1 Maca Arruḥ iqqar nican belli di zzmanat tineggura ca ad ḥeyyden x l’iman umi ɣa ḍfaren řaryaḥ issɣekkwan d tɣuri n ccwaṭen.    2 Nitni sɣekkwan am ssniɛmiřen ixef nsen, ssxarriqen u tteqqden tanefsect nsen. 3 Nitni ttᵉṭṭfen řemřac uca ttamaren asbeɛɛed x macca nni dd-ittwaxeřqen zi AREBBI maḥend ad tiři i nnfeɛ d uqadi i yinni yumnen u ssnen tidett.    4 Minzi marra min dd-ittwaxeřqen zi AREBBI iṣbeḥ uca war dayes min ɣa nagi mařa neqbeř zzayes s uqadi,    5 minzi ad ittwaqeddes s Wawař n AREBBI d tẓaǧit.

6 Mařa tessřemded man aya i wawmaten nnec, ad tiřid d amsexxar n Yasuɛ Lmasiḥ, aqa tᵉttwarebbid deg wawařen n l’iman u tᵉttwassřemded di tɣuri n ṣṣaḥ.    7 Maca aggʷej x tḥuja ixwan n twessura u marres ixef nnec di tsegda.    8 Minzi arriyaḍa n arrimet tᵉttawi ɣar nnfaɛ i drus n řweqt waha, maca tasegda tneffeɛ řebda, uca aqa ɣares lwaɛd n Tudart i yiḍa u i řweqt i dd ɣa yasen.   

9 Wa d awař dayes řaman, isdaheǧ ad ittwaqbeř. 10 Minzi i man aya umi nxeddem u nettwasseḥqara ɛawed, minzi asitem nneɣ aqa-t di AREBBI iddaren, wenni itticen Tudart i marra iwdan, amezwaru i yinni yumnen. 11 Seřmed, tumured s man aya.

12 Ejj uřa d ijj war cek isseḥqiri ca x temẓi nnec, maca iři d lmital i yinni yumnen, s wawař, s wendah, s tayri, s l’iman u s tazdugi.    13 Iři tecḍared di tɣuri i tmesmunt, di ṭẓaǧit u deg useřmed ař dd ɣa yaseɣ. 14 War sḥeqqara ca tawhibt i dayek, tenni i d ac immewcen umi tuɣa ttnabben u ssarsen imɣaren xak ifassen.    15 Ɛqeř x tmesřayin-a, cebbar daysent, ḥima ticři nnec ɣar zzat ad tban i marra. 16 Ḥḍa ixef nnec u ḥḍa x useřmed, ṣbar di man aya, minzi mařa teggid ddegga, ad teḥḍid ixef nnec di Tudart uřa d inni d ac ittesřan.