1 Minzi xseɣ ad tessnem mecḥař d ameqqran amenɣi i tteggeɣ xawem u x yinni di Layudikiya u x marra inni war d ayi ẓrin ca s arrimet d wudem inu, 2 ḥima ad yadef ufewwej ɣar wuřawen nsen u ḥima ad awḍen nitni s tayri ɣar marra wagřa n řaman, u ɣar řefhamet n tussna n ssirr n AREBBI, Babatneɣ, u n Lmasiḥ    3 nni di nnuffaren marra řeknuz n tiɣit d tussna.   

4 Man aya qqareɣ t, ḥima uřa d ijj war kenniw iɣekkwi ca s wawařen izewwqen.    5 Maɣar waxxa aqa ayi ɣabeɣ zi jjihet n arrimet, nican aqa ayi akidwem zi jjihet n Arruḥ uca farrḥeɣ am ttwařiɣ asettef d l’iman nwem nican di Lmasiḥ.   

6 Am mammec tqebřem Yasuɛ Lmasiḥ, Siditneɣ, uyurem dayes, 7 am tewtim iẓewran u tᵉttwabnam dayes uca tᵉttwaḍmem di l’iman i di tᵉttwasseřmadem, am tᵉttfeyyḍem s uqadi.    8 Ḥḍam uřa d ijj war kenniw iɣekkwi ca umi ittexxs tiɣit n yixef nnes niɣ acmat ixwan ɛlaḥsab taɣuri n iwdan u ɛlaḥsab lfarayiḍ n ddunect, war iǧi ɛlaḥsab Lmasiḥ.    9 Minzi dayes izeddeɣ qaɛ aɛemmar n Arebbi di ṣṣifet n arrimet. 10 Aqa dayes teǧam tkemmřem ɛawed, maɣar Netta d Azeǧif x qaɛ řeḥkamat d ṣṣulaṭat.   

11 Aqa tᵉttwaxetnem dayes ɛawed s yijj n wextan, war iǧi s ifassen n iwdan, maca umi ittwakkes zzaywem weysum n arrimet n ddnub s wextan n Lmasiḥ.    12 Kenniw tᵉttwaneḍřem akides deg useɣḍeṣ, u zzayes tᵉttwassnekkarem ɛawed akides, minzi tumnem di jjehd n AREBBI, wenni t-i-dd-issnekkaren zi taddart n imettinen.    13 Aqa Netta yarra kenniw, inni tuɣa d imettinen s ddnub nwem u s břa axtan n weysum nwem, ɣar tudart akides, uca iɣfar aneɣ marra ddnub nneɣ.    14 Aqa imseḥ tabrat nneɣ n tenfuč, tenni d aneɣ ittehmen ak-d marra tiweṣṣa nnes, aqa iksi tt zi řwesṭ am tt isemmar x ṣṣalib nnes. 15 Am issars arrimet nnes, aqa issɛarra řeḥkamat d ṣṣulaṭat bṭayṭay uca yarra i-tent ad seḍḥant s ṭṭbiɛet n mummu n Yixef nnes.   

16 War tejjim ad kenniw issehweř uřa d ijj, niɣ di macca řa di tissit, niɣ di řfarz deg wussan n řeɛyudat řa deg wass n uyur n jdid uřa deg wussan n ssebt,    17 maɣar tina d tiřiwin n min i dd ɣa yasen, maca Lmasiḥ aqa-t d arrimet i d asent dd-ittřiqen.    18 War ttejjim ḥed ad yarzu maḥend ad xawem yegg bezzez maḥend ad tesswaḍɛem ixef nwem i weɛbad n lmalakat, umi netta issniɛmiř aqa ɣares řbař immars, maca s tidett yarezzu s zzaɛmet nnes ad dd-yadef di min war iẓri. Aqa netta ixwa di tuffet nnes s nneyyet nnes n weysum n bnadem,    19 am war ittcebbar deg Uzeǧif i zi tyemma qaɛ Arrimet s řemɣaret i d as ittic AREBBI, am tᵉttwabna u tᵉttwasenned s řemfaṣeř d iɣezdisen nnes.

20 Maɣar mařa temmutem ak-d Lmasiḥ i lfarayiḍ n ddunect, mayemmi tᵉttwaḥakamem axmi teddarem ɛad di ddunect?    21 ‘War tḥada!’, ‘War tqasa!’, u ‘War ttᵉṭṭef!’, 22 aqa atent d tinamitin ad weddarent, aqa atent d tiweṣṣa d tɣuri n iwdan.    23 Aqa-tent ttbanent axmi ɣarsen ict n tɣuri tamiɣist, s wudem n uwaḍeɛ d nneyyet tadiyanect, nhřa aceṭṭar x arrimet, maca war iǧi i min icennɛen, maca i tyawant nnecwat n weysum n yixef nsen.