1 Min i ɣa nini xenni x Ibrahim, azeǧif n řejdud nneɣ, aqa yufa di arrimet nnes n weysum?    2 Minzi mařa Ibrahim tuɣa ittwasegged s řexdayem, aqa ɣares ccan, maca war iǧi ca ɣar AREBBI. 3 Minzi min qqarent Tira Iqeddsen? “Yumen Ibrahim di AREBBI uca ittwaḥseb as-dd man aya d tasegda.”    4 Wenni ixeddmen war d as tᵉttwaḥesseb ca řmunet x řeḥsab n arḍa, maca x řeḥsab n umarwas, minzi ttursen as-dd. 5 Maca wenni war ixeddmen, maca yumen deg Wenni ittseggaden imednab, aqa l’iman nnes ad as dd-ittwaḥseb d tasegda. 6 Am mammec inna Dawud ɛawed x sseɛd n bnadem wenni umi dd as iḥseb AREBBI tasegda břa řexdayem, umi inna:

7 “Sseɛd n yinni umi ittwaɣfar ixeṭṭan nsen,

inni umi issduriy Netta ddnub nsen.   

8 Sseɛd n bnadem

umi war dd as iḥesseb ca

AREBBI ddnub nnes.”   

9 Ma sseɛd-a x yinni ittwaxetnen waha niɣ ɛawed x yinni war ittwaxetnen? S minzi neqqar: “L’iman n Ibrahim ittwaḥseb as-dd d tasegda!”    10 Mammec d as t-i-dd ittwaḥseb? Ma řami tuɣa s wextan niɣ mařa tuɣa břa axtan? War tuɣi s wextan, maca tuɣa břa axtan. 11 Minzi iksi axtan d řeɛřamet d ucemmiɛ n tsegda n l’iman nni ɣares umi t tuɣa břa axtan, ḥima ad yiři d jedditsen n marra inni yumnen waxxa nitni břa axtan, ḥima ad asen dd-ittwaḥseb l’iman d tasegda ɛawed.    12 Netta d jedditsen i yinni s wextan, maca war iǧi i yinni idewřen yumnen zeg wextan waha, maca ɛawed i yinni igguren deg iṣuraf n l’iman n jedditneɣ Ibrahim umi tuɣa břa axtan.

13 Minzi lwaɛd i Ibrahim u i zzariɛet nnes belli ad yiři d awrit n ddunect, war dd-ittis ca s Ccariɛa, maca s tsegda n l’iman nnes. 14 Minzi mařa inni zi Ccariɛa d iwriten, aqa l’iman ixessaren uřa d lwaɛd ibeḍřen.    15 Maɣar Ccariɛa tᵉttaru aɣḍab. Mani war teǧi Ccariɛa, war din iǧi uřa d aɛeddi n Ccariɛa.   

16 S uyenni nettwasegged s l’iman, ixs ad yini s arḍa, maḥend ad yiři lwaɛd nican i qaɛ zzariɛet nnes, war iǧi i yinni iǧan zi Ccariɛa waha, maca ɛawed i yinni iǧan zi l’iman n Ibrahim, wenni d jedditneɣ n marra idneɣ,    17 am mammec tura: “Aqa ggiɣ cek d jedditsen i waṭṭas n řegnus!”, zzat i AREBBI Wenni zi tuɣa tumned, wenni itticen Tudart i imettinen d wenni ittřaɣan timesřayin i war iǧin axmi ǧan.    18 Waxxa iqḍeɛ as řayas, aqa yumen s usitem ad idweř d jedditsen i waṭṭas n řegnus am mammec tura: “Ammu i ɣa tiři zzariɛet nnec!”    19 L’iman nnes war tuɣi iḍɛef, umi iḥseb arrimet nnes temmut am tuɣa ɣares mya n iseggʷusa, u umi immut uɛeddis n Sara. 20 Netta war icekk ca di lwaɛd n AREBBI axmi s nneqṣ n l’iman, maca imḥeḍ di l’iman nnes, iwca aɛuǧi i AREBBI.    21 Tuɣa issen nican belli min zzayes tuɣa iwaɛd AREBBI, izemmar ad t igg ɛawed.    22 S uyenni ittwaḥseb as-dd l’iman d tasegda.   

23 Maca war turi di ssibbet nnes waha, aqa ittwaḥseb as-dd l’iman nnes d tasegda,    24 maca ɛawed di ssibbet nneɣ, ḥima Netta ad aneɣ t-i-dd-iḥseb d tasegda, i neccin inni ittamnen deg Wenni i dd-issnekkaren Siditneɣ Yasuɛ Lmasiḥ zi taddart n imettinen, 25 Yeccu Lmasiḥ wenni ittwasellmen di ssibbet n ddnub nneɣ uca ikkar-dd ḥima ad aneɣ isegged.