1 Deg wass amezwaru n ssimana tusa-dd Maryam n Majdala di ṣṣbeḥ zic ɣar wenḍeř, tuɣa ɛad d taǧest. Teẓra taṣḍart aqa temmeksi x wenḍeř.    2 Tuzzeř-dd, tusa-dd ɣar Cimɛun Buṭrus u ɣar umeḥḍar nneɣni wenni umi tuɣa ittexs Yasuɛ, tenna asen: “Ksin Siditneɣ zeg wenḍeř, war ssineɣ mani t ggin.”   

3 Iffeɣ-dd Cimɛun d umeḥḍar nneɣni uca usin-dd ɣar wenḍeř.    4 Nitni uzzřen s tnayen idsen, maca ameḥḍar nneɣni izwar i Cimɛun uca yiweḍ d amezwaru ɣar wenḍeř. 5 Ixzar, iẓra řecfun n řeqṭen azdad mmarsen din, maca war yudif ca.    6 Iḍfar i-t Cimɛun, yudef ɣar wenḍeř, iẓra ɛawed řecfun n řeqṭen azdad mmarsen din. 7 Amendiř nni tuɣa x uzeǧif nnes, war immars ca ak-d řecfun n řeqṭen azdad, maca tuɣa iḍfeṣ, ittwagg deg wemcan weḥḥdes.    8 Řexdenni yudef-dd uřa d ameḥḍar nneɣni nni dd-yusin d amezwaru ɣar wenḍeř, iẓra uca yumen. 9 Minzi nitni tuɣa ɛad war ssinen Tira Iqeddsen, belli ittxeṣṣa as ad ikkar jar imettinen.   

10 Xenni dewřen imeḥḍaren nni ɣar taddart nsen.

11 Maryam teqqim tbedd ɣar wenḍeř barra, tᵉttru. Řami tuɣa tᵉttru, tesweḍ deg wenḍeř,    12 teẓra tnayen n lmalakat s warruḍ d acemřař, qqiment mani tuɣa temmars arrimet n Yasuɛ, ijjen ɣar tsummtin nnes n uzeǧif, ijjen ɣar iḍaren nnes. 13 Nnan as: “A tamɣart, mayemmi tᵉttrud?” Tenna asen: “Maɣar kksen Sidi inu, war ssineɣ mani t ssarsen.” 14 Umi tenna aya, tenneqřeb ɣar ḍeffar, teẓra Yasuɛ ibedd, maca war tessin ca aqa-t d Yasuɛ.    15 Yasuɛ inna as: “A tamɣart, mayemmi tᵉttrud? Min xef tarezzud?” Tᵉttɣiř as Netta d bab n teḥwict, tenna as: “A sidi mařa cek i-t iksin, ini ayi mani t tessarsed, xenni ad t ksiɣ.” 16 Yasuɛ inna as: “A Maryam!” Nettat tenneqřeb, tenna as s Tɛibranit: “A Rabbuli!”, ixs ad yini: ‘A Amseɣɣar inu’. 17 Yasuɛ inna as: “War d ayi tᵉttḥidi ca, aqa Necc ɛad war geɛɛdeɣ ca ɣar Baba, maca ruḥ ɣar aytma, ini asen: ‘Necc aqa ad geɛɛdeɣ ɣar Baba d Babatwem, ɣar AREBBI inu d AREBBI nwem.’ ”    18 Teɛqeb-dd Maryam n Majdala txebbar imeḥḍaren belli nettat teẓra Siditneɣ u belli Netta inna as man aya.   

19 Ɣar tmeddit n wass nni, netta d ass amezwaru n ssimana, umi tuɣa tiwwura mani tuɣa qqimen imeḥḍaren qqnent s tiggʷudi zeg Wudayen, yudef-dd Yasuɛ, ibedd di řwesṭ nsen, inna asen: “Sřam xawem.”    20 Awarni řami inna aya, immeř asen ifassen nnes d uɣezdis nnes. Farḥen imeḥḍaren řami ẓrin Siditneɣ.    21 Inna asen ɛawed Yasuɛ: “Sřam xawem, am mammec d ayi dd-issekk Baba, ad kenniw dd-ssekkeɣ uřa d Necc.”    22 Awarni řami inna man aya, isuḍ daysen, inna asen: “Qebřem Arruḥ Iqeddsen.” 23 Wenni umi ɣa teɣfarem ddnub nnes, ad as ttwaɣfaren ddnub nnes. Wenni umi d as i ɣa tᵉṭṭfem di ddnub nnes, ad as ttwaṭṭfen ddnub nnes.”   

24 Maca Tuma, ijjen zi tenɛac, wenni umi qqaren ‘Acniw’, war tuɣi ca akidsen řami dd-yusa Yasuɛ. 25 Nnan as imeḥḍaren: “Aqa neẓra Siditneɣ!” Maca netta inna asen: “Mařa war ẓriɣ řimařt n imesmiren deg ifassen nnes, ad ssarseɣ aḍaḍ inu deg wemcan n imesmiren uca ad ssarseɣ afus inu deg uɣezdis nnes, war ttimneɣ.”

26 Awarni tmenya n wussan tuɣa imeḥḍaren nnes ɛawed ɣar daxeř u Tuma tuɣa akidsen. Yudef-dd Yasuɛ, waxxa tiwwura tuɣa qqnent, uca ibedd-dd di řwesṭ nsen, inna: “Sřam xawem!” 27 Inna i Tuma: “Awi-dd aḍaḍ nnec uca xzar deg ifassen inu, sars afus nnec danita u sidef i-t deg uɣezdis inu. War ttiři d akafriw, maca d řmumen.”    28 Yarra-dd Tuma, inna as: “A Sidi inu d AREBBI inu!” 29 Inna as Yasuɛ: “Umi teẓrid ayi řexxu, aqa tumned, a Tuma! Sseɛd n yinni yumnen, waxxa nitni war d ayi ẓrin.”   

30 Yasuɛ igga aṭṭas n řeɛřamat nneɣni qibač i imeḥḍaren nnes, tinni war yurint ca deg wedlis-a,    31 maca tina urant ḥima ad tamnem belli Yasuɛ Netta d Lmasiḥ, Mmis n AREBBI, uca xmi ɣa tamnem, ad ɣarwem tiři Tudart s Yisem nnes.