1 X uyenni ttřaɣiɣ kenniw, a aytma, s arreḥmet tameqqrant n AREBBI, ad tqeddmem arrimat nwem d taɣarṣt iddaren, iqeddsen, yarḍan i AREBBI, wa d aɛbad nwem icuwwaren.    2 War temquddam ak-d ddunect-a, maca beddřem s uřeqqem n řeɛqeř nwem zi jdid, ḥima ad tqeǧbem min ixs AREBBI: min icnan d min yarḍan d min ikemmřen.   

3 Aqa s arḍa tenni d ayi immewcen, qqareɣ awem marra: war ttxarriṣem sennej i min ittřiq uxarraṣ nnes, maca xarrṣem nican ɛlaḥsab řqedd n l’iman i iwca AREBBI i kuř ijjen zzaywem.    4 Am mammec ɣarneɣ aṭṭas n iɣezdisen deg ict n arrimet uca marra iɣezdisen n arrimet war ɣarsen bu řxedmet d icten,    5 ammu neccin, waxxa d aṭṭas, aqa aneɣ d ict n Arrimet di Lmasiḥ d iɣezdisen ijjen i wenneɣni.    6 Maca ɣarneɣ tiwhibin immsebḍan ɛlaḥsab arḍa i d aneɣ immewcen: ijjen ɣares tawhibt maḥend ad inebb ɛlaḥsab řqedd n l’iman,    7 wenneɣni ɣares nneyyet n tsexxart maḥend ad isexxar, niɣ tawhibt n umseɣɣar maḥend ad issɣar,    8 niɣ tawhibt n usfewwej maḥend ad issfewwej, niɣ tawhibt maḥend ad iwc s tecrimet, niɣ tawhibt n uḍebbar s wemḥaḍ, niɣ tawhibt n arreḥmet s řefraḥet.   

9 Ad tiři tayri nwem břa nnifaq. Carhem řɣar, tcebbarem di min icnan. 10 Iřim mliḥ ijjen ak-d tawmat nwem, xsem ijj i wenneɣni, izzarem ad tcennɛem ijjen wenneɣni.    11 Iřim d imḥaḍen, war ttiřim d ifinyanen. Iřim d timessi di arruḥ, ɛebdem Siditwem, 12 Farḥem di min iǧan asitem nwem, di řmeḥnet nwem ṣbarem uca ṭṭfem řebda di tẓaǧit.    13 Wcem afus di min iḥdajen imqeddasen. Ggem s řeḍrafet ak-d ibarraniyyen.    14 Barkem inni kenniw imarrten, barkem war neɛɛřem ca.    15 Farḥem ak-d inni ifarḥen, rum ak-d yinni ittrun. 16 Ḥesbem aytmatwem am mammec tḥessbem ixef nwem, War ttiřim d imɛeffaren, maca ruḥem ak-d imwaḍɛen. War ttiřim ca d imiɣisen ak-d yixef nwem.    17 War ttarrim ca ḥed x řɣar s řɣar, maca ggem min icnan i marra iwdan.    18 Mařa tzemmarem, mecḥař ma i dd-ittasen zzaywem, ṣeřḥem ak-d marra iwdan.    19 War ttentiqimem ca i yixef nwem, a imɛizzen, maca wcem amcan i weɣḍab, minzi tura: “Mařa kenniw war tarrim tasɣart s yixef nwem, Necc ad arreɣ tasɣart newem, iqqar AREBBI.”   

20 Mařa iǧuẓ řeɛdu nwem, seccem t, mařa ifud, wcem as ad isu, minzi mařa teggid aya, ad tyarwed řefḥem itteḥduduqen x uzeǧif nnes.    21 War ttejjim ca řɣar ad kenniw iɣřeb, maca ɣeřbem x řɣar s řxar.