1 Umi war nzemmar ad t neṣbar ktar, tuɣa ittɣiř aneɣ mliḥ maḥend ad neqqim di Atina weḥḥedneɣ, 2 uca nessekk awem-dd umatneɣ Timutiyu. Netta d amsexxar n AREBBI d amɛawen nneɣ di tbarreḥt n Řexbar Aṣebḥan n Lmasiḥ, ařami izemmar ad kenniw issejhed u ad iqeǧeb l’iman nwem,    3 ḥima uřa d ijj zzaywem war iqeṭṭeɛ řayas zi ssibbet n řemḥayem-a. Aqa kenniw tessnem simant nwem, belli nettwagg i man aya.    4 Maɣar řami d aneɣ tuɣa akidwem, nizzar nenna, belli ad xaneɣ tekk řeḥṣaret, uca ammu i imsar am mammec tessnem kenniw. 5 S uyenni, umi war zemmareɣ ad ṣbareɣ ktar, aqa ssekkeɣ t-i-dd ḥima ad ssneɣ x l’iman nwem, ma ad taɣ wenni ittjarraben aqa ijarreb kenniw uca ad iffeɣ arber nneɣ d walu.

6 Maca řexxu idweř-dd ɣarneɣ zzaywem Timutiyu uca issiweḍ aneɣ-dd řexbar aṣebḥan n l’iman nwem d tayri nwem, aqa kenniw řebda tᵉttidarem aneɣ s řxar zi marra iɣezdisen u daywem meẓri maḥend ad aneɣ tẓarem, am uřa d neccin dayneɣ meẓri ad kenniw nẓar. 7 S uyenni nettwafewwej zzaywem, a kenniw awmaten nneɣ, di marra tamara nneɣ d řemḥayem nneɣ, zi ssibbet n l’iman nwem, 8 uca řexxu nettwanɛecc, mařa kenniw tᵉttɣimam tᵉttbeddam nican di Siditneɣ. 9 Mammec i ɣa negg ad nqada AREBBI zi ssibbet nwem x marra řefraḥet i zi nfarreḥ zzaywem, 10 mɣir umi nettᵉttar ǧiřet d wass s waṭṭas zzat i wudem n AREBBI, ḥima ad kenniw nẓar s uɣembub uca ad nkemmeř min ittxeṣṣan ɛad i l’iman nwem.   

11 Maca AREBBI, Babatneɣ, d Siditneɣ Yasuɛ Lmasiḥ, ad iseggem abrid nneɣ ɣarwem. 12 Netta ad yarni di tayri nwem n ijjen i wenneɣni u tayri nwem i marra, am mammec nᵉttexs neccin uřa i kenniw, 13 uca Netta ad issmeḥḥed uřawen nwem, ḥima ad tiřim břa řɛib di tqeddast qibač i AREBBI Babatneɣ, x minni dd ɣa yas Siditneɣ Yasuɛ Lmasiḥ ak-d marra imqeddasen nnes.