1 Yaɛqub, amsexxar n AREBBI u n Siditneɣ Yasuɛ Lmasiḥ, i tenɛac n tqebbař tinni ittwazeǧɛen jar řegnus: Řehna xawem!   

2 A aytma, mařa ad xawem kken ɛřam kuř ijarriben, ḥesbem man aya marra d řefraḥet,    3 maɣar kenniw tessnem belli taqeǧebt n l’iman, ad dd-tejj ṣṣbar nwem.    4 Maca ittxeṣṣa ṣṣbar ad ittwakemmeř, ḥima ad tawḍem u ad tkemmřem, uca war kenniw ittxeṣṣi walu.

5 Mařa ca n ijjen zzaywem teqqim as ɛad tiɣit, ad tt ittar zi AREBBI wenni itticen s tecrimet i marra břa azawar, uca ad as temmewc.    6 Maca ejj i-t ad ittar s l’iman, břa acekki, minzi wenni ittcekkan aqa netta am řemwaj n řebḥar nni ittwaɛarrnen zeg usemmiḍ. 7 War ttejji ad as ittɣiř i bnadem nni ad iksi ca zi SIDI, 8 maɣar netta s tnayen izeǧifen, war yarsi di marra ibriden nnes.

9 Ejj umatwem iwaḍɛen ad issemɣar di řuɛřa nnes, 10 u bu-wagřa deg uwaḍeɛ nnes, minzi am twardect di arbiɛ ad ifna netta. 11 Maɣar ad tenqar tfuct s řeḥmu nnes, ad tessecmeḍ arbiɛ uca tawardect ad tisřaw uca ad as iraḥ waẓri n wudem nnes. Ammu i ɣa ifna ɛawed bu-wagřa di marra ibriden nnes.   

12 Sseɛd n weryaz nni i ɣa iḥemřen ajarreb, minzi mařa idweř d amqeǧeb, ad iṭṭef ttaj n Tudart nni tuɣa iwaɛd zzayes AREBBI i yinni t ittexsen.    13 War ttejji ḥed mařa ittwajjareb, ad yini: “AREBBI i d ayi ittjarraben!” Aqa AREBBI war izemmar ad ittwajarreb zi řɣar uca Netta s yixef nnes war ittjjarrib uřa d ijj. 14 Maca kuř ijj ad ittwaɣwa zi nnecwet nnes uca nnecwet ad t tᵉṭṭef uca ad zzayes ittwaɣwa. 15 Mařa nnecwet teksi s uɛeddis, ad dd-taruw ddenb, uca xmi ɣa imɣar ddenb, ad dd-yawi řmewt. 16 A aytma iɛizzen, war ttweddarem! 17 Kuř tawhibt taṣebḥant d ikemmřen thekkwa-dd zi sennej, zi Babatsent n tfawin i war ɣar iǧi ubeddeř niɣ tiři n ddewřan.    18 Yusa-dd as x řxaḍar, maḥend ad aneɣ dd-yejj s wawař n tidett, ḥima ad niři d ṣṣabet tamezwarut zi marra min zzayes dd-ixeřqen.   

19 Snem aya, a aytma iɛizzen, ejj kuř bnadem ad iqeǧeq ḥima ad iseř, war tqeǧiqem ca ɣar wawař niɣ ɣar tefqeḥt.    20 Minzi tafqeḥt n weryaz war dd-tᵉttiwi ca tasegda zzat i AREBBI. 21 S uyenni ssbeɛɛdem xawem qaɛ taxmuji d waṭṭas n tuɛeffna, uca qebřem s temhint awař i ittwaẓẓun di ṭṭbiɛet nneɣ, awař i izemmaren ad issenjem řeɛmur nwem.   

22 Iřim d inni itteggen awař, war iǧi d inni ittesřan waha, war cemtem ixef nwem!    23 Minzi mařa isřa ḥed i wawař, maca war zzayes iggi, aqa netta am yijj n weryaz i ixezzaren di tisit deg uɣembub nnes.    24 Minzi ittwařa ixef nnes, iruḥ, uca řexdenni ad ittu mammec tuɣa iǧa. 25 Maca wenni i ɣa ixzaren di Ccariɛa ikemmřen n tiřelli uca iqqim ixezzar dayes, war iǧi am yijjen ittesřa řexdenni ittᵉttu deɣya, maca am yijjen wenni tt itteggen s tidett, aqa wanita d amimun di min ittegg.   

26 Mařa din wenni umi ittɣiř aqa netta ittsexxar i AREBBI am war iḥeṭṭi iřes nnes, maca ixeddeɛ uř nnes, xenni aqa tasexxart nnes baṭeř.    27 Maɣar tasexxart tamezdagt d iqeddsen qibač i AREBBI, Babatneɣ, aqa-t d ta: athili deg iyujiřen d tijjař di řmeḥnet nsent, u maḥend bnadem ad iḥeyyed ixef nnes zi ddunect břa řɣecc.