wenni iǧan d jjiheř xas, uca ad t iɣřeb, aqa netta ad as ikkes řesnaḥ min xef tuɣa ittcař, uca ad ibḍa min tuɣa zzayes iksi.

23 Wenni war iǧin akidi, aqa-t ḍidd inu u wenni war kidi issmunin, aqa netta ittzeǧaɛ.”   

24 “Xmi ɣa iffeɣ řaryaḥ amengus zi bnadem, ad icuq deg imucan war daysen bu waman, ad yarzu arraḥet uca xmi war tt ittif, ad yini: ‘Ad ɛeqbeɣ ɣar taddart inu tenni zi dd-ffɣeɣ.’    25 Xmi dd ɣa yas, ad tt yaf, tfarḍ, teɛdeř. 26 Xenni ad iraḥ, ad iksi sebɛa n řaryaḥ nneɣni iɛeffanen xas, ad dd-adfen uca ad zedɣen dinni. Xenni ad idweř uneggar n bnadem nni d aɛeffan mahu x mammec t tuɣa ɣar umezwar.”   

27 Am issawař s uya, tessgeɛɛed ict n temɣart zi řɣaci tmijja nnes, tenna as: “Sseɛd n uɛeddis i Cek iksin u tabbuct i zi tᵉṭṭḍed!” 28 Netta inna: “Sseɛd n yinni ittesřan awař n AREBBI uca ḥeffḍen t.”   

29 Am tuɣa imun řɣaci, ibda iqqar: “Ttaṣiřet-a d taɛeffant tᵉttᵉttar řeɛřamet, war d as tᵉttmewci řeɛřamet mɣir řeɛřamet n Yunus anabi.    30 Minzi am mammec tuɣa Yunus d řeɛřamet i aytbab n Ninwa, ammu i ɣa yiři Mmis n bnadem ɛawed d řeɛřamet i jjiř-a. 31 Tajeǧidt n ljanub ad tekkar deg wass n lḥisab ak-d yeryazen n jjiř-a, ad ten tḥaseb. Minzi tusa-dd zi tneggarut n temmurt, ḥima ad tseř i tiɣit n Suliman. Xzar, aqa da wenni imɣaren x Suliman.    32 Iryazen n Ninwa ad dd-kkaren deg wass n lḥisab ak-d jjiř-a uca ad t ḥasben, minzi nitni tuben awarni i ubarreḥ n Yunus. Xzar, aqa da wenni imɣaren x Yunus!”   

33 Uřa d ijj war issreqqi řqendiř uca issrusa t deg wemcan inuffaren niɣ sadu řmud n imendi, maca issrusa i-t x řmerfeɛ, ḥima inni dd ɣa yadfen ad ẓaren tfawt.    34 Řqendiř n arrimet nnec d tiṭṭ nnec. Mařa tiṭṭ nnec teṣfa, ad tiři tfawt uřa di marra arrimet nnec. Mařa tiṭṭ nnec d taɛeffant, uřa d arrimet nnec ad tiři d taǧest.    35 Ḥḍa xenni, ḥima tafawt i dayek iǧan, war tᵉttiři d taǧest. 36 Mařa marra arrimet nnec teccur s tfawt, war dayes uřa d ijj n uɣezdis ibarrcen, xenni ad dayes tiři tfawt kuřci am mammec xmi yareqq řqendiř s uceɛɛař nnes.”

37 Am tuɣa issawař s man aya, iɛarḍ i-t ijj n Ufarisi ɣar umecři akides. Xenni yudef, iqqim ɣar ṭṭabřa.    38 Umi t iẓra Ufarisi, itebhet minzi Netta war issird ca d amezwar qbeř i umecři.   

39 Maca Yasuɛ inna as: “Kenniw, a Ifarisiyyen, tessizdagem barra n řkas d ṭṭebṣi, maca di daxeř nwem tcurrem s ṭṭmeɛ n tkeccaḍt d řɣar.    40 Kenniw, a ifɣař, ma war iǧi Wenni iggin min iǧan ɣar barra, igga uřa d min iǧan daxeř? 41 Maca mařa ad tewcem marra min iǧan daxeř d ṣṣedqet, xzar, marra min daywem ad yiři d amezdag.”   

42 Maca uct xawem, a Ifarisiyyen minzi tᵉttɛeccaram nneɛnaɛ d wazar d marra tibbi, maca tejjim řḥukm d tayri n AREBBI ɣar uɣezdis. Iwa ittxeṣṣa awem ad teggem timesřayin-a, nhřa ma ad tᵉttum inneɣni.   

43 Uct xawem, a Ifarisiyyen, minzi iɛjeb awem ad teqqimem x řekrasi n zzat di temzidawin u iɛjeb awem ad xawem seǧmen iwdan di řeswaq.   

44 Uct xawem, a imseřmaden n idlisen d Ifarisiyyen, kenniw, a imnafqen, minzi kenniw tᵉtteggem am yimeḍřan idduryen min xef gguren iwdan am war ssinen.”   

45 Ijjen zeg imseřmaden n idlisen iṭṭef deg wawař, inna as: “A Amseɣɣar, aqa xmi teqqared aya, tessfeṭṭaḥed aneɣ uřa d neccin.”

46 Maca Netta inna: “Uct xawem, a imseřmaden n idlisen, minzi tessarebbum řeḥmuř iḍeqřen i tkessit x iwdan, maca kenniw s yixef nwem war tᵉttḥidim řeḥmuř nni uřa s ijjen zeg iḍewḍan nwem!   

47 Uct xawem, minzi tbennam imeḍřan n inabiyyen, am řejdud nwem nɣin ten.    48 S man aya tneɛɛmem, aqa kenniw tareṭṭam s min ggin řejdud nwem, minzi nitni nɣin ten uca kenniw tbennam imeḍřan nsen. 49 S uyenni tiɣit n AREBBI tenna: “Aqa ad asen dd-ssekkeɣ inabiyyen d rrusul. Ad aẓẓřen nitni x ca zzaysen uca ad ten nɣen,    50 ḥima ad ttwattaren zi jjiř-a idammen n marra inabiyyen i ittwassizzřen zeg wami tᵉttwagg ddunect: 51 zeg idammen n Habil ař idammen n Zakariyya, wenni nɣin jar Zzawect Tameqqrant d uɛalṭar! Wah, ad awem iniɣ belli ggur ad ttwattaren idammen nsen zi jjiř-a.   

52 Uct xawem, a imseřmaden n idlisen, minzi tkessim tisarutin n tussna. Kenniw s yixef nwem war tᵉttidfem u inni ittadfen, tᵉṭṭfem ten.”   

53 Am tuɣa akidsen issawař s uya, bdan imseřmaden n idlisen d Ifarisiyyen ttḍaddan t aṭṭas. Ffugmen, ḥeccen x wawařen nnes, 54 uca ggin zzayes s tḥraymect aṭṭas, arezzun ad t ṭṭfen s ca zeg uqemmum nnes, ḥima ad t ḍeřmen.