1 Xenni war dinni bu řḥukm x yinni igguren war iǧi ɛad deg weysum s Yasuɛ Lmasiḥ. 2 Minzi Ccariɛa n Arruḥ n Tudart di Yasuɛ Lmasiḥ, aqa tfekk ac zi Ccariɛa n ddenb d řmewt.    3 Minzi maɣar tuɣa Ccariɛa teḍɛef s tuḍɛeft n weysum, issekk-dd AREBBI Mmis di ṣṣifet n weysum n ddenb x ssibbet n ddenb, maḥend ad iḥaseb ddenb deg weysum,    4 ḥima ad dayneɣ tᵉttwakemmeř tasegda n Ccariɛa, maḥend war neggur deg weysum, maca di Arruḥ. 5 Minzi inni iǧan deg weysum tteggen nneyyet nsen deg weysum, maca inni n Arruḥ tteggen nneyyet nsen di Arruḥ.    6 Minzi nneyyet n weysum d řmewt, maca nneyyet n Arruḥ d tudart d řehna. 7 Minzi nneyyet n weysum, aqa-tt d řeɛdawat i AREBBI, minzi war tᵉttegg ca array i Ccariɛa n AREBBI, maɣar war d as tzemmar. 8 Inni iǧan deg weysum war izemmaren ad arḍan AREBBI.

9 Maca kenniw war teǧim ca deg weysum, maca di Arruḥ mařa izdeɣ daywem Arruḥ n AREBBI. Maca mařa ḥed war ɣares bu Arruḥ n Lmasiḥ, d wenni war ittiři nnes.    10 Mařa daywem Lmasiḥ, aqa arrimet temmut zi ssibbet n ddnub, maca Arruḥ iddar zi ssibbet n tsegda. 11 Mařa izdeɣ daywem Arruḥ n wenni dd-issnekkaren Siditneɣ Yasuɛ Lmasiḥ zi taddart n imettinen, aqa wenni dd-issnekkaren Yasuɛ Lmasiḥ zi taddart n imettinen ad isseddar ɛawed arrimat nwem ifennan s Arruḥ nnes i izeddɣen daywem.   

12 Xenni, a aytma, aqa aneɣ s umarwas, maca war iǧi i weysum, ḥima ad neddar x řeḥsab n weysum, 13 minzi mařa teddarem x řeḥsab n weysum, ad temtem. Maca mařa tᵉttarrim ad mmtent řexdayem n arrimet s Arruḥ, ad teddarem. 14 Minzi marra inni ittwanedhen s Arruḥ n AREBBI, nitni d arrawen n AREBBI.    15 Minzi kenniw war teksim ca arruḥ n tesmuɣi wenni kenniw i ɣa yarren d isemɣan, ḥima ad teggʷedem ɛawed, maca aqa teksim Arruḥ i zi nettwaqbeř d arrawen, i zi nettřaɣa: ‘Tababat, Babatneɣ!’    16 Arruḥ nni simant nnes icehhed ak-d arruḥ nneɣ, belli neccin d arrawen n AREBBI.    17 Mařa neccin d arrawen, aqa aneɣ ɛawed d iwriten, iwriten n AREBBI d iwriten ak-d Yasuɛ Lmasiḥ, maɣar mařa nweddeb akides, ad nettwaɛuǧi akides ɛawed.   

18 Necc ttwassqenɛeɣ belli aweddeb i xaneɣ ittekken iḍa, war isdiheǧ ca ad ittwaɛbar s uɛuǧi i dd ɣa ittwasseḍharen dayneɣ.    19 Minzi marra min dd-ittwaxeřqen ixezzar s usitem d uraji ɣar usargeb n warrawen n AREBBI. 20 Minzi marra min dd-ittwaxeřqen aqa ittwagg di řbaṭeř, war iǧi s řxaḍar, maca s wenni t iggin di řbaṭeř 21 s usitem belli marra min dd-ittwaxeřqen ad ittwafekk ɛawed zi tesmuɣi i řɣecc ɣar tiřelli n uɛuǧi n warrawen n AREBBI. 22 Aqa nessen belli marra min dd-ittwaxeřqen izehhar jmiɛ s unezbar n tarwa ař ass-a.   

23 War iǧi nitni waha, maca uřa d neccin, inni ɣar teǧa dayneɣ řɣiǧet tamezwarut n Arruḥ, nzehhar deg ixef nneɣ, nettraja ad nettwaqbeř d mmis, uřa d afekki n arrimat nneɣ.    24 S uyenni neddar deg usitem nni. Maca asitem ittbanen war iǧi d asitem, minzi min ittbanen i ḥed, mammec ɣa yegg ad dayes issitem ɛad? 25 Maca mařa nessittim di min war nettwiři, aqa nettraja t s ṣṣbar. 26 Di man aya ittɛawan aneɣ Arruḥ ɛawed di teḍɛeft nneɣ, minzi war nessin ca mammec d aneɣ i ɣa icuwwar ad neẓẓaǧ, maca Arruḥ simant nnes ittẓaǧa di ṭṭweɛ nneɣ s zzhir war ineṭqen.   

27 Maca wenni ittbeqqcen deg wuřawen issen min iǧan d nneyyet n Arruḥ, aqa ittẓaǧa di ṭṭweɛ n imqeddasen am mammec t ixs AREBBI. 28 Neccin nessen aqa Netta iɛawen di kuřci i řxar i yinni ittexsen AREBBI, inni iɛeǧem i-ten qbeř maḥend ad ttwařaɣan. 29 Minzi inni izwar issen i-ten, aqa izwar iɛeǧem i-ten ḥima ad arwesen di ṣṣifet n Mmis, ḥima ad yiři Netta d Amenzu jar waṭṭas n wawmaten.    30 Uca inni Netta izzar iɛeǧem i-ten, aqa d inni x d iřaɣa ɛawed, u inni x d iřaɣa, aqa d inni isegged ɛawed, u inni isegged aqa d inni issɛuǧa ɛawed.

31 Min ɣa nini xenni di man aya? Mařa AREBBI akidneɣ wi d aneɣ i ɣa iḍadden?    32 Wenni war iceṭṭaren ca x Mmis, maca iwca i-t di ṭṭweɛ nneɣ marra, mammec war d aneɣ ittic kuřci ak-d Mmis ɛawed?    33 Wi ɣa iksin tanfuč i yinni ittwafarzen zi AREBBI? AREBBI d wenni ittseggaden.    34 Wi ɣa iqḍan řḥukm? Lmasiḥ immut u ikkar-dd u Netta iqqim ɣar ufusi n AREBBI, ittẓaǧa i neccin.    35 Min d ayi ɣa ibḍan x tayri n Lmasiḥ? Ma řmeḥnet, niɣ řḥebs, niɣ adarrec, niɣ řaẓ, niɣ tuɛaryent, niɣ lxaṭar, niɣ ssif? 36 Am mammec tura:

“Aqa x ssibbet nnec nettmetta kuř ass,

nettwaḥseb am iḥuřiyyen i tɣarṣt.”   

37 Maca di man aya marra nedweř zeg inni iɣellaben s Wenni d aneɣ ixsen. 38 Aqa necc ttwassqenɛeɣ belli niɣ řmewt, niɣ tudart, niɣ lmalakat, niɣ řḥukkam, niɣ ṣṣulaṭat, niɣ min n yiḍa, niɣ min i dd ɣa yasen, 39 niɣ řuɛřa, niɣ raǧaɣ, niɣ uřa d ict n řḥajjet nneɣni zi min dd-ittwaxeřqen, tzemmar ad aneɣ tebḍa x tayri n AREBBI, tenni di Siditneɣ Yasuɛ Lmasiḥ.